Maitseo—Mokgwa wa Batho ba Modimo

¹ Batho ga ba tlhole ba na le maitseo gompieno. Ka ntlha yang? Batho ba tshwaregile thata jaana mo e leng gore ba lebala go bua mafoko a e leng one tota a bontshang maitseo, jaaka go re “Tsweetswee,” “Ke a leboga,” kgotsa “Intshwarele.” Lefoko la Modimo le ile la bolelela pele gore maitseo a batho a ne a tla fela mo metlheng ya bofelo, fa le ne le bolela gore batho ba tla nna ‘baithati, baipegi, ba ba mabela, ba ba sa lebogeng, ba ba se nang lorato lwa tlholego, ba ba se nang boikgapo, ba ba sa rateng se se molemo le ba ba tlhogoethata.’ (2 Tim. 3:1-4) Mekgwa eno yotlhe e dira gore batho ba se ka ba nna maitseo. Jaaka batho ba ba boifang Modimo, Bakeresete ba tshwanetse go itisa gore ba se ka ba nna le mokgwa wa lefatshe leno wa go se tlotle batho ba bangwe.

² Maitseo ke Eng? Maitseo a ka tlhalosiwa e le go nna kelotlhoko thata ka maikutlo a batho ba bangwe, go kgona go tshela le batho ba bangwe ka kagiso. Dilo tse di bontshang gore motho o maitseo ke fa a akanyetsa ba bangwe, a ba tlotla, a le pelonomi, a le botho e bile a le kelotlhoko ka mafoko a gagwe. Motho o nna le mekgwa eno fa a rata Modimo le moagelani wa gagwe. (Luke 10:27) Ga o tlhoke madi go bontsha mekgwa eno, le fa go ntse jalo, e botlhokwa thata go nonotsha dikamano tsa rona le batho ba bangwe.

³ Jesu Keresete o re tlhometse sekao se se itekanetseng. Ka metlha o ne a dirisa Molao wa Sekagouta: “Fela jaaka lo batla batho ba lo direla, ba direleng ka yone tsela eo.” (Luke 6:31) A ga re kgatlhiwe ke tsela e Jesu a neng a akanyetsa barutwa ba gagwe ka yone le kafa a neng a dirisana le bone ka lorato ka teng? (Math. 11:28-30) Go nna maitseo ga gagwe go ne go sa thewa mo melaong e e beilweng mo dibukeng tse di tlhalosang maitseo. Go ne go bakwa ke bopeloephepa le bopelotshweu jwa gagwe. Re tshwanetse go leka go etsa sekao sa gagwe se se molemo.

⁴ Bakeresete ba tshwanetse go nna maitseo leng? Ka dinako tse di kgethegileng fela, fa ba batla go itira batho ba ba molemo? A ba tshwanetse go nna maitseo fela fa ba leka go tlhotlheletsa batho ba bangwe? Nnyaa! Re tshwanetse go bontsha maitseo ka dinako tsotlhe. Ke ka ditsela dife segolobogolo re tshwanetseng go amega ka seno fa re na le ba bangwe mo phuthegong?

⁵ Kwa Holong ya Bogosi: Holo ya Bogosi ke lefelo la rona la kobamelo. Jehofa Modimo ke ene yo o re laleditseng. Ka jalo, re baeng. (Pes. 15:1) A re baeng ba ba tlhomang sekao fa re ya kwa Holong ya Bogosi? A re ela tlhoko sentle tsela e re aparang le go ikgabisa ka yone? Ga go pelaelo gore ga re batle go ikgabisa ka tsela e e sa tlotlegeng kana e e feteletseng. Batho ba ga Jehofa e ka ne ba le kwa dikopanong kana kwa dipokanong tsa bone tsa phuthego tsa beke le beke, ba itsege ka tebego ya bone e ntle e e tshwanelang batho ba ba ipolelang gore ba tlotla Modimo. (1 Tim. 2:9, 10) Ka jalo, re bontsha Molaletsi wa rona wa selegodimo le baeng ba bangwe ba ba laleditsweng gore re a ba akanyetsa e bile re ba naya tlotlo e e ba tshwanetseng.

