Go Tokafatsa Bokgoni Jwa Rona mo Bodireding—Go Baakanyetsa Matseno a Rona

Lebaka La go Bo go Le Botlhokwa: Fa matseno a rona a sa tsose kgatlhego, mong wa ntlo a ka kgaotsa puisano pele re ka mo neela bosupi. Ka jalo, baboledi ba le bantsi ba tsaya matseno a bone e le karolo ya botlhokwa thata ya puisano ya bone. Le fa Tirelo ya Rona ya Bogosi le buka ya Go Fetolana di na le dikai tsa dipuisano, ga se ka metlha di nang le matseno a a feletseng, gore re kgone go fetofetoga le maemo. Tota le fa sekai sa puisano se feletse, baboledi ba ka tlhopha go fetola puisano kgotsa go itirela ya bone. Ka jalo, re tla nna le diphelelo tse di molemo le go feta fa re baakanyetsa matseno a rona ka kelotlhoko go na le go bua sengwe le sengwe fela se se tlang mo tlhaloganyong ya rona fa mong wa ntlo a bula kgoro.—Dia. 15:28.

Kafa O ka Go Dirang ka Gone:

Tlhopha kgang e o tla tlotlang ka yone. E tshwanetse ya bo e theilwe mo kgatisong e o e tsamaisang e bile e tshwanetse go kgatlha batho ba mo tshimong ya lona.
Baakanyetsa ka kelotlhoko mola wa ntlha kgotsa wa bobedi o o tla o buang fa o sena go dumedisa. O ka nna wa simolola ka go re: “Ke fano ka gonne . . . ,” “Batho ba le bantsi ba amegile ka . . . ,” “Nka rata go utlwa gore o ikutlwa jang ka . . . ,” kgotsa sengwe se sele. Mela e mekhutshwane le e e sa raraanang gantsi e nna le diphelelo tse di molemolemo. Baboledi bangwe ba tlhopha go tshwara matseno a bone ka tlhogo.
Itirele potso e e fatang maikutlo e e tla akaretsang mong wa ntlo mo motlotlong. (Math. 17:25) Gakologelwa gore a ka tswa a ne a akantse ka dilo tse dingwe pele o goroga, ka jalo potso ya gago e se ka ya nna thata kgotsa ya dira gore a inyatse.

Leka Seno mo Kgweding Eno:

Beelang nako kwa thoko mo kobamelong ya lona ya lelapa gore lo baakanyetse matseno a lona le go ikatisa.
Fa o le mo bodireding, bolelela baboledi ba bangwe gore o ikaeletse go reng. (Dia. 27:17) Fetola matseno a gago fa a sa nne le matswela.