Dikgatiso tsa Mahala

MAKWALODIKGANG a mahala kwa Borithane a dira madi a lotseno a a bonwang ka ntlha ya go phasalatsa a diranta di le dimilione di le makgolo a le mantsi ka ntlha ya go anamisa dikaelo tsa tsone di le dimilione di le masomesome mo bekeng nngwe le nngwe. Diphelelo tsa seo ke selelo se se botlhoko se se tswang mo go bao ba neng ba dira dipolelelopele tseo di neng di kgala seno mo dingwageng di le 20 tse di fetileng. “Batho ba ne ba kgwa kgopolo ya gore o ka phasalatsa mo sengweng seo eleng sa mahala mathe,” Ian Locks o ne a akgela jalo, yoo eleng mokaedikhuduthamaga wa Lekgotla la Makwalodikgang a Mahala. Mme lefa go ntse jalo, tota, “seno se buletse makwalodikgang a mahala a methalethale, dimakasine tsa mahala tsa methalethale le dipampitshana tsa mahala tsa methalethale tsela jaaka mokgwa o mosha wa ditshono tsa go dira kgwebo,” o ne a tlatsa ka go rialo.

Le dimakasine? Ee. Dimakasine tse di fetang 400 tse di farologaneng di fiwa batho mahala kwa United Kingdom, le tsone di anamisiwa ka dimilione di le masomesome. Ditlhotlhwa tse di kwa tlase tseno di ile tsa ngoka baphasalatsi go tswa kwa makwalongdikgang a a tlwaelegileng a lefelo, ao bontsi jwa one a sa tlholeng a le gone kana ao ka boone jaanong a fiwang batho mahala. The Times ya kwa London e tlhalosa tiragalo eno e re ke “maatla a masha a a boitshegang mo madirelong a go gatisa a kwa Borithane,” eleng ao a tlileng go nnela ruri a le teng.