Ntshetsa Jehofa Ditebogo ka Ntlha ya Bopelonomi Jwa ga Gagwe Jwa Lorato
Go Ketekwa ga Loso Lwa ga Keresete ka March 24
1. Jehofa o re bontshitse bopelonomi jwa lorato jang?
1 Mopesalema o ne a bolela jaana: “A batho ba ke ba ntshetse Jehofa ditebogo ka ntlha ya bopelonomi jwa gagwe jwa lorato le ka ntlha ya ditiro tsa gagwe tse di gakgamatsang mo go bomorwa batho.” (Pes. 107:8) Bopelonomi jwa Modimo jwa lorato ga se go utlwela batho ba gagwe botlhoko fela. Seno se bonala sentle mo mafokong a a tlhotlheleditsweng a a bakwang ka one a a reng: “Bopelonomi jwa gago jwa lorato, wena Jehofa, bo ne jwa nna jwa ntshegetsa.” (Pes. 94:18) A bo Jehofa a ile a re bontsha bopelonomi jo bogolo jwa lorato jang ne ka go re ntshetsa Morwawe yo o tsetsweng a le esi!—1 Joh. 4:9, 10.
2. Re ka bontsha jang gore re leboga Jehofa?
2 Jaaka Segopotso sa loso lwa ga Keresete se ntse se atamela, re ka leboga jang “Modimo wa bopelonomi jwa lorato”? (Pes. 59:17) Rotlhe re tshwanetse go ipha nako ya go tlhatlhanya ka malatsi a bofelo a fa Jesu a ne a le mo lefatsheng. (Pes 143:5) Gape go tla nna molemo go latela mmalo o o kgethegileng wa Baebele o o rulaganyeditsweng nako ya Segopotso, o o mo bukaneng ya Go Tlhatlhoba Dikwalo ka Malatsi Otlhe—2005, mme fa go kgonega, re dire le mmalo o o oketsegileng re bo re dire le dipatlisiso ka dikgaolo 112-16 tsa buka ya Monna yo Mogolo le dikgatiso tse dingwe tse di theilweng mo Baebeleng. Fa o ntse o bala ka dintlha tseno, tlhatlhanya ka tsone o bo o nwelele mo go tsone. (1 Tim. 4:15) Go ithuta Lefoko la Modimo le go rapela ga go otle fela dipelo tsa rona mme go bontsha kafa re ratang Jehofa ka gone.—Math. 22:37.
3, 4. (a) Re ka etsa jang moya o bakaulengwe ba rona ba kwa Liberia ba nang le one? (b) O ikaeletse go laletsa bomang kwa Segopotsong?
3 Rotloetsa ba Bangwe go Ntshetsa Modimo Ditebogo: Ngogola go ne go na le batho ba le 16 760 607 mo Segopotsong lefatshe ka bophara. Kwa motseng mongwe wa kwa Liberia, bakaulengwe ba ne ba kwalela kgosi ya motse go mmolelela gore ba batla go keteka Sejo sa Morena sa Maitseboa mo motseng wa gagwe. Kgosi e ne ya dumela gore bakaulengwe ba dirise lebala la kgwele ya dinao la mo motseng go tshwarela tiragalo eo mo go lone mme ya laela gore go dirwe kitsiso kaga seo mo motseng oo otlhe, a laletsa batho gore ba nne gone. Le fa go ne go na le baboledi ba le batlhano fela mo motseng oo, go ne ga nna le batho ba le 635 mo Segopotsong!
4 Ka tsela e e tshwanang, re batla go thusa batho ba le bantsi ka mo go ka kgonegang ka gone go tla go keteka Segopotso le rona. Ke ka ntlha yang fa o sa itirele lenaane la batho ba o batlang go ba laletsa? Setshwantsho se se mo tsebeng e e kafa morago ya makasine wa Tsogang! ya March 8 le Tora ya Tebelo ya March 15 se na le taletso. Re ka nna ra dirisa le ditaletso tsa Segopotso tse di gatisitsweng. Tlanya kana o kwale sentle nako le lefelo le Segopotso se tla ketekelwang gone mo taletsong, mme o neye mongwe le mongwe yo o mo laletsang nngwe ya tsone. Jaaka fa March 24 e ntse e atamela, etela gape batho ba o ba laleditseng go gopotsa mongwe le mongwe wa bone le go dira dithulaganyo tsa bofelo.
5. Re ka kgothatsa jang baithuti ba Baebele gore ba nne gone kwa Segopotsong?
5 Re ka thusa jang baithuti ba Baebele ba ba iseng ba simolole go tla dipokanong gore ba tle mo tiragalong eno le gore e ba solegele molemo ka botlalo? Dirisa metsotso e sekae mo thutong nngwe le nngwe go ba thusa go tlhaloganya botlhokwa jwa tiragalo eno. O ka bona dintlha tse di molemo mo makasineng wa Tora ya Tebelo ya March 15, 2004, tsebe 3-7 le mo bukeng ya Go Fetolana, tsebe 356-9.
6. Ke ka ntlha yang fa go le botlhokwa go amogela ba ba laleditsweng Segopotsong?
6 Amogela Baeng: Kwa Segopotsong, tlotla le batho ba ba etileng mme o dire gore ba ikutlwe ba amogetswe. (Bar. 12:13) Rulaganya go nna le batho ba o ba laleditseng, mme o tlhomamise gore ba na le Baebele le kopelo. Re tshwanetse go tsaya kgato pele go amogela ka lorato bakaulengwe le bokgaitsadi ba ba tsidifetseng ba ba dirileng maiteko a go nna gone. Go ba kgatlhegela ka lorato go ka ba thusa go simolola gape go kopanela le phuthego ka metlha. (Luke 15:3-7) Ka nako ya tiragalo eno e e botlhokwatlhokwa, e kete rotlhe re ka dira sotlhe se re ka se kgonang go kgothaletsa ba bangwe go kopanela le rona go ntshetsa Jehofa ditebogo ka ntlha ya ‘bopelonomi jwa gagwe jwa lorato jo bo gakgamatsang.’—Pes. 31:21.