Tumelo ya Rona e re Tlhotlheletsa go Dira Ditiro Tse di Molemo
1 Tumelo e ne ya tlhotlheletsa Noa, Moshe le Rahabe go tsaya kgato. Noa o ne a aga araka. Moshe o ne a itima menate ya nakwana ya botshelo mo lolwapeng lwa ga Faro. Rahabe o ne a fitlha ditlhola a bo a reetsa ditaelo tsa bone, mme a boloka ba lelapa la gagwe. (Baheb. 11:7, 24-26, 31) Tumelo ya rona e re tlhotlheletsa go dira ditiro dife tse di molemo gompieno?
2 Go Neela Bosupi: Tumelo e re tlhotlheletsa go bua ka Modimo wa rona yo o molemolemo le dipaakanyetso tse a di re diretseng gore re bone boitumelo jo bo sa khutleng. (2 Bakor. 4:13) Ka dinako tse dingwe, re ka nna ra ikutlwa re okaoka go neela bosupi. Mme fa re ‘baya Jehofa fa pele ga rona ka metlha,’ re a nonofa mme poifo ya rona e a kokobela. (Pes. 16:8) Fa re dirile jalo, tumelo ya rona e re tlhotlheletsa gore re bolelele ba losika, baagelani ba rona, ba re berekang le bone, ba re tsenang sekolo le bone le ba bangwe dikgang tse di molemo nako le nako fa go tshwanela.—Bar. 1:14-16.
3 Go Kopana Mmogo: Go nna teng ka metlha kwa dipokanong ke tiro e nngwe e e tlhotlhelediwang ke tumelo. Jang? Fa re nna gone kwa dipokanong tsa Bokeresete, seno se bontsha fa re tlhatswegile pelo gore Jesu o na le rona ka moya o o boitshepo wa Modimo. (Math. 18:20) Go bontsha gore re eletsa go ‘utlwa se moya o se buang le diphuthego.’ (Tshen. 3:6) Re tsaya se re se rutwang masisi ka gonne tumelo ya rona e bontsha fa re tlhaloganya gore re rutwa ke Jehofa, Motlhatlheledi wa rona yo Mogolo.—Isa. 30:20.
4 Dilo Tse re di Tlhophang: Go tlhatswega pelo ka tsela e e nonofileng ka dilo tse re iseng re di bone go re tlhotlheletsa gore re beye dilo tsa semoya kwa pele mo matshelong a rona. (Baheb. 11:1) Gantsi seno se akaretsa go itima dilo dingwe tse di bonalang. Ka sekai, mogolwane mongwe o ne a gana go newa tiro ya maemo a a kwa godimo ka gonne fa a ne a ka e amogela o ne a tla foswa ke dipokano, o ne a se kitla a nna le nako ya go nna le lelapa la gagwe e bile o ne a tla tlogela tirelo ya bobulatsela. E kete ka tsela e e tshwanang re ka tshepa ka botlalo se Baebele e se re tlhomamisetsang gore Jehofa o tlamela ba ba ‘nnang ba batla pele bogosi le tshiamo ya gagwe.’—Math. 6:33.
5 Batho ba bangwe ba kgona go lemoga kafa tumelo e nang le tlhotlheletso e e maatla ka gone mo matshelong a rona. Eleruri, tumelo ya rona e itsiwe lefatshe ka bophara. (Bar. 1:8) Ka jalo, e kete rotlhe re ka bontsha ka ditiro tsa rona tse di molemo gore tumelo ya rona e a tshela.—Jak. 2:26.