Fa go Tlhaga Kotsi ya Masetlapelo

GO ILE ga diragala dikotsi tse dikgolo tsa masetlapelo mo lekgolong leno la bo20 la dingwaga mme bontsi jwa tsone e ne e le tse di bakilweng ke motho. Mme tse dingwe tsone ga se ene. Jesu Keresete o ne a bolela jaana fa a ne a bolelela pele kaga metlha ya rona: “Morafe o tlaa tsogologela morafe, le bogosi bo tsogologele bogosi; go tlaa nna meswele, le dithoromo tsa lefatshe mo mafelong mangwe le mangwe.” (Mathaio 24:7) Ke boammaaruri gore motho o tshwanetse go pegwa molato wa dintwa le tlhaelo ya dijo, mme lefa go ntse jalo ga se ene yo o bakang dithoromo tsa lefatshe. Ka tsela e e tshwanang, lefa merwalela mengwe e e bakang masetlapelo e bakilwe ke ditiro tsa motho, ga se ene yo o bakang dithoromo tsa lefatshe. Motho ga a bake ditsuatsue kana makgwamolelo.

Lefa di ka tswa di bakilwe ke eng, dikotsi tsa masetlapelo di supa kafa motho a tlhaelang ka teng, di supa go palelwa ga gagwe fa a lebane le dikotsi tse di maswe tsa masetlapelo. Lefatshe leno, legae leno la rona, gantsi le utlwala le sireletsegile e bile le nonofile. Mme fa le tshikhinngwa ke thoromo ya lefatshe, le khurumediwa ke metsi a morwalela, kana le fokiwa ke diphefo tse di maatla a e keteng go thuntshe sengwe, boikutlo joo jwa tshireletsego bo a fela.

Dikotsi tsa masetlapelo tsa tlholego di ile tsa senya thata tsa bo tsa bolaya batho ba bantsi mo lekgolong leno la bo20 la dingwaga. A seno se ka bo se ile sa tilwa? A go na le se se ka dirwang go fokotsa masetlapelo a tsone? Mongwe le mongwe wa rona a ka itshireletsa jang? A ga go na sepe se re ka se dirang fa dikotsi tseno tsa masetlapelo di diragala? A motho o tlile go tswelela a ntse a tlhaselwa ka tsela eno? Ditlhogo tse di latelang di tlile go araba dipotso tseno.