Lebokoso la Dipotso

◼ Ke eng fa kgang ya go golaganya dipokano tsa phuthego ka thelefouno e tshwanetse go akanyediwa sentle?

Diphuthego di le dintsi di ile tsa dira gore go kgonege gore batho ba ka dinako tse dingwe ba sa kgoneng go nna teng kwa dipokanong tsa phuthego kwa Holong ya Bogosi ka ntlha ya bolwetse kgotsa ka ntlha ya maemo a mangwe a ba sa kgoneng go a tila ba kgone go reetsa dipokano ba le kwa gae ba golagantswe ka thelefouno. Go tlhomamisa gore thulaganyo eno e e lorato e dirisiwa ke batho ba tota ba e tlhokang, go tlhoka gore kgang eno e akanyediwe sentle le go rulaganngwa ka kelotlhoko. Ka jalo, bagolwane ba ba okametseng thulaganyo e e ntseng jalo ba tla batla go rulaganya le go ela tlhoko kafa e dirisiwang ka teng gore “dilo tsotlhe di diragale ka mokgwa o montle le ka thulaganyo.”—1 Bakor. 14:40.

Bagolwane ba tla tlhomamisa gore go tlhokomelwa thata baboledi ba ba mo phuthegong ya bone ba ba nang le bolwetse jo bo sa alafegeng le bokoa jo bo rileng kgotsa ba ba sa kgoneng go tswa mo ntlong. Mmoledi yo o lwalang ka nakwana kgotsa yo o golafetseng, kgotsa moithuti wa Baebele yo o gatelang pele yo o ka tswang a sa kgone go tswa mo ntlong, le bone ba ka solegelwa molemo ke thulaganyo eno mme ba ka akarediwa mo palong ya batho ba ba neng ba le teng. Fa go se na dithelefouno tse di lekaneng go thusa ba ba tlhokang thulaganyo eno, gongwe go ka dirwa dithulaganyo tse dingwe, tse di jaaka go ba rekotela dipokano.

Gone ke boammaaruri gore ga go na sepe se se ka bapisiwang le mosola wa go nna teng ka namana kwa dipokanong tsa rona. Go kopana ga rona le bakaulengwe ba rona go dira gore re “kgothatsane” mme go thusa batho ba ba sa tswang go kopanela gore ba anaanele botlhokwa jwa go nna teng mo dipokanong. Fa re le teng kwa dipokanong, dipontsho di kgona go re solegela molemo thata, bagolwane ba kgona go thusa mongwe le mongwe wa rona mme re kgona go itemogela ka borona lorato lo logolo lwa bokaulengwe. Ruri mafoko a kgaitsadi mongwe yo o godileng a ne a le boammaaruri, yo a neng a bolela jaana morago ga go tlamparelwa fa a ne a tswa kwa Holong ya Bogosi: “O ka se kgone go bona seno mo founong!”—Bar.1:11, 12.

Gompieno jaaka Ana “yo o neng a se ke a tlhokega kwa tempeleng le ka motlha,” ba le bantsi ba bagodi ba rona ba nna teng ka metlha kwa dipokanong tsa Bokeresete fa botsogo jwa bone le maemo a bone a ba letla. (Luke 2:36, 37) Le fa gone ba dirisa thulaganyo ya go golaganngwa ga dipokano ka thelefouno fa go tlhokega, ga ba e tseye e le tsela e nngwe e e ba siametseng e e emelang go nna teng kwa Holong ya Bogosi. Ka go etsa sekao sa bone se se molemo, e kete re ka tswelela pele re itumelela go dira maiteko a go nna teng ka namana kwa dipokanong tsa rona fa re ntse re obamela Modimo wa rona yo mogolo e bong Jehofa.—Pes. 95:1-3, 6; 122:1.