Kgopolo E e Mo Baebeleng
A Ruri Badimona ba Teng?
MO LEKGOLONG la bo17 le la bo18 la dingwaga, go ne ga nna le letsholo le le setlhogo go ralala Yuropa yotlhe la go bogisa baloi. Bontsi jwa batho ba go neng go twe ke baloi ba ne ba ketekwa setlhogo. Bangwe ba ba neng ba latofaditswe ka phoso gore ke baloi ba ne ba ipolela gore ke baloi e le fela gore ba falole go tlhokofadiwa. Go ne ga bolawa batho ba bantsintsi ka ntlha ya magatwe kana go belaelwa.
Dikgato tseno tse di neng tsa tsewa tse di kgatlhanong le boloi, e leng mokgwa mongwe wa bodimona e ne e le tse di feteletseng eleruri, le fa gone go ne go twe di theilwe mo Dikwalong. Bakeresete ga ba ise ba neelwe tshwanelo ya go keteka kana go bolaya baloi kana mongwe fela yo o dirisanang le bodimona. (Baroma 12:19) Ke boikutlo bofe jo bo anameng gompieno?
Boikutlo jo bo Repileng
Gompieno bontsi jwa batho ba Labokeresete ga ba tseye ditiro tse di ntseng jalo tsa bodimona ka tsela e e masisi. Bangwe ba ka nna ba ineela mo tepodinaleding, mo boselamoseng, mo go laoleng ka bola le mo boloing ka ntlha fela ya go rata dilo, le fa go ntse jalo, ga ba lebe ditiro tseno tsa masaitseweng e le bodimona. Ka dinako dingwe, borametlae, batshameki le boradipolotiki ba dumela phatlalatsa gore ba a tle ba dirisane le masaitseweng. Saetlopedia nngwe e bolela gore dibuka dingwe le dibaesekopo di tshwantsha baloi le batho ba ba dirisanang le badimona e le “batho ba ba kgatlhang, ba ba farologaneng go sekae ba ditiro tsa bone tse di fetang tsa tlholego di sa gobatseng ope.” Tshedimosetso e e tlhametsweng go itumedisa le go ruta bana e ka nna ya bua thata ka dilo tsa masaitseweng.
Boikutlo jo bo ntseng jalo jo bo repileng le jwa go sa itshwenye ka bodimona bo ka felela ka gore batho ba se dumele gore badimona ba teng. A o a dumela gore badimona ba teng e bile ba leka ka natla go re gobatsa? Kana e bile bontsi jwa batho gompieno ba tla bolela gore ga ba ise ba kopane le badimona kana gone go bona ditiro tsa bone. A gone mme badimona ba teng?
Go sa Dumele go Baka Kakabalo
Batho ba ba ipolelang gore ba dumela Baebele mme ba belaela gore badimona ba teng ba akabetse tota. Fa ba sa dumele gore badimona ba teng, ba bontsha gore ga ba dumele sentle se Baebele e se buang. Ka ntlha yang? Ka gonne Lefoko la Modimo e leng Baebele ke lone le rutang gore go na le dibopiwa tsa mowa tse di bosula tse di nang le maatla a a fetang a motho.
Buka ya yone ya ntlha e bong Genesise e anela kafa sebopiwa se se botlhale se neng sa dirisa noga ka teng go tsietsa Efa le go mo dira gore a tsuologele Modimo. (Genesise 3:1-5) Buka ya bofelo ya Baebele e bong Tshenolo e tlhomolola motsietsi yono yo o bosula “noga ya kwa tshimologong” e le “e e bidiwang Diabolo le Satane, yo o timetsang lefatshe lotlhe le le nang le banni.” (Tshenolo 12:9) Satane o ne a kgona go ngokela baengele ba bangwe gore ba tsuologe. (Jude 6) Mo Baebeleng baengele bano ba ba weleng ba bidiwang badimona. Ba mo lefatsheng e bile ba galefetse Modimo le ba ba mo direlang.—Tshenolo 12:12.
