Re ka Thusa Jang Balekane ba Lenyalo ba e Seng Basupi?
1 Batlhanka ba le bantsi ba ga Jehofa ba nyalane le batho ba ba botsalano mo bakaulengweng e bile ba kgatlhegela phuthego mme ba sa batle go nna batlhanka ba Modimo. Monna mongwe yo o nyetseng o ne a dumela jaana: “Go akanya fela gore ke tshwanetse go tsamaya ka ntlo le ntlo e ne e le sekgoreletsi se segolo mo go nna.” Ba bangwe ba ka ne ba tlhoka go tlogela mekgwa mengwe e e seng ya Dikwalo, kana ba ka nna ba ikutlwa gore le ka motlha ba ka se kgone go lepalepana le go nna ba tshwaregile mo ditirong tsa puso ya Modimo tse balekane ba bone ba di dirang. Re ka ba thusa jang?
2 Bontsha Gore O a Ba Kgatlhegela: Go kgatlhegela ba bangwe ka namana le go lemoga dilo tse ba tshwenyegileng ka tsone go ka ba thusa go amogela boammaaruri jwa Baebele. (Bafil. 2:4) Batho bangwe ba pele ba neng ba se mo tumelong e e tshwanang le ya balekane ba bone ba lenyalo gantsi ba bua ka tsela e Basupi ba bangwe ba neng ba ba kgatlhegela ka yone. Monna yo o nyetseng yo o umakilweng pelenyana o tlhalosa jaana: “José, yo e leng mogolwane mo phuthegong, o ne a nkgatlhegela ka tsela e e kgethegileng. Ke akanya gore ke kgothatso ya gagwe e e neng ya dira gore kgabagare ke simolole go ithuta ka tlhoafalo.” Monna yo mongwe yo o nyetseng o gakologelwa gore bakaulengwe ba ba neng ba mo etela ba ne ba dira maiteko a go bua le ene ka dilo tse ene a di kgatlhegelang. O ne a re: “Ke ne ka simolola go leba tumelo [ya mosadi wa me] ka tsela e e farologaneng gotlhelele. Ditsala tsa gagwe e ne e le batho ba ba botlhale ba ba kgonang go tlotla ka dilo tse di farologaneng.”—1 Bakor. 9:20-23.
3 Ba Neye Thuso E ba E Tlhokang: Balekane ba lenyalo ba e seng Basupi ba ka kgatlhwa gape le ke thuso e e lorato e ba e newang. (Dia. 3:27; Bagal. 6:10) E ne ya re fa koloi ya monna mongwe yo o nyetseng yo e seng Mosupi e senyega, Mosupi mongwe yo mosha o ne a mo thusa. Monna yono o gakologelwa jaana: “Seno se ne sa nkgatlha tota.” Mokaulengwe yo mongwe o ne a fetsa letsatsi lotlhe a thusa monna yo le ene e seng Mosupi yo o neng a nyalane le kgaitsadi mongwe go agelela jarata ya gagwe. Ba ne ba nna ditsala fa ba ntse ba bereka e bile ba tlotla mmogo. Dibeke tse pedi morago ga moo, monna yoo o ne a raya mokaulengwe yono a re: “E setse e le nako ya gore ke dire diphetogo dingwe mo botshelong jwa me. A o ka rata go ithuta Baebele le nna?” O ne a gatela pele ka bonako mme gone jaanong ke Mosupi yo o kolobeditsweng.
4 Fa re ntse re batla batho ba ba tshwanelegang mo tshimong ya rona, a re tsweleleng go thusa batho ba ba nyalaneng le badumedi mmogo le rona.—1 Tim. 2:1-4.