Jehofa o re Thusitse go Itumelela Kabelo Epe Fela e re Neng re e Newa

Mokaulengwe le Kgaitsadi Kassholm ba ile ba ya kwa Sekolong sa Gileade ka 1979 e bile fa dingwaga di ntse di tsamaya, ba ile ba direla kwa Iran, Mauritius, Myanmar, Tanzania, Uganda le Zaire. Mokaulengwe Jack Redford yo o neng a ba ruta kwa Sekolong sa Gileade o ile a ba naya kgakololo e e ileng ya ba thusa kwa kabelong ya bone le kwa dikabelong tse dingwe tse disha tse ba neng ba di newa. A re ba kope gore ba re tlhalosetse.

Tsweetswee re boleleleng gore lo bone boammaaruri jang.

Mats: Ka nako ya Ntwa ya Bobedi ya Lefatshe fa Papa a ne a nna kwa Poland, o ile a bona boitimokanyi jo bontsi mo Kerekeng ya Katoliki. Le fa go ntse jalo, o ne a tle a re, “Go tshwanetse ga bo go na le kereke e e rutang boammaaruri!” Fa nako e ntse e tsamaya, ke ile ka lemoga gore se Papa a neng a se bua se boammaaruri. Ke ile ka reka dibuka tse dintsi tse di setseng di dirisitswe. Nngwe ya dibuka tseo e ne e le tala e bile e na le setlhogo se se reng, Boamarure jo bo Isang Botshelong jo Bosakhutleng. Setlhogo seo se ile sa nkgatlha tota, e bile ke ile ka e bala bosigo jotlhe ka bo ka e fetsa. Mo mosong, ke ne ke setse ke itse gore ke bone boammaaruri!

Fa e sa le go tloga ka April 1972, ke ile ka bala dikgatiso tse dingwe tse dintsi tsa Basupi ba ga Jehofa e bile ke ile ka bona dikarabo tsa dipotso tse ke neng ke di ipotsa. Ke ne ke ikutlwa jaaka mogwebi yo o mo setshwantshong sa ga Jesu. Fa a sena go bona perela e e tlhwatlhwakgolo, o ile a rekisa sengwe le sengwe se a neng a na le sone gore a e reke. Le nna ke ile ka dira tshwetso ya gore ke se ka ka tlhola ke ya go ithutela go nna ngaka kwa yunibesithing mme ke reke “perela” ya boammaaruri e ke neng ke e bone. (Math. 13:45, 46) Ke ile ka kolobediwa ka di10 tsa December, 1972.

Mo ngwageng o le mongwe fela, batsadi ba me mmogo le nnake le bone ba ne ba amogela boammaaruri ba bo ba kolobediwa. Ka July 1973, ke ile ka simolola tirelo ya nako e e tletseng. Mongwe wa babulatsela ba ba matlhagatlhaga ba mo phuthegong ya rona, e ne e le kgaitsadi yo montle e bile a rata Jehofa yo o bidiwang Ann-Catrin. Re ile ra ratana re bo re nyalana ka 1975. Dingwaga di le nnê tse di neng tsa latela, re ile ra nna kwa toropong e ntle e e bidiwang Strömsund kwa Sweden. Batho ba le bantsi mo tshimong eo, ba ne ba rata go ithuta Baebele.

Ann-Catrin: Papa o ile a ithuta boammaaruri fa a tloga a fetsa dithuto tsa gagwe tsa yunibesithi kwa Stockholm. Ka nako eo, ke ne ke na le dikgwedi di le tharo fela, mme o ne a ya le nna kwa tshimong Ie kwa dipokanong. Mama o ne a sa rate seo, e bile o ne a leka go batla bosupi jo bo bontshang gore Basupi ba ga Jehofa ga ba bue boammaaruri. Mme ga a a ka a atlega. Ka jalo, fa nako e ntse e tsamaya le ene o ne a kolobediwa. Ke ile ka kolobediwa ke na le dingwaga di le 13, mme fa ke na le dingwaga di le 16 ke ile ka simolola go nna mmulatsela. Fa ke sena go direla kwa Umeå kwa go neng go na le tlhokego ya baboledi ba Bogosi gone, ke ile ka nna mmulatsela yo o kgethegileng.

Fa nna le Mats re sena go nyalana, re ile ra itumelela go ruta batho ba le bantsi boammaaruri. Mongwe wa bone ke mosetsana mongwe yo o bidiwang Maivor, o ile a tlogela go tsenela metshameko gore a direle Jehofa mo go oketsegileng. Ene le nnake ba ile ba dira mmogo e le babulatsela. Ba ile ba ya kwa Sekolong sa Gileade ka 1984, e bile ke barongwa kwa Ecuador.

Ke eng se se lo thusitseng gore lo tlwaele dikabelo tsa lona le gore lo nne lo itumetse?

