O ka Dirang fa Moya wa Legano la Gago o sa Nkge Monate?

Ga twe ke selo se go ngongoregwang ka sone go gaisa tsotlhe mo lefatsheng se se amang diperesente di le 80 tsa batho ba ba godileng ka dinako tse di farologaneng. Ke selo se se tlhabisang ditlhong, se se dirang gore o tlalelwe le se se utlwisang botlhoko.

MO GO tsa kalafi go itsege thata ka gore ke, halitosis, go tswa mo lefokong la Selatine e bong halitus, le le kayang, “moya wa legano,” mme mogatlana -osis, o kaya, seemo se se sa tlwaelegang. Lefa go ntse jalo, batho ba le bantsi ba go bitsa, go nkga legano!

A legano la gago ga le nkge monate? Lefa go ka nna motlhofo gore o utlwe monkgo wa moya wa legano la batho ba bangwe, go ka nna ga se ka ga nna motlhofo gore o utlwe wa gago. Lekwalopaka la American Dental Association le le bidiwang JADA, le tlhalosa gore re na le go tlwaela moya o o nkgang bosula wa magano a rona mo e leng gore tota le batho bao “moya wa bone wa legano o nkgang bosula thata ba se keng ba lemoga fa ba na le bothata joo.” Ka ntlha ya seno, bontsi jwa rona re simolola go itse gore moya wa legano la rona o nkga bosula fa mongwe a re tlhagisa ka seo. A bo e le selo se se tlhabisang ditlhong jang ne!

Lebaka la gore ke selo se se tlwaelegileng thata ga le gomotse ka gope. Go nkga legano go tsewa e le selo se se kgopisang le se se sa batlegeng. Ka dinako tse dingwe go ka utlwisa motho botlhoko thata. Dr. Mel Rosenberg, yo e leng mookamedi wa Laboratory of Oral Microbiology kwa Yunibesithing ya Tel Aviv kwa Iseraele o tlhalosa jaana: “Fa tota motho a nkga legano kgotsa a akanya gore go ntse jalo, go ka dira gore a ikgogone mo bathong, a leke go tlhala tota le go akanya ka go ipolaya.”

Go Itsewe Eng ka go Nkga Legano?

Batsakalafi ga ba bolo go lemoga gore go nkga moya wa legano ke sesupo sa gore motho ga a itekanela sentle. Ka ntlha ya seo, fa e sale mo metlheng ya bogologolo dingaka di ile tsa dira dipatlisiso kaga menkgo ya legano la motho.

Mo e ka nnang dingwaga di le makgolo a mabedi tse di fetileng, rakhemisi wa Mofora e bong Antoine-Laurent Lavoisier, o ne a tlhama selo se go ka tlhatlhobiwang dilo tse di bopang moya wa legano la motho ka sone. Fa e sale ka nako eo, borasaense ba ile ba nna ba tlhama tse disha tse di botokanyana. Gompieno dilaboratori tsa Canada, Iseraele, Japane le Netherlands di dirisa halimeter, e e lekanyang selekanyo se moya wa legano o nkgang ka sone. Kwa New Zealand, borasaense ba dirile seteišhene se se godisang plaque, se gape se bidiwang gore ke molomo o o itiretsweng. Se na le dilo tsotlhe tse di fitlhelwang mo molomong wa motho tse di jaaka plaque, dibaketeria, tota le moya o o nkgang.a

Ka thuso ya tegenoloji ya segompieno, borasaense ba ile ba kgona go ithuta go le gontsi kaga moya wa legano la rona. Ka sekai, go ya ka makasine wa Scientific American, “gone jaanong badiradipatlisiso ba ile ba kgona go lemoga ditshedinyana tse dinnye thata tse 400 mo moyeng wa legano la motho o o siameng sentle fela.” Lefa go ntse jalo, ga se gore ditshedinyana tseno tsotlhe di tlhagisa monkgo o o bosula. Tse di ntshang monkgo o o bosula thata ke tse di nang le hydrogen sulfide le methyl mercaptan. Go ilwe ga nna ga tlhalosiwa gore digase tseno di dira gore moya wa legano la rona o nkge jaaka kgano.

