O se Ka wa Felelwa ke Lorato lo o Neng O na Le Lone Pele
1 Jesu yo o galaleditsweng o ne a gakolola phuthego ya lekgolo la ntlha la dingwaga ya kwa Efeso jaana: “Ke na le seno se ke se nyatsang ka wena, gore o tlogetse lorato lo o neng o na le lone pele.” (Tshen. 2:4) Go bonala batho ba le bantsi ba ne ba feletswe ke lorato lo ba neng ba rata Jehofa ka lone pele. Fa re ne re ithuta boammaaruri, re ne ra rata Modimo le moagelani thata mme seno se ne sa re tlhotlheletsa go bolela ka tlhoafalo tsholofelo e re sa tswang go nna le yone. Ke eng se se tla dirang gore re se ka ra felelwa ke lorato lo re neng re na le lone pele le tlhoafalo mo bodireding?
2 Go Ithuta ka Namana le go Nna Teng mo Dipokanong: Ke eng se se neng sa dira gore re rate Modimo le moagelani fa re ne re simolola go ithuta boammaaruri? A e ne e se sotlhe se re ithutileng sone ka Jehofa fa re ne re ithuta Dikwalo? (1 Joh. 4:16, 19) Ka jalo, e le gore lorato lwa rona “lo tote fela thata,” re tshwanetse go tswelela pele re nna le kitso ya boammaaruri, re hukutsa “dilo tse di boteng tsa Modimo.”—Bafil. 1:9-11; 1 Bakor. 2:10.
3 Go ka nna boima go nna le thulaganyo e e molemo ya go ithuta ka namana mo metlheng eno ya bofelo e e tletseng ka dilo di le dintsi tse di tlhobaetsang le tse di itayang tsebe. (2 Tim. 3:1) Re tshwanetse go beela nako kwa thoko go iphepa ka dijo tsa semoya. Gape go botlhokwa go nna teng ka metlha mo dipokanong tsa phuthego, segolobogolo jaaka re “bona letsatsi le atamela.”—Baheb. 10:24, 25.
4 Bodiredi: Go nna le seabe mo bodireding ka tlhoafalo go re thusa go nna re na le lorato lo re neng re rata Modimo ka lone pele. Fa re ntse re rera dikgang tse di molemo, re ikgopotsa ditsholofetso tsa ga Jehofa tse di lorato, mme seno se re thusa go nna re na le tsholofelo le lorato lwa rona lo ntse lo tuka. Go ruta dithuto tsa Baebele go tlhoka gore re dire dipatlisiso gore re di tlhaloganye sentle rona ka borona, mme seno se nonotsha tumelo ya rona.—1 Tim. 4:15, 16.
5 Jehofa o tshwanelwa ke dilo tsotlhe, go akaretsa le gore re mo rate. (Tshen. 4:11) O se ka letla gore o felelwe ke lorato lo o ratang Jehofa ka lone. Nonotsha lorato lo o neng o na le lone pele ka go ithuta Baebele ka tlhoafalo, go nna gone ka metlha mo dipokanong le go bolelela ba bangwe ka tlhoafalo se o se ratang thata.—Bar. 10:10.