Kafa o ka Baakanyetsang go Buelela Dimakasine ka Gone
1. Ke ka ntlha yang fa go le botoka go baakanyetsa go buelela dimakasine go na le go tshwara ka tlhogo puisano e e akantshitsweng e e leng mo kgatisong ya Tirelo ya Rona ya Bogosi?
1 O ka nna wa ipotsa jaana, ‘Ke ka ntlha yang fa re tshwanetse go baakanyetsa go buelela dimakasine e re ka mo kgatisong nngwe le nngwe ya Tirelo ya Rona ya Bogosi go bontshiwa kafa re ka di buelelang ka gone?’ Le fa ba le bantsi ba lemogile gore dipuisano tseno tse di akantshitsweng di a thusa, go sa ntse go tlhokega gore re baakanyetse. Puisano e e nang le matswela mo tshimong e nngwe e ka tswa e sa tshwanele mo go e nngwe. Ka jalo, ga re a tshwanela go ikutlwa re patelesega go buelela dimakasine ka mafoko a a tshwanang le a a mo dipuisanong tse di akantshitsweng. Tota le fa re tlhopha go dirisa puisano nngwe e e akantshitsweng, go molemo go dirisa mafoko a rona.
2. Go akaretsa eng go bona gore ke setlhogo sefe se o tla se buelelang?
2 Tlhopha Setlhogo: Fa o se na go bala makasine, tlhopha setlhogo se se tshwanelang tshimo ya lona le se se go kgatlhileng thata. Go bua ka go tlhatswega pelo le ka tlhagafalo fa o buelela setlhogo go ka tlhotlheletsa mong wa ntlo gore a batle go bala makasine oo. Le fa o tla buelela setlhogo se se tla kgatlhang batho ba le bantsi mo tshimong ya lona, o tshwanetse go itse sentle ditlhogo tse dingwe tse di mo makasineng oo. Seno se tla go thusa go fetola puisano ya gago fa o kopana le mongwe yo o kgatlhegelang thata setlhogo se sengwe.
3. O dirisa ketapele efe gore o nne le matswela a a molemo?
3 Botsa Potso: Morago ga moo, baakanyetsa ka kelotlhoko mafoko a o tla simololang ka one. Ketapele ya gago e botlhokwa. Go ka nna molemo go botsa mong wa ntlo potso e e dirang gore a akanye e le gore a kgatlhegele setlhogo se o tlhophileng go se buelela. Gantsi dipotso tse di batlang maikutlo a motho di na le matswela. Tila go botsa sengwe se se ka tlhabisang mong wa ntlo ditlhong kgotsa sa dira gore a nne manganga.
4. Melemo ya go balela mong wa ntlo temana fa maemo a go letla ke efe?
4 Bala Temana: Sa bofelo, tlhopha temana e o ka e balang fa maemo a mong wa ntlo a go letla, gongwe e e leng mo setlhogong se o tla se buelelang. Fa o bala temana seno se tla thusa mong wa ntlo go bona gore molaetsa wa rona o tswa mo Lefokong la Modimo. (1 Bathes. 2:13) Gape Lokwalo lo tla mo neela bosupi le fa a sa amogele dimakasine. Bangwe ba dira gore mong wa ntlo a kgatlhege ka go bala temana pele ba botsa potso e e rileng. O ka nna wa tsenyeletsa temana ka gore, “Nka rata go utlwa gore o akanya eng ka se se buiwang ke temana eno ya Baebele.” Morago ga moo bontsha motho yoo ntlha e e amanang le seo mo makasineng, o bo o akgela ka bokhutshwane go dira gore a kgatlhege pele o mo neela one.
5. O tshwanetse go gakologelwa eng fa o baakanyetsa go buelela dimakasine?
5 Ga go na melao epe e e gagametseng malebana le se o tla se buang fa o tsamaisa dimakasine. Gantsi, go molemo go dira gore puisano ya gago e se ka ya raraana le gore e nne khutshwane. Dirisa mokgwa o o ka o itumelelang le o o nang le matswela a a molemo. Tlhoma mogopolo mo molemong o mogolo wa dimakasine mme o nne matlhagatlhaga. Fa o baakanyeditse sentle, o tla nna le matswela a a molemo a go tsamaisa Tora ya Tebelo le Tsogang! mo bathong ba ba nang le “tshekamelo e e siameng ya go bona botshelo jo bo sa khutleng.”—Dit. 13:48.