Go Oketsa go Neela Bosupi fa Bokhutlo bo Ntse bo Atamela
1 Paka ya thobo ke nako e e itumedisang. Gape ke nako ya go dira ka natla. Nako ya go phutha se se robilweng e nnye thata. Badiri ga ba a tshwanela go goga dinao mo tirong ya bone.
2 Jesu fa a ne a bua ka tsela ya tshwantshetso, o ne a bapisa nako ya thobo le “bokhutlo jwa tsamaiso ya dilo.” (Math. 13:39) Re tshela mo bokhutlong jwa tsamaiso eno ya dilo, mme re na le nako e nnye thata e e setseng ya go neela bosupi “mo lefatsheng lotlhe le le nang le banni.” (Math. 24:14) Fa bokhutlo bo ntse bo atamela, re tlhoka go oketsa seabe sa rona mo bodireding. Ka ntlha yang? Jesu o ne a tlhalosa jaana: “Thobo e kgolo, mme badiri ba babotlana.”—Math. 9:37, 38; Bar. 12:11.
3 O Tlhoafale: Fa Jesu a ne a simolola tiro ya gagwe e kgolo ya go rera, o ne a na le dingwaga di le tharo le sephatlo fela gore a fetse tiro e a neng a abetswe go e dira. O ne a rera ka tlhoafalo, a re: “Ke tshwanetse go bolela dikgang tse di molemo tsa bogosi jwa Modimo, ka gonne ke ne ka romelwa ka ntlha ya seno.”—Luke 4:43.
4 Jesu o ne a tlhotlheletsa barutwa ba gagwe gore le bone ba tlhoafale jalo. (Mar. 13:32-37) Ke gone ka moo “letsatsi lengwe le lengwe mo tempeleng le go tswa ntlong go ya ntlong e nngwe ba tswelela kwantle ga go kgaotsa ba ruta e bile ba bolela dikgang tse di molemo kaga Keresete, Jesu.” (Dit. 5:42) Ba ne ba sa beye ditiro tse e seng tsa botlhokwa kwa pele mo matshelong a bone. Le fa gone ba ne ba le mmalwa fela, ba ne ba kgona go rera dikgang tse di molemo “mo tlholong yotlhe e e leng tlase ga legodimo.”—Bakol. 1:23.
5 Le rona re na le lebaka le legolo thata la go nna le tlhoafalo e e ntseng jalo gone jaanong, gonne “bokhutlo jwa dilo tsotlhe bo atametse.” (1 Pet. 4:7) Jehofa o tlhomile letsatsi le ura tse tsamaiso eno ya dilo e tlileng go fela ka tsone. (Math. 24:36) Tiro ya go rera e tla fela mo nakong e e setseng. Ke gone ka moo re tswelelang re dira maiteko a a oketsegileng go fitlhelela batho ba bantsi ka dikgang tse di molemo.
6 Ka go oketsa tsela e re neelang bosupi ka yone fa bokhutlo bo ntse bo atamela, re tla nna le kgotsofalo ya go bolelela Jehofa jaana jaaka Jesu a dirile: ‘Re weditse tiro e o re e neileng go e dira.’—Joh. 17:4.