“Neela Bosupi ka Botlalo”
1. Moaposetoloi Paulo o ne a tlhoma sekao sefe se se molemo mo bodireding?
1 “Dira bodiredi jwa gago ka botlalo.” (2 Tim. 4:5, Byington) Moaposetoloi Paulo o ne a naya Timotheo kgakololo eno a gololesegile. Tota e bile mo gare ga dingwaga tsa 47 le 56 C.E., Paulo o ne a setse a weditse maeto a mararo a borongwa. Buka ya Ditiro e nna e umaka go neela “bosupi ka botlalo” ga ga Paulo. (Dit. 23:11; 28:23) Re ka dira seo jang mo motlheng wa rona?
2. Re ka neela bosupi ka botlalo jang fa re rera ka ntlo le ntlo?
2 Ka Ntlo le Ntlo: Fa re ntse re leka go etela beng ba matlo ba ba iseng ba ko ba utlwe dikgang tse di molemo, re ka nna ra tshwanelwa ke go ba etela ka nako e nngwe mo go lone letsatsi leo. Rre wa mo lelapeng a ka tswa a nna teng mo gae maitseboa kgotsa ka mafelobeke fela. Re tshwanetse go leka ka natla go bua le mongwe mo ntlong nngwe le nngwe, re boele gangwe le gape kwa matlong a a neng a se na batho. Go tweng fa o sa kgona go bua le mongwe? Gongwe fa o ka kwala lekwalo kgotsa wa letsa mogala o ka nna le matswela a a molemo.
3. O na le ditshono dife tsa go neela bosupi phatlalatsa le ka nako ya fa o se mo bodireding?
3 Go Rera Phatlalatsa le ka Nako Ya fa O se Mo Bodireding: Batlhanka ba ga Jehofa gompieno ba itsise botlhe ba ba batlang go reetsa “botlhale jwa boammaaruri.” Ka dinako tse dingwe ba dira seno “mo mmileng” kgotsa “mo dipatlelong.” (Dia. 1:20, 21) Fa re dira ditiro tsa letsatsi le letsatsi, a re nna re akantse ka go neela bosupi? A go ka twe re nna re ‘tshwaregile thata ka lefoko’? (Dit. 18:5) Fa go le jalo, re diragatsa boikarabelo jwa rona jwa “go neela bosupi ka botlalo.”—Dit. 10:42; 17:17; 20:20, 21, 24.
4. Go rapela le go tlhatlhanya go re thusa jang gore re neele bosupi ka botlalo?
4 Ka dinako dingwe, re ka tshaba go neela bosupi ka ntlha ya bokoa bongwe jo re nang le jone kgotsa ka go bo re le ditlhong ka tlholego. Ga go pelaelo gore Jehofa o tlhaloganya makoa a rona. (Pes. 103:14) Fa e le gore re tshaba go neela bosupi, re ka rapela Jehofa gore a re neye bopelokgale jwa go bua. (Dit. 4:29, 31) Gape, fa re ithuta le go tlhatlhanya ka Lefoko la Modimo, re ka tlhoma mogopolo mo go nonotsheng kanaanelo ya rona ya mosola o mogolo wa dikgang tse di molemo. (Bafil. 3:8) Seno se tla re rotloetsa gore re rere ka tlhoafalo!
5. Re ka nna le seabe jang mo go diragadiweng ga boporofeti jwa ga Joele?
5 Boporofeti jwa ga Joele bo ile jwa bolelela pele gore pele ga letsatsi le legolo le le boifisang la ga Jehofa le tla, batho ba Modimo ba tla “nna ba tsamaya” e bile ba sa letle sepe go ba kgoreletsa mo tirong ya go rera. (Joele 2:2, 7-9) E kete re ka nna le seabe ka botlalo mo tirong eno ya go rera e e ka se dirweng gape!