Ruta Batho Ba ba Sa Kgoneng go Bala Sentle
1. Re ka nna le kgwetlho efe mo bodireding jwa tshimo?
1 Fa re ntse re le mo bodireding jwa rona jwa tshimo mme re ruta batho boammaaruri, gantsi re nna le kgwetlho ya go ruta batho ba ba nang le bothata jwa go bala. Re ka dira eng?
2. Ke jang e bile ke ka ntlha yang fa re tshwanetse go tlotla batho ba ba sa kgoneng go bala sentle?
2 Ba Tlotle: Se se botlhokwa mo go Jehofa ke boemo jwa pelo ya motho, e seng thutego ya gagwe. (1 Sam. 16:7; Dia. 21:2) Ka jalo, ga re tseele batho ba ba sa kgoneng go bala sentle kwa tlase. Gantsi batho ba ba ntseng jalo ba tla amogela thuso ya rona fa re ba tlotla le go nna pelotelele. (1 Pet. 3:15) Seo se ka nna sa akaretsa go se pateletse motho go bala temana kgotsa serapa. Fa motho a ntse a dira kgatelopele mo go ithuteng boammaaruri jo bo botlhokwa jwa Baebele, a ka nna a tlhoafalela go tokafatsa bokgoni jwa gagwe jwa go bala gore a tle a itumelele go balela Lefoko la Modimo “kwa tlase motshegare le bosigo.”—Pes. 1:2, 3.
3. Ke mekgwa efe ya go ruta e e ka dirisiwang go ruta batho ba ba sa kgoneng go bala sentle?
3 Mekgwa ya go Ruta Batho ba ba Ithutang Baebele: Ditshwantsho di molemo thata go ruta e bile di ka thusa motho go gakologelwa se a se ithutang. O ka nna wa botsa moithuti gore o akanya eng ka setshwantsho se se mo kgatisong e lo e dirisang. Go tswa foo dirisa dipotso tse di maleba go mo thusa go tlhaloganya se setshwantsho se se rutang. Dirisa ditemana tse di rutang dintlha tse di rileng tse o batlang go di gatelela tse di mo setshwantshong. Ditshwantsho di ka nna gape tsa dirisiwa go boeletsa thuto e lo e ithutileng. O se ka wa bala tshedimosetso e ntsi ka nako e le nngwe. Gatelela setlhogo le dintlhakgolo tsa thuto mme tila go tlotla ka dintlha tse di seyong mo tshedimosetsong e lo balang ka yone. Bala ditemana ka tlhamalalo go tswa mo Baebeleng, mme o bo o dirisa dipotso go tlhomamisa gore moithuti o tlhaloganya se lo neng lo se bala. Seno se ka dira gore a eletse thata go tokafatsa bokgoni jwa gagwe jwa go bala gore a tle a itirele dipatlisiso tse di oketsegileng ka boammaaruri.
4. Re ka thusa jang motho yo re ithutang le ene go tokafatsa bokgoni jwa gagwe jwa go bala?
4 Dilo Tse di ka Thusang go Tokafatsa go Bala: Batho ba ba sa kgoneng go bala sentle kgotsa ba ba ileng ba se ka ba nna le ditshono tse dintsi tsa go ithuta go bala ka thelelo, ba ka kgona go tlhaloganya le go gakologelwa tshedimosetso sentle. O ka nna wa kgothaletsa batho ba ba ntseng jalo go dirisa dikhasete tsa dikgatiso tsa rona. Go reetsa motho yo o balang ka kelotlhoko fa a ntse a lebile mo kgatisong ya gagwe, le e leng go boeletsa mafoko ka lentswe le le kwa tlase, go tla thusa motho yoo go tokafatsa bokgoni jwa gagwe jwa go bala. A ka nna gape a fitlhela boroutšhara jwa Ineele go Bala le go Kwala bo le mosola. Mo mafelong mangwe, bagolwane ba ka nna gape ba kgothaletsa gore go nne le ditlelase tsa go ithuta go bala mo phuthegong. Dikakantsho tse di mosola tseno di ka re thusa gore re thuse batho ba ba sa kgoneng go bala sentle go tlhaloganya “mekwalo e e boitshepo,” e e ka kgonang go ba tlhalefisa gore ba bone poloko.—2 Tim. 3:15.