‘Ba Tla Thula Ditšhaka Tsa Bone ba di Dira Magale a Megoma’—Leng?

SEFIKANTSWE se se itsegeng thata se se leng kwa dikagong tsa lekgotla la Ditšhaba Tse di Kopaneng kwa New York City se bontsha monna a thula tšhaka a e dira bogale jwa mogoma. Se dirilwe go akantswe ka boporofeti jwa Baebele jwa Isaia kgaolo ya 2, temana ya 4, le Mika kgaolo ya 4, temana ya 3. Mafoko ano a tla diragadiwa jang le gone leng?

Pego nngwe ya bosheng jaana mo go The New York Times e ne e na le setlhogo se segolo se se reng, “Go Rekisiwa ga Dibetsa mo Lefatsheng Lotlhe go Tlhatlogela go Didolara di le Dimilione di le Dikete di le 30 [diranta di le dimilione di le dikete di le 227]”! Ke bomang ba ka 1999 ba neng ba di goga kwa pele mo go rekiseng mefuta eno e mentsi ya dibetsa? United States e ne e di goga kwa pele ka go di rekisa ka madi a a kana ka didolara di le dimilione di le dikete di le 11,8 (diranta di le dimilione di le dikete di le 89). Go bo go latela Russia ka madi a a kwa tlase ga halofo ya madi ao. Le fa go ntse jalo, Russia e batlile e di rekisa ka selekanyo se se menaganeng gabedi mo ngwageng o o fetileng. Morago ga moo go ne ga latela Jeremane, China, Fora, Boritane le Italy. Pego yone eno e ne ya tswelela jaana: “Fela jaaka mo nakong e e fetileng, mo e ka nnang peditharong ya dibetsa tsotlhe di ne tsa rekisediwa dinaga tse di tlhabologang.”

Morago ga dintwa tse pedi tsa lefatshe le tse dingwe tse dintsi tse dikgolo tse di neng tsa nna teng mo lekgolong la bo20 la dingwaga, tse di neng tsa bolaya le go gobatsa batho ba le dimilione di le makgolokgolo, motho o ipotsa jaana, “Ditšhaba di tla tsamaya di ithuta kagiso leng go na le go ithuta ntwa?” Baebele e bontsha gore batho ba tla bona kagiso “go ela kwa bofelong jwa metlha.” (Isaia 2:2) Tota e bile, boporofeti jono bo setse bo diragadiwa, ka gonne Basupi ba ga Jehofa ba ka nna dimilione di le thataro ba itetleletse go ‘rutiwa ke Jehofa.’ Ka ntlha ya seo, ‘kagiso ya bone e kgolo.’—Isaia 54:13.

Go ise go ye kae, Jehofa o tla fedisa dibetsa le dintwa tsotlhe mmogo le batho ba ba di tlhotlheletsang, ka gonne o tlile go “senya ba ba senyang lefatshe.” Fa e le gore o ka rata go itse go le gontsi ka phetogo eno e kgolo, ikutlwe o gololesegile go ikgolaganya le Basupi ba ga Jehofa ba lefelo la gaeno kana o kwalele kwa atereseng e e tshwanetseng mo go tse di kwadilweng mo tsebeng ya 5.—Tshenolo 11:18.