Basha—Thayang Motheo o o Molemo wa Isagwe
1. Ke ka ntlha yang fa basha ba Bakeresete ba tshwanetse go nna le tumelo e e nonofileng?
1 Ke eng se o ratang go akanya thata ka sone? A o tshwenyega thata ka dilo tsa gone jaanong, kgotsa a o tshwenyega ka isagwe le go tlhoma mogopolo mo go se Modimo a se solofeditseng? (Math. 6:24, 31-33; Luke 8:14) Re tshwanetse go nna le tumelo e e nonofileng gore re tle re kgone go dira dilo ka tsela e e bontshang gore re letetse ditsholofetso tsa Modimo, jaaka go ile ga dira Aborahame le Moshe. (Baheb. 11:8-10, 24-26) O ka dira jang gore o nne le tumelo e e ntseng jalo le go thaya “motheo o o molemo wa isagwe”?—1 Tim. 6:19.
2. Re ithutang ka sekai sa ga Kgosi Josia yo mmotlana?
2 Batla Jehofa: Re a go akgola fa e le gore wena le lelapa la gaeno lo na le thulaganyo ya go dira dilo tsa semoya mmogo. Le gale, o se ka wa tsaya gore go nna le tumelo e e nonofileng go tla itlela fela fa o na le thulaganyo e e ntseng jalo. Wena ka bowena o tshwanetse go batla Jehofa gore o nne le “e e leng kitso ya Modimo.” (Dia. 2:3-5; 1 Ditir. 28:9) Kgosi Josia yo mmotlana o ne a dira jalo. Le mororo a ne a golela mo lelapeng le le neng le sa mo thuse go gola semoyeng, o ne “a simolola go batla Modimo wa ga Dafide rraagwemogologolwane” fa a ne a na le dingwaga di le 15 fela.—2 Ditir. 34:3.
3. Basha ba Bakeresete ba ka batla Jehofa jang gompieno?
3 O ka batla Jehofa jang? Ka go tlhatlhoba ka kelotlhoko se o se dumelang le go ‘iponela wena ka bowena’ gore a tota se boammaaruri. (Bar. 12:2) Ka sekai, a o ka kgona go tlhalosa gore Baebele ya reng ka madi kgotsa a o ka kgona go ntsha bosupi jwa gore Bogosi Jwa Modimo bo simolotse go busa kwa magodimong ka 1914? Go nna le ‘kitso e e leng yone, ya boammaaruri’ ke sengwe sa dilo tse di botlhokwa se se tla go thusang go aga motheo o o molemo wa isagwe.—1 Tim. 2:3, 4.
4. Baboledi ba ba sa kolobediwang ba ka dira jang gore kgatelopele ya bone e bonale?
4 Josia o ne a segofadiwa ka ntlha ya go bo a ne a batla Modimo. Pele a tshwara dingwaga di le 20, o ne a dira tiro ya bopelokgale ya go tlosa kobamelo ya maaka mo nageng yotlhe. (2 Ditir. 34:3-7) Ka tsela e e tshwanang, le wena o ka bontsha ka ditiro tsa gago gore o gatetse pele semoyeng. (1 Tim. 4:15) Fa e le gore o mmoledi yo o sa kolobediwang, leka go gatela pele mo bodireding. O se ka wa kgotsofalela fela go tsamaisetsa batho dibuka. Ipeele mokgele wa go dirisa Baebele, go ntshetsa batho mabaka fa o bua le bone le go tlhokomela batho ba ba kgatlhegang ba o kopaneng le bone. (Bar. 12:7) Seno se tla go thusa go gola semoyeng.
5. Bakeresete ba ba kolobeditsweng ba na le ditshono dife tsa go atolosa bodiredi jwa bone?
5 Direla Jehofa ka Bojotlhe: Fa o tshwantshetsa boineelo jwa gago mo go Jehofa ka go kolobediwa, o nna modiredi yo o tlhomamisitsweng wa Modimo. (2 Bakor. 3:5, 6) Seno se go bulela ditshono tsa go tsenela tirelo ya nako e e tletseng gore o direle Jehofa. Ditshono tseno di akaretsa go nna mmulatsela mmogo le go ya Bethele, go nna morongwa le go nna moithaopi yo o direlang kwa dinageng di sele. Ditsela tse dingwe tsa go atolosa bodiredi jwa gago ke go ithuta puo e sele kgotsa go ya go direla kwa tlhokafalo e leng kgolwane gone.
6. Rotlhe re ka thaya jang motheo o o molemo wa isagwe?
6 Ke boammaaruri gore ga se botlhe ba ba ka kgonang go tsenela ditshiamelo tseno tsa tirelo, mme mongwe le mongwe wa rona a ka kgona go direla Jehofa ka bojotlhe. (Math. 22:37) Go sa kgathalesege gore maemo a gago a ntse jang, dira gore go direla Jehofa e nne selo se se botlhokwa mo botshelong jwa gago. (Pes. 16:5) Fa o dira jalo, o tla bo o thaya motheo o o molemo wa isagwe.