⁶ Tsela e nngwe e re bontshang maitseo ka yone kwa dipokanong ke ka go fitlha ka nako. Ke boammaaruri gore ga se ka metlha go leng motlhofo go dira jalo. Bangwe ba ka tswa ba nna kgakala kana ba le bantsi mo lelapeng mo go dirang gore ba tseye nako e ntsi go ipaakanya. Go tlhokometswe gore mo diphuthegong tse dingwe baboledi ba le mmalwa ba tlwaetse go fitlha morago ga pina le thapelo e e simololang. Eno ke kgang e e masisi. Re tshwanetse go gakologelwa gore go nna maitseo ga rona go akaretsa go amega ka maikutlo a batho ba bangwe. Jehofa, Molaletsi wa rona yo o pelontle, o rulagantse meletlo eno ya semoya gore e re solegele molemo. Re bontsha gore re anaanela maikutlo a gagwe le gore re amega ka one ka go fitlha ka nako. Mo godimo ga moo, go fitlha thari kwa dipokanong go itaya ba ba setseng ba tlile tsebe e bile go bontsha gore ga re ba tlotle.

⁷ Fa re le kwa dipokanong, a re ela tlhoko batho ba basha ba ba leng teng? Go ba amogela go bontsha gore re na le maitseo. (Math. 5:47; Bar. 15:7) Go ba dumedisa ka bopelontle, go ba dumedisa ka botsalano ka seatla, go nyenya le bone—dilo tseno tsotlhe di lebega di se botlhokwa go le kalo, le fa go ntse jalo, di dira gore letshwao le le re tlhaolang re le Bakeresete ba boammaaruri le bonale thata. (Joh. 13:35) Monna mongwe o ne a bolela jaana fa a sena go tla kwa Holong ya Bogosi lekgetlho la ntlha: “Ke ne ka kopana le batho ba ba lorato tota mo letsatsing le le lengwe fela, ba ke neng ke sa ba itse gotlhelele, ba le bantsi go feta botlhe ba nkileng ka ba bona mo kerekeng e ke goletseng mo go yone. Go ne go bonala sentle gore ke bone boammaaruri.” Seno se ne sa dira gore a fetole botshelo jwa gagwe, mme dikgwedi di le supa moragonyana o ne a kolobediwa. Ee, go nna maitseo go ka nna le matswela a magolo thata!

⁸ Fa re kgona go nna maitseo mo bathong ba re sa ba itseng ba re kopanang le bone, a ga re a tshwanela go dira jalo “segolobogolo mo go ba ba amanang le rona mo tumelong”? (Bagal. 6:10) Re tshwanetse go dirisa molaomotheo ono fano: “O tlotle motho yo o tsofetseng.” (Lefi. 19:32) Batho bano ga ba a tshwanela go tlhokomologiwa le ka motlha kwa dipokanong tsa rona.

⁹ Reetsa ka Kelotlhoko: Kwa dipokanong tsa phuthego, badiredi ba Modimo ba Bakeresete ba bua ka maikaelelo a go re naya mpho nngwe ya semoya go re aga. (Bar. 1:11) Ruri re tla bo re bontsha gore ga re na maitseo fa re ka otsela, ra tlhafuna tšhunkama ka tsela e e itayang tsebe, ra nnela go sebaseba le mongwe yo o ntseng gaufi le rona, ra ya gangwe le gape kwa ntlwaneng go sa tlhokege, ra bala dilo tse di sa amaneng le se se buiwang mo dipokanong kana ra dira dilo tse dingwe ka nako ya dipokano. Bagolwane ba tshwanetse go tlhoma sekao mo ntlheng eno. Maitseo a mantle a Bokeresete a tla re tlhotlheletsa go bontsha ka tsela e e tshwanetseng gore re tlotla sebui le molaetsa wa sone o o theilweng mo Baebeleng ka go tlhoma mogopolo mo go se a se buang.

¹⁰ Mo godimo ga moo, ka ntlha ya gore re akanyetsa sebui le batho ba ba mo reeditseng, re tshwanetse go tima di-pager le difouno tsa rona tsa selula gore di se ka tsa kgoreletsa dipokano tsa rona.