Mats: Gangwe le gape re ne re newa dikabelo tse disha. Sengwe sa dilo tse di ileng tsa re thusa ke go etsa Jesu, segolobogolo tsela e a neng a le boikokobetso ka yone. (Bakol. 2:6, 7) Ka sekai, go na le gore re batle gore bakaulengwe ba dire dilo jaaka rona, re ne re ithuta go di dira ka tsela e bone ba neng ba tlwaetse go di dira ka yone. Re ne re batla go tlhaloganya tsela e ba akanyang ka yone le setso sa bone. Fa re ntse re etsa Jesu, go ne go nna motlhofo gore re tlwaele maemo gongwe le gongwe kwa re neng re abetswe gone le gore re itumele.​—Pes. 1:2, 3.

Ann-Catrin: Gore setlhare se se fuduseditsweng kwa lefelong le lengwe se gole sentle, gape se tlhoka marang a letsatsi. Ka metlha, Jehofa o ile a nna “letsatsi” mo go rona. (Pes. 84:11) O ile a re naya bakaulengwe le bokgaitsadi ba ba lorato. Ka sekai, kwa phuthegong ya rona e nnye kwa Tehran kwa Iran, bakaulengwe le bokgaitsadi ba ne ba rata go amogela baeng tota, e bile ba le pelotshweu. Ba ne ba re gopotsa batho bangwe ba go buiwang ka bone mo Baebeleng ba ba neng ba rata go amogela baeng. Re ne re rata go nna kwa Iran. Mme gone, ka July 1980 tiro ya Basupi ba ga Jehofa mo nageng eo e ile ya thibelwa, e bile re ile ra laelwa gore re tswe mo nageng mo diureng di le 48. Re ile ra kopiwa gore re ye go direla kwa Zaire (e gone jaanong e bidiwang Congo) kwa Africa.

Fa ke utlwa gore re neilwe kabelo e ntšha ya gore re ye go direla kwa Africa, ke ile ka lela. Selo se se neng se ntshosa thata ke gore ke ne ke utlwetse ka dinoga le malwetse a kwa Africa. Mme gone, ditsala tsa rona tse di ileng tsa direla kwa Africa ka lobaka lo loleele di ile tsa re: “Lo se ka lwa tshoga, tsamayang lo ye go iponela. Lo tla rata Africa!” Go ile ga nna fela jalo. Bakaulengwe le bokgaitsadi ba kwa Africa ba lorato tota. Tota e bile, dingwaga di le thataro moragonyana fa re tshwanelwa ke go tswa kwa Zaire ka gonne tiro ya rona e thibetswe, ke ile ka smaela tota fa ke lemoga gore ke ne ke rapela Jehofa ke mo kopa gore re se ka ra tswa kwa Africa.

Ke dilo dife tse lo ileng lwa di itumelela fa dingwaga di ntse di tsamaya?

Mats: Re ile ra itumelela go tsalana le barongwa ba ba neng ba tswa kwa dinageng tse dingwe e bile ba godisitswe ka ditsela tse di farologaneng. Gape mo dikabelong dingwe, re ne re itumelela go tshwara dithuto tse dintsi tsa Baebele. Ka dinako dingwe, mongwe le mongwe wa rona o ne a tshwara dithuto di ka nna 20! Ga nka ke ka lebala lorato le tsela e bakaulengwe le bokgaitsadi ba kwa Africa ba neng ba amogela baeng ka yone. Fa re ne re etela diphuthego tsa kwa Tanzania, re ne re phaka khombi ya rona ya Volkswagen e re neng re robala mo go yone gaufi le matlo a bone. Ba ne ba itumelela go re abela “go feta se ba neng ba se kgona.” (2 Bakor. 8:3) Selo sa botlhokwa se re neng re se itumelela, e ne e le nako ya go tlotla ka maitemogelo. Maitseboa mangwe le mangwe ka nako eo, nna le Ann-Catrin re ne re tlotla ka se se diragetseng mo letsatsing leo re bo re leboga Jehofa go bo a re tlhokometse.

Ann-Catrin: Nna ke itumeletse go itse bakaulengwe le bokgaitsadi ba ba tswang kwa dinageng tse di farologaneng. Re ile ra ithuta dipuo tse dingwe, go akaretsa Se-Farsi, Se-French, Se-Luganda le Se-Swahili, gape re ile ra ithuta ka ditso tse dingwe. Mo godimo ga moo, re ile ra thusa go katisa bakaulengwe le bokgaitsadi ba e neng e le gone ba tsenang mo phuthegong, ra dira ditsala le go itumelela go direla Jehofa le bone re “le seoposengwe.”​—Sefa. 3:9.

