Go Rera go Dira Gore re Nne re Nonofile Semoyeng
1. Tiro ya go rera e re solegela molemo jang?
1 Go nna le seabe ka tlhagafalo mo tirong ya go rera go ka re nonotsha semoyeng mme ga oketsa boitumelo jwa rona. Gone ke boammaaruri gore re nna le seabe mo bodireding gore segolobogolo re itumedise Jehofa. Le fa go ntse jalo, ka go ikobela taelo ya go “rera lefoko,” re amogela masego a ga Jehofa gape re solegelwa molemo ka ditsela tse dingwe. (2 Tim. 4:2; Isa. 48:17, 18) Mme gone, go rera go ka re nonotsha jang gape go ka dira jang gore re itumele?
2. Bodiredi bo re nonotsha ka ditsela dife?
2 Re a Nonotshiwa le go Segofadiwa: Go rera go re thusa gore re tsepamise mogopolo mo masegong a Bogosi go na le go o tsepamisa mo mathateng a a leng teng gone jaanong. (2 Bakor. 4:18) Go tlhalosa dithuto tsa Baebele go nonotsha tumelo ya rona mo ditsholofetsong tsa ga Jehofa gape go dira gore re anaanele boammaaruri. (Isa. 65:13, 14) Fa re ntse re thusa ba bangwe go gola semoyeng gore ba se ka ba nna “karolo ya lefatshe,” re nonotsha seemo sa rona sa go nna re arogane le lefatshe.—Joh. 17:14, 16; Bar. 12:2.
3. Bodiredi jwa rona bo re thusa jang go tlhagolela dinonofo tsa Bokeresete?
3 Go nna le seabe mo bodireding go re thusa go tlhagolela dinonofo tsa Bokeresete. Ka sekai, go leka go “nna dilo tsotlhe mo bathong botlhe” go re thusa go nna le boikokobetso jo bo oketsegileng. (1 Bakor. 9:19-23) Fa re ntse re bua le batho ba ba “sotlegile[ng] e bile ba gasame jaaka dinku tse di se nang modisa,” re ithuta go nna kutlwelobotlhoko le go ba akanyetsa. (Math. 9:36) Re ithuta go nna le boitshoko fa re sa ineele fa batho ba sa kgatlhege kgotsa ba re ganetsa. Boitumelo jwa rona bo a oketsega fa re dirisa matshelo a rona go thusa ba bangwe.—Dit. 20:35.
4. O ikutlwa jang ka bodiredi jwa gago?
4 A bo e le tshegofatso jang ne go bo re na le bodiredi jo bo bakang Ene a le esi fela yo o tshwanelwang ke kobamelo ya rona! Bodiredi bo a re nonotsha. Bo re tlisetsa masego a mantsi fa re dira gotlhe mo re ka go kgonang go ‘neela bosupi ka botlalo ka dikgang tse di molemo.’—Dit. 20:24.