Mo melomong ya batho go nna mefuta e le 300 ya dibaketeria. Tufts University Diet & Nutrition Letter ya re: “Dibaketeria tse di bakang monkgo o o maswe di rata thata dikarolo tsa legano tse di lefifi, tse di bothitho le tse di bongola.” Lefa go ntse jalo, ke mefuta e le menè fela ya tsone e gantsi e leng yone e bakang gore moya wa legano o nkge bosula. Di nna mo leganong, mme go ka direga gore o bo o sa itse maina a tsone. Ke Veillonella alcalescens, Fusobacterium nucleatum, Bacteroides melaninogenicus, le Klebsiella pneumoniae. Di ja dithatha tsa dijo, disele tse di suleng le dilo tse dingwe tse di mo leganong. Dilo tseno tse dibaketeria di di dirang di baka digase tse di nkgang bosula. Seno se tshwana le fa matlakala a bola. Lekwalopaka la bongaka jwa meno la J Periodontol le tlhalosa dilo sentle fa le re: “Gantsi go nkga moya wa legano go simologa mo leganong ka bolone ka ntlha ya go bola ga megare [fa ditshedinyana tseno di bola].” Fa motho a sa tseye kgato ka seo, tiragalo eo e ka baka go bola ga meno le malwetse a marinini.

“Dumela! Moya wa Legano la Gago o Utlwala Jang?”

Go bola gono go a gakala fa motho a robetse. Ka ntlha yang? Fa go le motshegare, legano le aga le na le mathe a a nang le asiti go sekae e bile a na le okosejene e ntsi mme seno se tlosa dibaketeria. Lefa go ntse jalo, tsela e mathe a tlhagisiwang ka yone e fokotsega mo e ka nnang ka 1/50 go feta ka tsela e e tlwaelegileng fa motho a robetse. Go ya ka fa makasine mongwe o tlhalosang ka teng, legano le le phaphaletseng “le ka nna bodiba jwa dibaketeria tse di ka fetang dimilione di le dikete tse 1 600,” mo go ka bakang “moya wa mo mosong” o o nkgang bosula.

Go ngomoga pelo le gone go ka dira gore tsela e mathe a tlhagisiwang ka yone e fokotsege o ntse o sa robala. Ka sekai, legano la motho yo o buang le setlhopha sa batho a tshogile le ka nna la phaphalala fa a ntse a bua mo go ka dirang gore moya wa legano la gagwe o nkge thata. Go omelela legano gape ke sesupo sa gore motho o tshwerwe ke malwetse mangwe.

Go nkga moya wa legano ga se ka metlha go bakwang ke se dibaketeria di se dirang mo leganong la motho. Tota e bile, ka dinako tse dingwe go nkga legano e ka nna ya bo e le sesupo sa maemo mangwe le sa malwetse mangwe a a farologaneng. (Bona bokoso e e mo go tsebe 13.) Ka ntlha ya seno, fa moya wa gago o tswelela pele o nkga o sa itse se se go bakang, go ka nna molemo gore o bone ngaka.

Gape go nkga moya wa legano go ka nna ga bo go simologa mo mpeng. Lefa go ntse jalo, seno se direga sewelo fela, ga se jaaka batho ba bantsi ba dumela. Gantsi monkgo o o bosula o fitlha mo leganong la gago o tswa mo makgwafong. Jang? Morago ga go ja dijo dingwe, tse di jaaka konofole kana dieie, di a silwa, di feta le madi a bo a di fetisetsa kwa makgwafong. Morago ga moo menkgo eo e tla bo e feta ka tselana ya khemo e tswela kwa ntle ka molomo le ka dinko. Go ya ka makasine wa Health, “dipatlisiso di ile tsa bontsha gore moya wa legano la batho bangwe o na le go nkga konofole le fa ba ne ba forogotlha maoto a bone fela ka kgolokwe ya teng kgotsa fa ba ile ba e metsa ba sa e tlhafuna.”

