Kafa o ka Fitlhelelang Mekgele ya Gago ya Semoya ka Gone
1. Ke mekgele efe ya semoya e Bakeresete ba le bantsi ba basha ba nang le yone?
1 Jaaka Mokeresete yo mosha, kwantle ga pelaelo mekgele ya gago mo botshelong e tlhotlhelediwa ke lorato lo o ratang Jehofa ka lone le mafoko a Jesu a neng a a bolelela Bakeresete botlhe a go ‘batla pele bogosi.’ (Math. 6:33) Mokgele wa gago e ka nna ya bo e le go atolosa bodiredi jwa gago ka go nna mmulatsela kgotsa go direla kwa go nang le tlhokego e kgolo ya baboledi ba Bogosi gone. Bangwe ba ka nna ba bo ba akanyetsa go ithaopela go ya go dira mo dinageng tse di farologaneng mo diporojekeng tsa go aga, go direla kwa lekaleng kgotsa go nna morongwa. A bo eno e le mekgele e e kgotsofatsang le e e molemo jang ne!
2. Ke eng se se ka go thusang go fitlhelela mekgele ya gago ya semoya?
2 Selo se se ka go thusang go fitlhelela mekgele ya gago ya semoya ke go e kwala fa fatshe. Tora ya Tebelo ya July 15, 2004 ya re: ‘Kgopolo nngwe e e sa tlhomamang e nna le bokao fa o tlhopha mafoko a o ka e tlhalosang ka one. Ka jalo, o ka nna wa batla go kwala mekgele ya gago le thulaganyo e o tla e latelang gore o e fitlhelele.’ Mo godimo ga moo, fa o ntse o ipeela mekgele e mengwe e mekhutshwane mme o e fitlhelela, e ka go thusa go bona kgatelopele ya gago le go go thusa go nna o lebile fela kwa mokgeleng o mogolo o o batlang go o fitlhelela.
3. Umaka mekgele mengwe e mekhutshwane e e ka go thusang go tshwanelega go kolobediwa.
3 Mekgele e Mekhutshwane e o Batlang go e Fitlhelela: Fa o ise o kolobediwe, akanya gore ke eng se o tlhokang go se dira gore o fitlhelele mokgele oo. O ka nna wa tlhoka go tlhaloganya dithuto tsa motheo tsa Baebele botoka. Fa go le jalo, ipeele mokgele wa go ithuta buka ya Baebele e Ruta Eng? ka botlalo, o lebelele ditemana tsotlhe tse di umakilweng. (1 Tim. 4:15) Ipeele mokgele wa go bala Baebele yotlhe go simolola ka Genesise go fitlha ka Tshenolo, fela jaaka go lebeletswe gore ba ba direlang kwa Bethele le diithuti tsa Gileade ba dire. Morago ga moo, nna le thulaganyo ya ka metlha ya go bala Baebele letsatsi le letsatsi. (Pes. 1:2, 3) Akanya fela gore seo se tla go thusa go le kana kang gore o gole semoyeng! O tshwanetse go rapela go tswa pelong nako nngwe le nngwe fa o simolola le fa o fetsa go bala Baebele le go ithuta, mme ka dinako tsotlhe o leke go dira se o se ithutang.—Jak. 1:25.
4. Ke mekgele efe e mekhutshwane e Mokeresete yo o nang le mokgele o mogolo wa go ya kwa Bethele kgotsa go tsenela tirelo ya borongwa a ka ipeelang yone?
4 Fa o setse o kolobeditswe, ke mekgele efe e mengwe e o ka ipeelang yone? A o tlhoka go tokafatsa bokgoni jwa gago jwa go rera? Ka sekai, a o ka ipeela mokgele wa go nna setswerere go dirisa Lefoko la Modimo mo bodireding jwa tshimo? (2 Tim. 2:15) O ka atolosa bodiredi jwa gago jang? Ipeele mekgele mengwe e o batlang go e fitlhelela mo bogautshwaneng e e tsamaisanang le dingwaga tsa gago le maemo a gago le e e tla go thusang go fitlhelela mekgele ya gago e megolo ya mo isagweng.
5. Go ipeela mekgele go ne ga thusa mokaulengwe mongwe jang go fitlhelela mokgele wa gagwe wa go direla kwa Bethele?
5 Mongwe yo o Ileng a Atlega: Fa Tony wa dingwaga di le 19 a ne a etela ofisi ya lekala ya Basupi ba ga Jehofa, o ne a nna le keletso ya go direla kwa Bethele. Le fa go ntse jalo, tsela e a neng a tshela ka yone e ne e sa siama, e bile o ne a ise a ineele mo Modimong. Tony o ne a swetsa ka gore a dumalanye botshelo jwa gagwe le ditsela tsa ga Jehofa mme a ipeela mokgele wa gore a tshwanelegele go kolobediwa. Fa a sena go fitlhelela mokgele oo, o ne a ipeela mokgele wa go nna mmulatsela yo o thusang mme morago ga moo mmulatsela wa ka metlha, a kwala mo khalendareng ya gagwe matlha a a batlang go simolola ka one. A o ko o akanye gore o ne a itumela jang fa e ne ya re a sena go bula tsela ka nakwana a ne a lalediwa go tla go direla kwa Bethele!
6. Ke eng se se ka go thusang go fitlhelela mekgele ya gago ya semoya?
6 Le wena o ka kgona go fitlhelela mekgele ya gago ya dilo tsa semoya fa o ntse o batla pele Bogosi. Baya “ditiro tsa gago” fa pele ga Jehofa ka thapelo mme o leke ka natla go di fitlhelela.—Dia. 16:3; 21:5.