Kgopolo E E mo Bibeleng
Ke Ka Ntlha Yang Fa Re Tshwanetse go Ithuta Bibela?
GO BALA Bibela yotlhe ga se tiro e potlana. A o setse o ile wa e bala yotlhe gangwe fela kana a gongwe o ile wa e bala makgetlo a le mantsi? Ka phepafalo batho ba le bantsi ba ipelafatsa ka go bo ba setse ba dirile jalo. Go bona nako ya go bala Bibela go tshwanetse ga bewa mo dilong tse di botlhokwa—gongwe ya nna gone ga ntlha—mo lenaneong la rona la dilo tse di botlhokwatlhokwa. Ka lebaka la eng? Gore re itse dilo tsa konokono tse di mo teng ga buka eno e e ileng ya anamisiwa ka mo gogolo go di gaisa tsotlhe mo hisitoring yotlhe, eo eleng yone fela buka e go bolelwang ka tshwanelo fa e tlhotlheleditswe ke Modimo.—2 Timotheo 3:16.
Lefa go ntse jalo, motho a ka dira mo go oketsegileng go feta go bala Bibela fela le go itse dintlhakgolo tsa yone ka kakaretso. A o rata go itumedisa Modimo le go ipelela melemo e mentsi ya dithuto tsa buka eo e e boitshepo? He latela kgakololo eno e moaposetoloi Paulo a neng a e neela Timotheo yo mmotlana: “U tlhōkōmèlè go bala, le go laea, le go ruta, . . . U tlo u tlhōahalè mo diloñ tse; u ineèlè mo go cōna ka boyotlhe yoa gago; gore bocwèlèlō pele yoa gago bo bōnatshègè mo go botlhe. U ipōnè, u bo u bōnè le go ruta ga gago. U nnèlè rure mo diloñ tse; gonne ka go diha yalo u tla bo u ipoloka u ba u boloka ba ba gu utlwañ.”—1 Timotheo 4:13, 15, 16.
Go tlhatlhanya ka tsela e e ntseng jalo ka dithuto tsa Bibela le go nna o tlhomile mogopolo mo go tsone ga go akaretse go bala Dikwalo fela. Go bala Bibela ka bogone fela ga go tlhomamise gore motho yo o dirang jalo a ka kgona go dirisa tshedimosetso eo ka tshwanelo e a e boneng, fela jaaka fa go bala buka nngwe e e buang ka boboko jwa motho go se kake ga go dira gore o tshwanelegele go nna ngaka e e arang ya boboko. Ka jalo, reetsa kgakololo eno ya ga Paulo e e oketsegileng eo a ileng a e naya Timotheo: “U tlhōahalèlè go ichupa u le molebosègi mo Modimoñ, u le modihi eo o senañ go tlhaywa ke ditlhoñ, u bua lehoko ya boamarure ka tshiamō.”—2 Timotheo 2:15.
E Bula Tlhaloganyo
Gore re itse go dirisa Lefoko la Modimo ka botswerere go tlhokega gore re le ithute. Fa motho a ithuta Bibela ka kelotlhoko, a akanya ka seo e se bolelang, a se tlhaloganya, a bala dikarolo tse di dikologileng temana e e rileng, a tlhaloganya ditiragalo tse di amanang nayo, go tswa foo a ka nna le tlhaloganyo ya go lemoga dilo ka tsela eo a neng a sa e lebelela. Jaanong o simolola go bona melemo ka namana go tswa mo Lefokong la Modimo.
A re ko re tseyeng sekai sengwe se se bontshang gore re ka nna ra se ka ra lemoga bokao jwa seo le se bolelang, fa re bala karolo eo fela ya Lekwalo re sa bale ditemana tseo di e dikologileng. Mo go Ditihō 17:11 re bala jaana malebana le batho ba motse wa Gerika wa Berea, oo o neng o se kgakala le kwa Thesalonika: “Bōnè ba ne ba tsalegile bogolo go ba ba kwa Thesalonika, ka ba amogetse lehoko ka pelo e e etleetsegileñ, ba lotolotsa mo dikwaloñ ka malatsi aotlhe, ha dilo tse di nntse yalo.”
Ka bofefo fela morago ga go bona seno re ka nna ra fetsa ka gore Bakeresete ba kwa Berea ba ne ba tlhagafetse mo go ithuteng go gaisa bao ba neng ba le kwa Thesalonika. Lefa go ntse jalo, ela tlhoko gore mo temaneng ya 10 ya Ditihō kgaolo 17 Paulo le Silase e ne ya re ba fitlha kwa Berea ba tsena “mo tluñ ya thutō ea Bayuda” go ya go rera Lefoko la Modimo gona. Mme temana ya 12 e bolela gore ba “bantsi ba bōnè [Bajuda] ba dumèla.” Temana eo e re thusa gore re dire tshwetso nngwe e e farologaneng ka yone. Polelo eno e e boitshepo e re bolelela gore batho ba ba neng ba tshwantshanngwa mo metseng eno e mebedi e ne e se Bakeresete, mme, go na le moo, e ne e le Bajuda ba ba neng ba nna mo mafelong ao.