Go nwa dino tse di tagang le gone go ka dira gore madi le makgwafo a gago a nne le monkgo wa tagi. Fa seno se direga, ga go na sepe se o ka se dirang fa e se fela gore o lete. Menkgo ya dijo dingwe e ka tsaya diura tse 72 e le mo mmeleng wa gago.

Kafa o ka Thibelang go se Nkge Monate mo Leganong ka Teng

O ka se fedise go nkga moya wa legano ka go ja monamone e e nkgang monate fela. Gakologelwa gore gantsi go nkga moya wa legano go bakwa ke se dibaketeria di se dirang mo leganong. Motho o tshwanetse go gakologelwa gore dithathanyana tsa dijo tse di salang mo leganong di otla dibaketeria di le dimilionemilione. Ka gone, tsela nngwe e e botlhokwa ya go lwantsha go nkga moya wa legano ke go boloka legano la gago le le phepa, ka go dira jalo o tla bo o fokotsa palo ya dibaketeria. O ka dira jalo ka go tlosa dithathana tsa dijo le plaque mo menong a gago. Jang? Go botlhokwa thata gore o tlhape meno morago ga dijo le fa o ya go robala. Lefa go ntse jalo, go tlhapa meno ga se sone fela selo se o ka se dirang.

Go na le dikarolo dingwe tsa meno tse o sa kgoneng go di fitlhelela ka boratšhe. Ka jalo, go botlhokwa thata gore o tlose dithathana tsa dijo ka tlhale ya teng bobotlana gangwe ka letsatsi. Gape baitse bangwe ba akantsha gore motho a gotlhe leleme la gagwe go sekae ka boratšhe ka gonne ke mo dibaketeria di ratang go iphitlha le go tsalela teng. Gape go botlhokwa gore gangwe le gape o etele ngaka ya meno le mophepafatsi wa meno gore ba tlhatlhobe meno a gago le go tlosa bokgakga mo go one fa go tlhokega. Fa o itlhokomolosa nngwe ya dikgato tseno, moya wa legano la gago o ka nna wa nkga bosula mme fa go ntse go ya, go ka baka malwetse a a masisi a meno le marinini.

Gape go na le dilonyana tse o ka di dirang gore moya wa legano la gago o nkge monate go sekae. Nwa metsi go sekae, tlhafuna tšhunkama e e senang sukiri—dira sengwe fela se se ka oketsang mathe mo leganong la gago. Gakologelwa gore mathe a dira jaaka sephepafatsi sa tlholego sa legano se se tlosang dibaketeria e bile a a di kgoreletsa.

Diphepafatsalegano tse di rekwang di ka thusa, lefa go ntse jalo, dipatlisiso tsa bosheng jaana di supa gore o se ka wa ikaega thata ka tsone fa o lwantshana le go nkga moya wa legano. Tota e bile, go itsukula ka diphepafatsalegano tse di nang le tagi go ka dira gore legano le phaphalale. Diphepafatsalegano dingwe tse di molemo tse di rekwang di fokotsa plaque ka diperesente di le 28 fela. Ka jalo, morago ga go tsokotsa legano la gago ka sephepafatsalegano se o se ratang thata, legano la gago le ka nna la bo le santse le na le diperesente di le 70 tsa dibaketeria. Makasine wa Consumer Reports o bega gore mo metseletseleng ya ditekeletso tse di neng tsa dirwa, go ne ga lemogiwa gore “moya wa legano la motho o bowa gape o nkga morago ga metsotso e le 10 go ya go ura e le nngwe fa a sena go o tsokotsa” ka sephepafatsalegano. Tota le diphepafatsalegano tse di bogale thata tse mo dinageng tse dintsi tse motho a di newang fela fa a na le lekwalo la ngaka, di fokotsa plaque ka diperesente di le 55 fela. Morago ga diura di sekae fela, dibaketeria gape di tla bo di godile ka palo ya tsone ya pele.

