Lorato Lwa Bokeresete ka Dinako Tsa Mathata

DITHOROMO tsa lefatshe, dikgwanyape le makgwamolelo, ke dilo tse gantsi di tlhorontshang matshelo a batho kwa Indonesia. Ka dinako tsa masetlapelo, batho ba ga Jehofa ba nna bofefo go thusa ba ba amegileng, bogolo jang bakaulengwe le bokgaitsadi ba bone. Ka sekai, ka 2005 thoromo ya lefatshe e ne ya kgautlhanya Gunungsitoli, e leng toropo e kgolo e e mo setlhaketlhakeng sa Nias, kwa Sumatra Bokone. Diphuthego tse di kwa setlhaketlhakeng se se gaufi sa Sumatra, ga mmogo le ofisi ya lekala di ne tsa nna bonako go romela dilwana tsa namolo kwa mafelong a a amegileng. Molebedi wa potologo le moemedi wa ofisi ya lekala, ba ne ba ya kwa setlhaketlhakeng seno go ya go kgothatsa bakaulengwe. Mogolwane mongwe wa kwa Nias, e bong Yuniman Harefa o ne a re: “Batho ba ne ba feditswe maatla ke letshogo. Le fa go ntse jalo, go bo phuthego ya Modimo e ile ya tsibogela seemo seno ka bonako go ne ga re tlhomamisetsa gore ga re nosi.”