Ke Mang yo o Tla Sireletsang Bana ba Rona?

GO A kgothatsa go itse gore jaanong go gobolola bana go setse go amogelwa gore ke bothata mo lefatsheng lotlhe. Maiteko a a jaaka a a dirilweng ke Stockholm Congress Against Commercial Sexual Exploitation of Children, e go neng ga tla baemedi ba ba tswang kwa dinageng di le 130 mo go yone, a dirile gore bothata jono bo bewe leitlho.

Mo godimo ga moo, dinaga dingwe di setse di ntshitse molao o o thibelang bojanala jwa tlhakanelodikobo le ditshwantsho tsa tlhakanelodikobo tse go dirisiwang bana mo go tsone. Dinaga tse dingwe tsone di setse di rulaganya go nna le rekoto ya batho ba ba itsegeng ba tlhakanela dikobo le bana, di dira gore ba se ka ba kgona go kopana le bana motlhofo.

Gape go na le tse dingwe tse di senkelang bana botshelo jo bo botoka ka go ntsha molao o o ba sireletsang. Mme dinaga tse dingwe di le mmalwa le batho ba bangwe ba gana go reka dilo tse di dirilweng go berekisiwa bana ka thata.

Le fa rotlhe kwantle ga pelaelo re ema nokeng maiteko a a ntseng jalo a go fedisa go gobolola bana mo setšhabeng, re tshwanetse go leba dilo jaaka di ntse mme re amogele gore go gobolola bana go namile medi mo bathong. Go tla bo go sa utlwale go akanya gore tharabololo e e motlhofo e e jaaka go tlhoma molao e ka sireletsa bana ba rona mo go feletseng. Go setse go tlhomilwe melao e mentsi mme le fa go ntse jalo, bothata jono bo sa ntse bo le teng. Tota ke ka ntlha ya botlhokatsebe jwa bagolo ba ba mo lefatsheng go bo go tlhomiwa melao e mentsintsi jaana go sireletsa tshwanelo e bana ba nang le yone ya tlhago.

Melao ga se yone fela e e sireletsang bana. Re ka leba fela se se diregang ka molao o o tlotliwang thata o o jaaka wa lekgotla la Ditšhaba Tse di Kopaneng wa Tumalano e e Dirilweng Malebana le Ditshwanelo Tsa Bana, o dipuso di le dintsi di dumalanang nao. Go na le tshedimosetso e ntsi e e bontshang gore le e leng bontsi jwa dipuso tseno, e re ka di gateletswe thata ke maemo a ikonomi, ga di dire sepe se se kalo go emisa go sotliwa ga bana ba tsone. Go gobolola bana e sa ntse e le bothata jo bogolo mo lefatsheng lotlhe.

Batsadi ba ka Dira go le Gontsi

Go nna motsadi yo o atlegileng ke tiro e e tlhokang gore o dire ka natla. E batla go intsha setlhabelo. Mme batsadi ba ba amegang ba tlhoka go tlhomamisa gore bana ba bone ga se bone ba ba tlhaselwang. Makasine wa Maclean’s o bolela gore gantsi “go nna motsadi go tsewa jaaka e kete ke tiro ya go itlosa bodutu.” Setshamekisi se ka nna sa latlhiwa kana tiro ya go itlosa bodutu ya tlogelwa, mme go nna motsadi ke boikarabelo jo motho a bo filweng ke Modimo.

Go nna ga gago motsadi yo o molemo ke nngwe ya dimpho tse di tlhwatlhwakgolo go feta tse o ka di nayang ngwana wa gago, ka go bo go tla mo thusa go nna ngwana yo o itumetseng, yo o sireletsegileng. Tshireletso e e ntseng jalo ga e ye ka gore o nna le batho ba ba ntseng jang kana gore maemo a gago a ikonomi a ntse jang. Ngwana wa gago o a go tlhoka—o tlhoka lorato le kamego tsa gago, o tlhoka gore o mo tlhomamisetse gore o tla mo thusa fa a ikutlwa a boifisiwa e bile o tlhoka le nako ya gago. Ngwana wa gago o batla go utlwa lentswe la gago le mo tlotlela dikgang, o batla go latela sekao sa gago e bile o batla kgalemo ya gago e e lorato.

Mo kgannyeng ya boitsholo jwa tlhakanelodikobo—batsadi, laolang dikamano tsa lelapa la lona ka tsela e e tshwanetseng le e e nang le tlotlo go thusa ditlhaloganyo le mebele tsa bana ba lona. Bana ba ithuta ka bonako gore ke ditiro dife tse e reng fa motho a di dira a bo a tlola melelwane ya boitsholo e batsadi ba bone ba ba tlhometseng yone. Ba tshwanetse ba rutiwa gore ba itshware jang fa ba le mo gae le fa ba se mo gae. Fa o palelwa ke go dira seno, motho yo mongwe a ka nna a go direla sone, mme o ka nna wa se ke wa rata ditlamorago tsa gone. Ruta bana gore ba dire jang fa mongwe a ka ba tshosetsa gore ba se itshware sentle. Dira gore ba itse gore dikarolo tsa bone ba mmele tsa sephiri ke tsa eng, mme o ba rute gore dikarolo tseno ga di a tshwanelwa go dirisiwa ka tsela e e sa tshwanelang. Ba bolelele gore ba itshware jang fa mongwe a ba atamela a batla go ba dirisa ka tsela e e sa tshwanelang.