Go phepafetse gore ga o a tshwanela go latlhelela dilo fela fa e le gore o batla go kganela go nkga moya wa legano. Go na le moo, o tshwanetse go ngomaela legano la gago le meno a gago ka e le didirisiwa tse di botlhokwa tse di batlang go tlhokomelwa. Babetli le bomakheneke ba ba botlhale ba somarela didirisiwa tsa bone gore di se ka tsa rusa, tsa kgoboga le go onala ka ditsela tse dingwe ka go latela ditaelo dingwe tse ba di beetsweng tsa go di tlhokomela fa ba fetsa tiro nngwe le nngwe ka tsone. Meno le legano la gago di botlhokwa go gaisa didirisiwa dipe tse batho ba di itiretseng. Ka jalo, di tlhokomele sentle ka tsela e e tshwanetseng. Ka go dira jalo, o tla dira gore moya wa legano la gago o se ka wa nkga go go ka dirang gore o tlalelwe le go tlhajwa ke ditlhong. Se se botlhokwa go feta, legano la gago le tla nna phepa e bile le itekanetse sentle.

[Ntlha e e kwa tlase]

[Lebokoso mo go tsebe 13]

Ke Eng se se Dirang gore Legano le Nkge Bosula?

Dilo tse di latelang ke mangwe a maemo, malwetse le ditlwaelo tse dintsi tse di bakang gore moya wa legano o nkge bosula:

Boronkaetise

Ntho e e sa foleng mo mpeng

Taebetese

Go nwa dino tse di tagang

Go phaphalala legano

Boladu mo makgwafong

Lesokolela (go kgobola)

Bolwetse jwa marinini

Hiatal hernias

Go se dire sentle ga diphilo

Bolwetse jwa sebete

Go nna mo sesading

Dintho tsa legano

Fa lee le tswa mo popelong

Go se tlhokomele legano sentle

Go kabala mantshwatswa

Go goga motsoko

Mefuta mengwe ya kankere

Melemo mengwe

Go bola meno

Thiibi

Ntho e e bakilweng ke go ntshiwa leino

[Lebokoso mo go tsebe 14]

Leleme la Gago le Lone le Tlhoka Tlhokomelo

Ya fa seiponeng mme o lebe leleme la gago sentle. A le magwasipa? Le siame. Lefa go ntse jalo, magwasipa ao e ka nna boago jwa dimilionemilione tsa dibaketeria. Fa dibaketeria tseno di ka tlogelwa fela, di ka dira gore moya wa legano la motho o nkge le go baka maemo mangwe a a sa siamang. Mme batho ba na le go tlhokomologa leleme ka nako ya fa ba tlhapa legano.

Dingaka tsa meno di akantsha gore motho a gotlhe bogodimo jwa leleme ka boratšhe jo bo seng thata go thibela gore moya wa legano la gagwe o se ka wa nkga. Baitse bangwe ba akantsha gore go dirisiwe segotlhaleleme. Kwa India, batho ga ba bolo go nna ba dirisa segotlhaleleme ka maikaelelo a go lwantsha go nkga moya wa legano. Bogologolo di ne di dirwa ka tshipi, mme gompieno go na le digotlhaleleme di le dintsi tsa polasetiki. Kwa mafelong mangwe o tshwanetse go ikgolaganya le ngaka ya meno gore e go neye segotlhaleleme.

[Setshwantsho mo go tsebe 15]

Mokgwa o o molemo wa go boloka legano le le phepa o akaretsa go dirisa tlhale ya teng le go tlhapa meno le leleme ka boratšhe

[Motswedi wa Setshwantsho mo go tsebe 13]

Life