¹¹ Maitseo le Bana: Batsadi ba tshwanetse go nna ba etse tlhoko boitshwaro jwa bana ba bone ka dinako tsotlhe. Fa ngwana a simolola go lela kana a simolola go tshwenya ka nako ya dipokano mme seno se itaya ba bangwe tsebe, go molemo gore motsadi a tswe le ene mo holong ka bonako jo bo ka kgonegang gore a mo didimatse. Seno se ka nna thata go se dira ka dinako tse dingwe, le fa go ntse jalo, gakologelwa gore go dira jalo go bontsha gore o akanyetsa maikutlo a batho ba bangwe. Batsadi ba ba nang le bana ba bannye ba ba ka nnang ba tshwenya gantsi ba bona go le molemo go nna mo ditulong tse di kwa morago mo holong gore ba se ka ba itaya batho ba le bantsi tsebe fa ba tshwanelwa ke go tswa ka nako ya dipokano. Gone mme, ba bangwe botlhe ba ka bontsha gore ba akanyetsa malapa a a nang le bana ka go se nne mo ditulong tse di kwa morago gore fa malapa ano a batla go di dirisa a kgone go dira jalo.

¹² Gape batsadi ba tshwanetse go ela tlhoko gore bana ba bone ba itshwara jang pele dipokano di simolola le morago ga tsone. Bana ga ba a tshwanela go tabogaka mo teng ga holo, ka gonne seno se ka baka dikotsi. Go tabogaka ka kwa ntle ga Holo ya Bogosi le gone go ka nna kotsi, segolo jang bosigo fa re sa kgone go bona sentle. Go buela kwa godimo fa re le kwa ntle go ka itaya baagelani ba rona tsebe mme go ka ba naya maikutlo a a sa siamang ka kobamelo ya rona. Batsadi ba ba dirang maiteko a magolo go ela tlhoko boitshwaro jwa bana ba bone fa ba le mo teng ga Holo ya Bogosi le ka kwa ntle ga yone ba tshwanetse go akgolwa ka gonne seno se oketsa boitumelo jwa go nna mmogo ga rona ka kutlwano.—Pes. 133:1.

¹³ Kwa Thutong ya Buka: Re anaanela thata moya wa go amogela baeng wa bakaulengwe ba rona ba ba letlelelang gore dipokano tsa phuthego di tshwarwe mo magaeng a bone. Fa re ya kwa dipokanong kwa magaeng a bone, re tshwanetse go bontsha gore re tlotla dithoto tsa bone e bile re a di akanyetsa. Pele re tsena mo ntlong, re tshwanetse go phimola ditlhako tsa rona sentle gore re se ka ra tlatsa leswe fa fatshe kana mo khapeteng. Batsadi ba tshwanetse go tlhokomela bana ba bone, ba tlhomamisa gore ba nna fela mo karolong e e abetsweng thuto ya buka. Le fa setlhopha se ka nna sennye e bile maemo e le a a phuthologileng go sekae, ga re a tshwanela go dira maratwaepelo mo magaeng a ba bangwe. Motsadi o tshwanetse go tsamaya le ngwana wa gagwe fa a batla go ya kwa ntlwaneng. Mo godimo ga moo, e re ka thuto ya buka e le pokano ya phuthego, re tshwanetse go apara fela jaaka re apara fa re ya kwa Holong ya Bogosi.

¹⁴ Maitseo a Botlhokwa: Go nna le maitseo a mantle a Bokeresete ga go dire gore batho ba bue sentle ka bodiredi jwa rona fela, mme gape go godisa dikamano tse di molemo tse re nang le tsone le ba bangwe. (2 Bakor. 6:3, 4, 6) E re ka re le baobamedi ba Modimo yo o itumetseng, go tshwanetse ga nna motlhofo mo go rona go nyenya le batho ba bangwe, go itumela le bone le e leng go dira dilo tse go lebegang di se na molemo wa sepe tsa bopelonomi, tse di ipedisang batho ba bangwe. Mekgwa eno e mentle e tla kgabisa matshelo a rona jaaka batho ba ba boifang Modimo.