BOTSHELO JWA BOKERESETE
O ka Dirang Gore o Nne Moithuti yo o Tlhagafetseng wa Baebele?
A o ka rata go ikanyega fa o lekwa fela jaaka Daniele a ile a dira? Daniele o ne a bala Lefoko la Modimo ka tlhoafalo, go akaretsa le boporofeti jwa bakwadi ba bangwe. (Dan 9:2) Go tlhagafalela go bala Baebele go ka go thusa gore o nne o ikanyega. Jang? Go ka go thusa gore o dumele gore ditsholofetso tsa Modimo di tla diragadiwa. (Jos 23:14) Gape go ka dira gore o rate Jehofa le go feta le go go tlhotlheletsa go dira dilo tse di mo itumedisang. (Pes 97:10) Mme gone, o ka simolola jang? Akanya ka dikakantsho tseno tse di latelang.
Ke tshwanetse go ithuta eng? O ka simolola ka go baakanyetsa dipokano. O ka ithuta go le gontsi fa o dira dipatlisiso ka dintlha tse o sa di tlhaloganyeng go tswa mo mmalong wa Baebele wa beke le beke. Gape o ka ithuta mo go oketsegileng ka boporofeti bongwe jwa Baebele, dinonofo tse di farologaneng tse moya o o boitshepo o re thusang go nna le tsone, maeto a ga moaposetoloi Paulo fa e ne e le morongwa le ka dilo tse Jehofa a di bopileng. Fa sengwe se tla mo tlhaloganyong ya gago, se kwale o bo o se batlisisa ka nako ya fa o ithuta.
Nka bona kae tshedimosetso e ke e batlang? Leba bidio ya Didirisiwa Tse di re Thusang go Dira Dipatlisiso ka Baebele mme o bone dikakantsho dingwe tse o ka di dirisang. Go bona gore a o tlhaloganya dilo tse o di ithutang, dira dipatlisiso ka dipuso tsa lefatshe tse di emelwang ke dibatana tsa naga tse Baebele e buang ka tsone mo kgaolong ya bosupa ya buka ya Daniele.
Ke tshwanetse go fetsa nako e kana kang ke ithuta? Go ithuta Baebele ka metlha go nonotsha tumelo ya rona. Re ka simolola ka go ithuta ka nako e khutshwane mme fa go ntse go ya, re ka oketsa nako ya go ithuta. Go ithuta Baebele go tshwana le go batla matlotlo a a fitlhegileng; fa o ntse o epa o bo o a bona, ga o kitla o kgaotsa go a batla! (Dia 2:3-6) Keletso ya go batla go ithuta Lefoko la Modimo e tla nna e ntse e gola mme go ithuta Baebele e tla nna selo se o se dirang ka metlha.—1Pe 2:2.
DIBATANA TSE DI MO GO DANIELE KGAOLO 7 DI EMELA ENG?
POTSO E NNGWE:
Daniele 7:8, 24 e ile ya diragadiwa jang?
SE O KA SE ITHUTANG:
Dibatana tse di mo Tshenolo kgaolo 13 di emela eng?