Ditiragalo Tsa Lefatshe

◼ “Go na le bosupi jo bontsi jwa saense jo bo dumalanang le kgopolo ya go iphetogela ga ditshedi go nna tse dingwe, jo go bonalang bo le boammaaruri jo bo ka bonwang le jo bo oketsang kitso ya rona ka botshelo.”—POPE BENEDICT XVI.

◼ “Batlhankedi ba ne ba itlhaganelela . . . go ya go batla madi a go tlhatlhoba le go baakanya marogo a a ka nnang 74 000 ‘a go lebegang a sa agega sentle’ a kwa United States, morago ga gore borogo jwa tselakgolo jwa dingwaga di le 40 jwa kwa Minneapolis [Minnesota], jo bo neng bo tletse ka pharakano bo thabuele dimetara di le 18 mo Nokeng ya Mississippi mme jwa bolaya [batho ba le 13].”—THE WEEK, U.S.A.

Ba le Bantsi ba Tlola Molao

Lokwalodikgang lwa kwa Lontone lwa Times lwa re: “Tumelo ya gore go na le batho ba go tweng ke ‘bontsi jo bo ikobelang melao’ ke sengwe se batho ba batlang go se dumela. Bontsi jwa baagi ba kwa Boritane ba dumela gore ba ikobela fela melao e ba batlang go e ikobela mme ba dira jalo fa ba batla.” Patlisiso e e diretsweng Setheo sa Dipatlisiso Tsa Tlolomolao le Tshiamiso kwa King’s College kwa Lontone, e bontsha gore bontsi jwa batho ba ba tlolang molao ba tswa gare ga batho ba ba “tlotlegang” mo setšhabeng. Nngwetharong ya ba ba ileng ba bodiwa ka seno ba ntsha madi gore ba tile go duela makgetho, nngwetharong ga e buse madi fa e fiwa madi a mantsi mme nngwetlhanong ya bone e dumela gore e ile ya utswa dilo kwa tirong. Babatlisisi ba swetsa ka gore boitshwaro jono bo “supa kafa boitsholo mo setšhabeng bo senyegileng ka teng go feta thubakanyo le tlolomolao e e mo mebileng.”

A Dibetsa Tsa Nuklea di “Laolwa ke Modimo”?

Kereke ya Orthodox ya kwa Russia e ile ya segofatsa tiro e e neng e dirwa ke banna le basadi ba ba bolokang le go baakanya dibetsa tsa ntwa tsa nuklea tsa kwa Russia. Mo molaetseng o o neng wa balwa ka nako ya moletlo kwa Kerekeng e Kgolo ya Christ the Savior, kwa Moscow, mme o ne wa begiwa ke lokwalodikgang lwa Krasnaya Zvezda, tlhogo ya kereke ya Orthodox ya kwa Russia e bong Alexis II, o ne a re: “Ke rapela Modimo ke mo kopa . . . gore dibetsa tsa nuklea tse lo di dirileng mme lo filwe boikarabelo jwa go di tlhokomela di nne di ntse di laolwa ke Modimo mme e nne dibetsa tse di tla dirisediwang go tshosetsa ditšhaba tse dingwe le tsa go iphemela fa ba bangwe ba tlhasela.”

Tswina ya Dinotshe Kwa Iseraele ya Bogologolo

Hebrew University of Jerusalem Institute of Archaeology ya re: “Bosupi jwa thutamarope ya Baebele e e tlhalosang Iseraele . . . e le ‘lefatshe le le elang mashi le tswina ya dinotshe’ (kgotsa bobotlana lefatshe la tswina ya dinotshe) bo ile jwa ribololwa.” Dilo tse di ribolotsweng kwa Tel Rehov kwa Beth Shean Valley e e kwa Iseraele, ke mela e meraro e e tlhomaganeng ya mamepe a letsopa ya bogodimo jwa matlhatlhaganyane a le mararo. Pego eo ya re motshitshi ono wa dinotshe ke “wa go tloga ka lekgolo la bolesome la dingwaga go fitlha mo masimologong a lekgolo la borobongwe la dingwaga B.C.E., mme go ka direga gore di ne di na le mamepe a a ka nnang 100.” Batho ba ba ruang dinotshe ba fopholetsa gore go ka tswa go ile ga tswa “tswina ya dinotshe e e ka nnang halofo ya tone” mo lefelong leno ngwaga le ngwaga.

Diruiwa di Tla Pele

The Sydney Morning Herald e bega gore, go ya ka patlisiso nngwe ya Internet, “motho a le mongwe mo go ba le banè ba kwa Australia o bolela gore seruiwa sa gagwe ke leloko le le botlhokwa thata la lelapa, se botlhokwa go feta le molekane wa gagwe kgotsa batsadi ba gagwe.” Motho a le mongwe mo go ba le bararo ba ba ileng ba botsolodiwa mo patlisisong e e neng ya dirwa ke khampani nngwe ya tsa madi kwa Australia, o dirisa “nako e e oketsegileng le madi a a oketsegileng mo seruiweng sa gagwe go na le madi a a a dirisang mo dilong tsa kalafi ya gagwe.” Tlhokomelo ya kalafi ya seruiwa e akaretsa mokgwa wa karo e mo go yone ngaka e tsenyang sedirisiwa sengwe ka phatla e nnye mo mmeleng, mme a dirisa setshwantsho se se tswang mo sedirisiweng seno go mo thusa go alafa, go lomelela marapo, go dira kalafi ya dikhemikale, go tsenya dirwe tse dingwe, go tsenya noka e nngwe le e leng go dira karo ya boboko.