Masego a Tiro ya Bobulatsela
1, 2. Tiro ya bobulatsela e na le masego afe, mme ka ntlha yang?
1 Mmulatsela mongwe o ne a bolela jaana: “Ke a itse gore ga go na tiro epe e nngwe e e neng e ka ntlisetsa kgotsofalo jaaka ya go bolelela ba bangwe boammaaruri.” Yo mongwe ene o ne a re: “Kwa bokhutlong jwa letsatsi lengwe le lengwe, ke robala monate, pelo ya me e phophoma boitumelo.” Babulatsela bano ba bontsha kafa bakaulengwe le bokgaitsadi ba bangwe gongwe le gongwe ba ikutlwang ka gone, ba ba ileng ba segofadiwa ka ntlha ya tiro ya bone ya bobulatsela.—Dia. 10:22.
2 Go thusa ba bangwe gore ba nne le kitso ya Lefoko la Modimo e e tla bolokang botshelo jwa bone go tlisa kgotsofalo ya mmatota. (Dit. 20:35; 1 Bathes. 2:19, 20) Mongwe yo o feditseng lobaka lo loleele e le mmulatsela o bolela jaana: “Go itumedisa tota e bile go nonotsha tumelo go bona kafa Lefoko la Modimo le leng maatla ka gone mo go tlhotlheletseng batho gore ba dire diphetogo mo matshelong a bone.” Ee, babulatsela ba tla amogela masego a a tshwanang le ano fa ba ithaopela go thusa batho le go ba tshwarela dithuto tsa Baebele.
3, 4. Bobulatsela bo thusa motho jang gore a ikaege ka Jehofa, mme seno se mo thusa jang gore a gole semoyeng?
3 Go Ikaega ka Jehofa: Fa babulatsela ba ikaega ka moya wa Modimo letsatsi le letsatsi fa ba le mo bodireding, seno se ba thusa gore ba nne le “maungo a moya” mme go nna le one go a ba sireletsa. (Bagal. 5:16, 22, 23) Mo godimo ga moo, e re ka babulatsela ba dirisa Lefoko la Modimo ka metlha, gantsi ba na le bokgoni jwa go dirisa Dikwalo go femela boammaaruri le go nonotsha ba bangwe. (2 Tim. 2:15) Mokaulengwe mongwe yo o feditseng dingwaga di le masomesome e le mmulatsela o akgela jaana: “Go nna mmulatsela go nthusitse gore ke nne le kitso e e boteng ya Baebele, kitso e ke e dirisitseng go thusa batho ba le bantsi gore ba itse Jehofa le maikaelelo a gagwe.” A bo seno se kgotsofatsa jang ne!
4 Gape, babulatsela ba ka metlha ba tshwanetse go ikaega ka Jehofa ka ditsela tse dingwe tse dintsi. Tumelo ya bone e a nonofa fa ba bona tsela e a ba segofatsang ka yone gore ba nne le dilo tse ba di tlhokang. Mmulatsela wa ka metlha yo o nang le dingwaga di le 72 mme a feditse dingwaga di le 55 e le mmulatsela o tlhalosa jaana: “Jehofa ga a ise a ko a ntatlhe.” Mo godimo ga moo, babulatsela ba tila go nna le ditlhobaelo di le dintsi tsa botshelo ka go tshela botshelo jo bo sa raraanang. A o ka rata go tshela jalo?—Math. 6:22; Baheb. 13:5, 6.
5. Bobulatsela bo thusa motho jang gore a atamalane le Jehofa?
5 Go Atamalana le Modimo: Kamano ya rona le Jehofa ke selo se se botlhokwa go di gaisa tsotlhe. (Pes. 63:3) Fa re nna le seabe ka botlalo mo bodireding e le ka go bo re rata Jehofa, kamano eo e gola le go feta. (Jak. 4:8) Mokaulengwe mongwe yo o feditseng dingwaga di feta 18 e le mmulatsela o ne a bolela jaana: “Tiro ya bobulatsela e re naya sebaka sa go ‘leka Jehofa gore re bone kafa a leng molemo ka gone,’ e bile e re thusa go nonotsha kamano ya rona le ene letsatsi le letsatsi jaaka Mmopi wa rona.”—Pes. 34:8.
6. Ke eng se babulatsela ba tshwanetseng go nna le sone, mme ke bomang gape ba ba solegelwang molemo kwantle ga babulatsela?
6 Mo godimo ga gore babulatsela ba nne le maemo a a ba letlang go bula tsela, ba tshwanetse gore gape ba nne le tumelo e e nonofileng, ba rate Modimo le baagelani ba bone ka mmatota ba bo ba iketleeletse go intsha setlhabelo. (Math. 16:24; 17:20; 22:37-39) Le fa go ntse jalo, boitumelo jo babulatsela ba nang le jone ga se jone fela masego a ba nang le one, go sa ntse go na le a mangwe a mantsi. (Mal. 3:10) Masego ano ga a bonwe ke babulatsela fela, maloko a lelapa mmogo le a phuthego le one a solegelwa molemo thata ke moya o babulatsela ba o bontshang.—Bafil. 4:23.