Itse ka dinako tsotlhe kwa bana ba gago ba leng teng le gore ba na le bomang. Ditsala tse di gaufi thata tsa ngwana wa gago ke bomang? Ke bomang ba ba tlhokomelang bana ba gago fa o seyo? A ba ka ikanngwa? Gone mme, seno ga se reye gore motsadi o tshwanetse go belaela mongwe le mongwe. Leba ka kelotlhoko bagolo ba ngwana wa gago a dirisanang le bone, o se felele fela ka go leba tsela e ba lebegang ka yone.

Akanya fela ka khutsafalo e e neng ya wela batsadi ba ba neng ba lemoga go setse go le thari gore bana ba bone ba ne ba ntse ba gobololwa ke baruti ba ba ikanngwang, barutabana kana le e leng maloko a a gaufi thata a lelapa. Go ka nna molemo fa wena jaaka motsadi o ka ipotsa gore, ‘A kereke ya me e letlelela kana e bipa go gobololwa ga bana? A bodumedi jwa me bo ngaparetse ka nitamo mo melaometheong e e kwa godimo ya boitsholo?’ Dikarabo tsa dipotso tse di ntseng jalo di ka go thusa gore o dire ditshwetso tse di botlhale go sireletsa bana ba gago.

Mme mo godimo ga tsotlhe, leka go ba thusa gore ba itse le go rata melaometheo ya Mmopi, e e tla ba thusang go ba sireletsa mo kotsing. Fa bana ba bona ka fa batsadi ba bone ba tlotlang melaometheo e e kwa godimo ya boitsholo ka teng, ba tla latela sekao sa bone se se molemo kwantle ga bothata.

Tharabololo e le Nngwe Fela ya Boammaaruri

Gone mme, melao le fa e le dikotlhao tse di gagametseng tsa kwa kgolegelong ga di ka ke tsa sireletsa bana ba rona. Mmopi ka boene, ka Lefoko la gagwe le le tlhotlheleditsweng e bong Baebele, a ka kgona go lere boitshwaro jo bo itshekileng, ka go fetola megopolo ya batho ba ba tshwanang le dibatana go nna batho ba ba lorato le ba ba itshotseng sentle mo setšhabeng sengwe le sengwe.

Go setse go lemosegile sentle gore seno se ka diragala. Go na le ba le bantsi ba ba tlogetseng mokgwa wa bone wa botshelo jwa bogologolo jwa boaka. Jaanong ba bontsha bosupi jo bo tshelang jo bo bontshang ka moo Lefoko la Modimo le leng maatla ka gone. Mme le fa gone seno e le kgatelopele e e siameng, bontsi jwa badirabosula ba ba feteletseng ga ba kitla ba fetoga. Ke lone lebaka le le dirang gore Jehofa Modimo a solofetse gore botlhe ba ba dirisang bana ka tsela e e sa tshwanelang ba tla tloga ba tlosiwa mo lefatsheng—mmogo le difilosofi tsa bone, dikeletso tsa bone tse di feteletseng le bopelotshetlha jwa bone.—1 Johane 2:15-17.

Ka jalo, mo lefatsheng le lesha la Modimo, fa go tla bo go sa tlhole go na le khumanego, bana botlhe ba tla ipelela nako ya bone ya go nna bana ba sa potlakisiwe e bile ba sa tshwenngwe, e leng tshwanelo e Modimo a ba neileng yone. Seno ga se ne se bolela fela bokhutlo jwa go gobolola bana mme gape bokhutlo jwa go gopola dilo tsotlhe tse di hutsafatsang tse di tlamukileng matshelo a batho: “Dilo tsa pele ga di ketla di gakologelwa, le fa e le go tla mo mogopolong.”—Isaia 65:17.

Ka jalo, mo lefatsheng le lesha la Modimo, mafoko ano a ga Jesu Keresete a tla nna le bokao jo bogolo jwa boammaaruri: “Lesang bana ba babotlana bano, lo tlogele go ba kgoreletsa go tla mo go nna, gonne bogosi jwa magodimo [jo bo busang mo lefatsheng, legae la Paradaise la motho] ke jwa ba ba ntseng jalo.”—Mathaio 19:14.

[Setshwantsho mo go tsebe 9]

Thusa bana ba gago go ithuta ka maikaelelo a Mmopi le melaometheo ya gagwe

[Setshwantsho mo go tsebe 9]

Ruta bana ba gago ka tsela e e botlhale gore ba dire jang fa ba tshosediwa ka tsa tlhakanelodikobo

[Setshwantsho mo go tsebe 9]

Go nna motsadi yo o molemo ke mpho ya botlhokwa thata e o ka e nayang bana ba gago

[Ditshwantsho mo go tsebe 10]

Mo lefatsheng le lesha la Modimo, bana botlhe ba tla ipelela bongwana jwa bone ka botlalo