Mo godimo ga moo, a o lemogile seo se neng sa dira gore Baberea ba nne le mokgwa o o tlotlegang ono? Ba ne ba lotolotsa mo Dikwalong ka tlhoafalo. Fa Moporofesara Archibald Thomas Robertson a ne a akgela malebana le mafoko ano mo bukeng ya Word Pictures in the New Testament, o ne a kwala jaana: “Paulo o ne a tlhalosa Dikwalo ka bophara ka malatsi otlhe fela jaaka a ne a dira kwa Thesalonika, mme lefa go ntse jalo Baberea, go na le gore ba ganane le tsela ya gagwe e ntšha ya go tlhalosa dikwalo, ba ne ba lotolotsa (anakrinō le raya go sefa, go dira patlisiso ka kelotlhoko le ka tshwanelo jaaka e e dirwang mo dithulaganyong tsa semolao . . . ) mo Dikwalong ka bobone.” Ba ne ba sa okole fela fa godimo fa ba ne ba lotolotsa jalo. Bajuda bao ba Berea ba ne ba batlisisa ka kelotlhoko gore ba tiisetse gore seo Paulo le Silase ba neng ba se ruta go tswa mo Dikwalong kaga Jesu gore e ne e le ene Mesia yo o neng a sa bolo go bolelelwa pele e ne e le boammaaruri.
Ka gone, fa re latela sekao sa Baberea ba bogologolo, go botlhokwa gore re se ka ra bala Lefoko la Modimo fela mme gape re tshwanetse ra le ithuta—re “lotolotsa mo dikwaloñ”—e le gore re bone bokao jwa seo se bolelwang. Ka tsela eno re tla kgona go oketsa kanaanelo ya rona mo Bibeleng, mme le rona re nne batho ba ba kgonang go ‘ipoloka re bo re boloka le bao ba re reetsang,’ fela jaaka Timotheo a ne a dira. Ka ntlha yang? Ka gonne, mo godimo ga go bala Dikwalo, re ile ra di ithuta e le gore re dire tumalanong le seo re se ithutileng.—Diane 3:1-6.
Motswedi wa Ditekanyetso tsa Mmatota le Boperofeti
A re ko re sekasekeng mabaka a mangwe a mabedi a go bo re ithuta Bibela. Bibela ga e phalwe ke buka epe mo go neeleng ditekanyetso tsa boitsholo le tsa boitshwaro. Mo dingwageng tse dintsintsi tse di fetileng, mokaedi mongwe mo go tsa thuto kwa Amerika o ne a akgela jaana: “Ke dumela gore go nna le kitso ya Bibela mme o sena thuto ya kholetšhe go botlhokwa go feta fa o na le thuto ya kholetšhe mme o sena ya Bibela.” Gore thuto ya Bibela e nne letlotlo la gago, boikaelelo jwa gago jwa go ithuta Dikwalo e tshwanetse ya nna jwa gore o dirise melaometheo le dithuto tsa yone mo botshelong jwa gago jwa letsatsi le letsatsi e le gore e ke e kgone go go dira motho yo o botoka, ‘yo o ka buang lefoko la boammaaruri ka tshwanelo.’—2 Timotheo 2:15; Diane 2:1-22.
Mo godimo ga moo, mo gare ga ditsebe tsa yone go fitlhelwa boperofeti jo bo tlhotlheleditsweng ke Modimo joo bo setseng bo diragetse mo hisitoring mme jo bongwe bo sa ntse bo diragala mo lekgolong leno la rona la dingwaga. Go ithuta ka boperofeti jwa Bibela go thusa motho gore a tlhaloganye bokao jwa maemo a gompieno a lefatshe—a a ntseng jaaka dintwa, ditlala, go thubega ga malapa, bokebekwa—le kafa go ka tilwang ka gone go raraediwa ke go tlhobaela ka ntlha ya tsone. (Luke 21:10, 11, 25-28) Ka gone, dikarabo tsa Modimo di re sedimosetsa malebana le mathata a motlha wa segompieno, eleng dikarabo tseo di re senolelang gore ke nako efe eo re leng mo go yone le kafa re ka rulaganyetsang isagwe ka katlego ka gone. Dikarabo tseo di tla kwa go rona ka mosele wa setlhopha sa ‘motlhanka yo o tloditsweng yo o boikanngo le yo o botlhale,’ seo se dirisang Mokgatlho wa Watchtower jaaka sedirisiwa sa one sa go gatisa.—Mathaio 24:45-47; 2 Petere 1:19.
Pesalema 119:105 e bolela jaana: “Lehoko ya gago ke lobōnè loa dinaō tsa me, le lesedi ya tsela ea me.” Ka gone, batho bao ba ithutang mafoko a a botlhale ao a fitlhelwang mo Bibeleng ka metlha ebile ba a dirisa ba tla nna gareng ga batho bao ba tla tlhaloganyang go rata ga Modimo le maikaelelo a gagwe mme, ka go dira jalo, tselana ya bone e nne le lesedi leo le ba kaelang mo matshelong a bone a letsatsi le letsatsi le ba kaela mo boemong jwa segompieno jo bo kotsi jwa boitsholo.