Tiro ya go Rera ka Bogosi e Thusa go Boloka Matshelo!

¹ Ke tiro e e botlhokwa thata e e dirwang mo lefatsheng mo nakong eno. Jehofa Modimo, Jesu Keresete le dimiriate tsa baengele ba tlhomile mogopolo mo go yone. Ke tiro efe eo, mme ke eng fa e le botlhokwa thata jaana? Ke tiro ya go rera ka bogosi, mme e thusa go boloka matshelo a batho!—Bar. 1:16; 10:13, 14.

² Batho bangwe ba ka nna ba akanya gore re ne re tla bo re thusa batho thata fa re ka bo re ne re leka go tokafatsa lefatshe le re nnang mo go lone. Ba le bantsi ba tshwaregile thata ka go leka go tlisa kagiso, go fodisa malwetse kgotsa go tokafatsa ikonomi. Le fa go ntse jalo, ke eng se se tla thusang batho thata?

³ Tiro E e Di Gaisang Tsotlhe: Molaetsa wa Bogosi ka boone fela o tlhalosa se tota re se tshelelang, o tlhalosa lebaka la go bo batho ba boga le tsholofelo e le nngwe fela e e ikanyegang ka isagwe. Dikgang tse di molemo di thusa batho go nna ditsala tsa ga Jehofa mme ka go dira jalo ba nne le “kagiso ya Modimo e e gaisang kakanyo yotlhe.” (Bafil. 4:7) Ke molaetsa wa Bogosi fela o o nayang batho kaelo e e mosola go ba thusa go itshokela mathata a botshelo gone jaanong e bile o tlhalosa gore ba ka dira jang gore ba bolokwe fa batho ba ba boikepo ba fedisiwa mo isagweng. (1 Joh. 2:17) A seno ga se re neye lebaka la go dira gotlhe mo re ka go kgonang go rera ka Bogosi?

⁴ Go tshwantsha kgang eno: Tsela e e neng e tla nna molemo thata ya go thusa batho ba ba robetseng mo motseng o o leng mo kotsing ya go thubegelwa ke letamo e ne e ka nna efe? A ke ka go ntsha metsi ka kwa morago mo letamong leno le le tlogang le thubega? A ke ka go kgabisa motse ono o o tlogang o senngwa ke metsi? Nnyaa! Batho ba motse ba tshwanetse go tsosiwa, ba tlhagisiwe ka tshenyego e e tlogang e ba diragalela, mme ba thusiwe go tshaba! Gompieno batho ba ba robetseng semoyeng ba mo kotsing e kgolo thata. (Luke 21:34-36) E re ka tsamaiso eno ya dilo e tla tloga e fela, a re lekeng go rerela botlhe ba re ka kgonang go ba rerela, re dira jalo re na le boikutlo jwa go potlaka!—2 Tim. 4:2; 2 Pet. 3:11, 12.

⁵ A re Nneng mo go Yone: A re batleng ditsela tsa go fitlhelela batho ba le bantsi ba ba peloephepa ka dikgang tse di molemo—kwa matlong a bone, mo mebileng, ka thelefouno le ka mokgwa o o seng wa ka tlwaelo. Tiro e Jehofa a re neileng yone ke tiro e e botlhokwa go gaisa ditiro tsotlhe tse re ka di dirang. Fa re e dira ka tlhoafalo, re ‘tla ipoloka re bo re boloka le ba ba re reetsang.’—1 Tim. 4:16.