Satane le badimona ba na le maatla a go tlhotlheletsa, a go gobatsa le go bua le batho. (Luke 8:27-33) Ba ithutile mokgwa o motho a tshelang ka one ka dingwaga di le diketekete. Ba itse kafa ba ka dirisang makoa a motho ka teng. Baebele e bega ka makgetlho mangwe a ba neng ba tlhotlheletsa kana ba laola banna, basadi le bana gotlhelele. (Mathaio 15:22; Mareko 5:2) Ba ka baka bolwetse kana ba golafatsa mmele ka dilo tse di jaaka go foufatsa. (Jobe 2:6, 7; Mathaio 9:32, 33; 12:22; 17:14-18) Gape ba ka foufatsa ditlhaloganyo tsa batho. (2 Bakorinthe 4:4) Badimona ba nna ba le mo tirong, fela jaaka moeteledipele wa bone e bong Satane yo o jaaka “tau e e kurutlang, e e senkang go kometsa mongwe.” (1 Petere 5:8) Baebele e na le dipego di le dintsi tse di buang ka badimona. Fa e le gore o dumela Baebele, o dumela gore dibopiwa tse di sa bonaleng tsa mewa e e bosula di teng.
Batsietsi ba ba Bosula
Le fa go ntse jalo, badimona ba ba maatla ba ka nna teng jang gompieno mme ba bo ba sa boifise lefatshe? Ke ka ntlha yang fa go sa itshupe sentle gore ba teng le dilo tse ba di dirang di sa lemotshege? Baebele e araba jaana: “Satane ka boene o nna a iphetola moengele wa lesedi.” (2 Bakorinthe 11:14) Diabolo ke motsietsi. Tiro e e dirwang ke badimona gantsi e lebega e le sengwe se se seng kotsi kana se le mosola. Ke gone ka moo go leng thata go e lemoga.
Satane le badimona ba gagwe ba sa ntse ba bogisa batho ka ditsela tse di farologaneng, fela jaaka ba ne ba dira mo metlheng ya Baebele. Batho bangwe ba jaanong e leng Bakeresete ba boammaaruri ba kile ba bo ba dirisana le masaitseweng; ba a itse kafa ditlhaselo tsa badimona di boifisang ka teng. Gompieno badimona ba dirisa maatla a bone a a fetang a motho go ngokela batho mo ditirong tsa masaitseweng go feta le fa e le leng pele. Maatla a bone ga a tshwanela go tlhaediwa matlho. Le fa go ntse jalo, ba atlega thata go gogela batho kgakala le Modimo go na le go ba bogisa. Baebele e bolela gore Satane le badimona ba gagwe ba ‘timetsa lefatshe lotlhe le le nang le banni.’ (Tshenolo 12:9) Ba ikaeletse go koafatsa bomoya jwa rona ka ditsela tse di bofitlha le tse di boferefere.
Badimona ba teng. Tota e ne e ka bo e le eng se se bakang bosetlhogo jo bo kanakana jo bo aparetseng batho gompieno? Ka tlholego batho ba batla go tshela ka kagiso le ka boitumelo. Le fa go ntse jalo, badimona ba rotloetsa bosula e bile ba na le maatla a go tlhotlheletsa le go senya tlhaloganyo ya motho.
Le fa go ntse jalo, Jehofa ke Modimo mothatayotlhe—o na le maatla a a gaisang a badimona. O re neela thata le tshireletso tsa gagwe kgatlhanong “le maano a a boferefere a ga Diabolo.” (Baefeso 6:11-18) Ga go tlhoke gore re boife badimona thata, ka go bo Modimo o solofetsa jaana: “Jalo, ipeyeng mo taolong ya Modimo; mme ganetsang Diabolo, mme o tla tshaba a tswa mo go lona.”—Jakobe 4:7.
[Motswedi wa Setshwantsho mo go tsebe 16]
Sipa Icono