Ithekeleng Nako E e Lo Siametseng mo Bodireding
Mo ngwageng wa tirelo wa 2014, Basupi ba ga Jehofa ba feditse diura di le 1 945 487 604 mo bodireding, e leng bosupi jwa gore re ikemiseditse go nna re tshwaregile mo tirelong ya ga Jehofa! (Pes. 110:3; 1 Bakor. 15:58) E re ka “nako e e setseng e khutshwafetse,” a re ka dirisa nako ya rona mo bodireding gore re tlotle le batho ba bantsi kafa go ka kgonegang ka gone?—1 Bakor. 7:29.
E le gore re kgone go dirisa nako ya rona ka botlhale mo bodireding, re tlhoka go fetofetoga le maemo. Ka sekai, fa e le gore o tle o fetse ura kgotsa go feta mo bodireding o sa bue le ope, a o ka dira diphetogo gore o bone batho ba ba oketsegileng le go bua le bone? Maemo a farologana go ya ka mafelo. Le fa go ntse jalo, dikakantsho tse di latelang di tla go thusa go dirisa nako ya gago ka botlhale gore o se ka wa “itaya phefo.”—1 Bakor. 9:26.
Go Rera ka Ntlo le Ntlo: E setse e le dingwaga di le dintsi baboledi ba simolola go rera ka ntlo le ntlo mo mosong. Le fa go ntse jalo, e re ka batho ba bantsi ba le kwa ditirong ka nako eo, goreng o sa rere ka ntlo le ntlo maitseboa kgotsa ka lotlatlana, fa batho ba bantsi ba le kwa magaeng a bone e bile ba iketlile? Bodiredi jwa mmila kgotsa tshimo ya kgwebo e ka nna le diphelelo tse di molemo fa go le motshegare.
Go Rera Phatlalatsa: Ditafole le dikolotsana tsa dikgatiso di tshwanetse go bewa mo lefelong le go fetang batho ba bantsi mo go lone mo tshimong ya lona. (Bona Tirelo ya Rona ya Bogosi ya July 2013, ts. 5.) Fa batho ba sa tlhole ba feta thata mo lefelong le go bewang ditafole kgotsa dikolotsana tsa dikgatiso mo go lone, Komiti ya Tirelo ya Phuthego e tla batla lefelo le lengwe le le tlhanaselang.
Maeto a go Boela le Dithuto: A o ka dira maeto a go boela le go tshwara dithuto ka dinako tse mefuta mengwe ya bodiredi e sa atlegeng thata ka tsone? Ka sekai, fa go rera ka ntlo le ntlo go atlega ka Matlhatso mo mosong, a o ka tshwara dithuto motshegare kgotsa maitseboa? Fa baboledi ba ya dipoelong, goreng ba sa ikgaoganye ka ditlhopha tse dinnye tse di tsamayang ka dikoloi gore ba fitlhelele go le gontsi mo bodireding?
Le fa gone re simolola go bala nako ya rona mo bodireding fela fa re simolola go rerela mongwe, re itumela thata fa go nna le diphelelo tse di molemo. Fa o lemoga gore go dira mofuta mongwe wa bodiredi ga go nne le diphelelo tse di molemo ka nako e e rileng, leka go dira mofuta o mongwe ka nako eo. Rapela Jehofa, “Mong wa thobo,” gore a go kaele gore o ithekele nako e e go siametseng mo bodireding!—Math. 9:38.