Gape re ile ra bona dilo di le dintsi tse dintle tse Jehofa a di bopileng. Nako le nako fa re newa kabelo e nngwe, go ne go nna jaaka e kete Jehofa o tsamaya le rona mme o re bontsha tsela e re tshwanetseng go tsamaya ka yone. O ile a re ruta dilo di le dintsi tse re neng re ka se di itse fa e ne e se ka ene.

Ke dikgwetlho dife tse lo ileng lwa kopana le tsone, mme ke eng se se lo thusitseng go itshoka?

Mats: Ka dinako dingwe re ne re tle re tshwarwe ke malwetse a a farologaneng a a jaaka malaria. Gape Ann-Catrin o ile a tshwanelwa ke go dira dikaro ka tshoganyetso. Mo godimo ga moo, re ne re tshwenyegile ka batsadi ba rona ba ba neng ba tsofala, e bile re lebogela gore nnake le bomonnawe Ann-Catrin ba ile ba thusa go tlhokomela batsadi ba rona. Ba ile ba dira jalo ka lorato, ba le pelotelele e bile ba itumetse. (1 Tim. 5:4) Le fa gone re ne re dira sotlhe se re ka se kgonang go ba tlhokomela le fa re ne re le kgakala, ka dinako dingwe re ne re ikutlwa molato e bile re eletsa e kete re ka dira mo go oketsegileng go ba thusa.

Ann-Catrin: Ka 1983 fa re ne re direla kwa Zaire, ke ile ka lwala thata ke tshwerwe ke bolwetse jwa kholera. Ngaka e ile ya raya Mats e re: “Dira gore lo lale lo dule mo nageng eno gompieno!” Mo letsatsing le le latelang, re ile ra ya kwa Sweden ka sefofane sa dithoto se e neng e le sone fela ka nako eo.

Mats: Re ne re akanya gore go ile fela jalo ka kabelo ya rona ya borongwa. Ka jalo, re ile ra lela mo go botlhoko. Le fa ngaka e ne e re boleletse gore Ann-Catrin o ne a ka se ka a fola, o ile a fola. Ngwaga moragonyana, re ile ra kgona go boela kwa Zaire. Mme mo lekgetlong leno, re ile ra ya kwa phuthegong e nnye ya Se-Swahili kwa Lubumbashi.

Ann-Catrin: Fa re ne re le kwa Lubumbashi, re ile ra tlhokafalelwa ke ngwana a ise a tsholwe. Ke boammaaruri gore re ne re sa dira tshwetso ya go nna le ngwana. Mme loso lwa gagwe lo ile lwa nkutlwisa botlhoko fela thata. Le fa go ntse jalo, mo nakong eo e e thata Jehofa o ile a re gomotsa ka tsela e re neng re sa e lebelela. Re ile ra tshwara dithuto tsa Baebele tse dintsi go feta tse re neng re di tshwara pele ga foo. Ngwaga o ise o fele, phuthego ya rona e e neng e na le baboledi ba le 35 e ile ya gola mme ya nna le baboledi ba le 70. Ba ba neng ba tla dipokanong, ba ile ba oketsega go tswa go 40 go ya go 220. Re ne re nna re tshwaregile mo tshimong, e bile tsela e Jehofa a neng a re segofatsa ka yone e ne ya nkgomotsa fela thata. Re sa ntse re akanya e bile re bua ka loseanyana lwa rona, e bile re lebile pele fa Jehofa a tla bo a tlosa kutlobotlhoko ya rona gotlhelele kwa paradaiseng.

Mats: Nako nngwe, Ann-Catrin o ile a simolola go nna le letsapa le le tseneletseng. Nna ke ile ka tshwarwa ke kankere ya mala e e neng e tlhoka gore ke dirwe karo e e masisi. Mme gone jaanong ke ikutlwa botoka, Ann-Catrin le ene o dira sotlhe se a ka se kgonang mo tirong ya ga Jehofa.

Re ile ra lemoga gore ga se rona fela ba re nang le mathata. Morago ga gore batho ba le bantsi ba bolawe kwa Rwanda ka 1994, re ile ra etela bakaulengwe le bokgaitsadi ba le bantsi ba ba neng ba le kwa dikampeng tsa batshabi. Tumelo ya bone, boitshoko le tsela e ba neng ba abelana dilo ka yone, e ile ya re ruta gore Jehofa o kgona go thusa batho ba gagwe go itshokela teko epe fela e ba ka lebanang le yone.​—Pes. 55:22.

Ann-Catrin: Kgwetlho e nngwe e re ileng ra lebana le yone, ke fa re ne re ile kwa ofising ya lekala ya kwa Uganda e e neng e kgakolwa ka 2007. Morago ga thulaganyo eo, re ile ra tsamaya le barongwa le bakaulengwe le bokgaitsadi ba ba neng ba direla kwa Bethele ba ka nna 25 re ya kwa Nairobi kwa Kenya. Pele re goroga kwa molelwaneng wa Kenya, lori nngwe e ile ya tla e lebagane le rona e bo e re thula. Mokgwetsi le bakaulengwe le bokgaitsadi ba le batlhano ba ile ba tlhokafalela teng fela foo. Kgaitsadi mongwe o ile a tlhokafala moragonyana kwa bookelong. Ruri re lebile pele go bona ditsala tsa rona gape!​—Jobe 14:13-15.

Fa nako e ntse e tsamaya, ke ile ka fola morago ga kotsi eo. Mme nna le Mats le bapalami ba bangwe ba le mmalwa, re ne re sa ntse re tlhobaela ka ntlha ya se se ileng sa direga (post-traumatic stress disorder). Seo se ne se ntiragalela bosigo, ke ne ke phadimoga ke utlwa e kete pelo ya me e a ema. Go ne go tshosa tota. Mme gone, go rapela le go bala ditemana dingwe tse re di ratang go ne go re thusa fela thata. Gape re ile ra thusiwa ke dingaka. Gone jaanong ga re sa tlhole re tlhobaela thata, e bile re kopa Jehofa gore a re thuse go gomotsa ba ba nang le bothata joo.

Fa lo ne lo re tlhalosetsa gore lo ile lwa lebana le maemo a a thata jang, lo ile lwa re Jehofa o ne a lo tshwere jaaka mae. Lo ne lo raya jang?

Mats: Ka Se-Swahili go a tle go twe, “Tumebebwa kama mayai mabichi,” mo go rayang “Re ne re tshwerwe jaaka mae.” Fela jaaka motho a tshwara mae ka kelotlhoko gore a se ka a thubega, Jehofa le ene o ne a re ema nôkeng mo kabelong nngwe le nngwe e re neng re e newa. Ka metlha, Jehofa o ne a re naya se re neng re se tlhoka, tota mma ke re, se se fetang se re neng re se tlhoka. Gape tsela e Setlhopha se se Laolang se ileng sa re utlwela botlhoko ka yone, e ile ya re bontsha gore Jehofa o a re rata le gore o re ema nôkeng.

Ann-Catrin: A ke go tlotlele sengwe se se diragetseng se se ileng sa bontsha gore Jehofa o a re tshegetsa. Letsatsi lengwe, re ile ra amogela mogala re bolelelwa gore Papa o kwa bookelong e bile o lwala fela thata kwa Sweden. E ne e le gone Mats a tswang mo diphateng tse di bolelo tsa malaria, mme o ne a sa ntse a le bokoa. Re ne re se na madi a go reka dithekete tsa sefofane gore re ye gae. Ka jalo, re ile ra dira tshwetso ya gore re rekise koloi ya rona. Mme gone, re ile ra amogela megala e mebedi. Wa ntlha o tswa kwa banyalaning bangwe ba ba neng ba utlwile ka mathata a a re tlhagetseng, e bile ba ne ba batla go re duelela thekete e le nngwe ya sefofane. Mogala o mongwe o ne o tswa kwa kgaitsading mongwe yo o godileng, yo o neng a beile madi mo lebokosong le a neng a le kwadile mafoko a a reng, “Fa mongwe a tlhoka thuso.” Mo metsotsong e se kae, Jehofa o ile a re thusa gore re bone dithekete tse re neng re di tlhoka!​—Baheb. 13:6.

Lo ithutile eng mo dingwageng di le 50 tse lo di feditseng lo le mo tirelong ya nako e e tletseng?

Ann-Catrin: Ke ile ka ithuta gore re tla nna le maatla fa ‘re nna re ritibetse e bile re tshepa’ Jehofa. Fa re tshepa Jehofa, o a re lwela. (Isa. 30:15; 2 Ditir. 20:15, 17) E re ka re ile ra dira sotlhe se re ka se kgonang mo kabelong nngwe le nngwe e re neng re e newa, Jehofa o ile a re segofatsa go feta kafa re neng re akanya ka gone.

Mats: Sengwe sa botlhokwa se ke ithutileng sone, ke go ikaega ka Jehofa mo go sengwe le sengwe le go bona kafa a tla nthusang ka gone. (Pes. 37:5) Ga a ise a ko a tsamaye a ntshwabise. Le gompieno, re sa ntse re bona tsela e a re thusang ka yone fa re ntse re direla mo Bethele ya Myanmar.

E kete basha botlhe ba ba batlang go oketsa tirelo ya bone ba ka bona lorato lo lo sa kgaotseng lo Jehofa a re bontshitseng lone. Re tlhatswegile pelo gore ba tla dira jalo fa ba letla Jehofa gore a ba thuse go tlwaela dikabelo dipe fela tse ba di newang le gore ba di itumelele.