Re ka Bona Kae Kaelo?

KE MANG yo o ka re bontshang tsela ya go bona katlego ya mmatota—e seng go atlega mo dilong tse re ka nnang le tsone mme go atlega ga motho? Jaaka go tlhalositswe mo setlhogong se se fetileng, katlego ya mmatota, e tshwanetse ya akaretsa melaometheo e e siameng le go nna le boikaelelo jo bo siameng mo botshelong—dilo tse di sa ikaegang ka go tuma, go huma kgotsa go nna le tlhotlheletso mo setšhabeng.

Re ka bona kae melaometheo e re ka e ikanyang le dikarabo tsa dipotso tse di malebana le boikaelelo jwa botshelo? A re ka di iponela ka borona? Re tshwanetse ra dumela gore—e re ka re le batho ba ba sa itekanelang, re na le dikeletso tse di sa siamang tse di ka dirang gore re dire ditshwetso tse di sa siamang. (Genesise 8:21) Ka ntlha ya seo, dimilione tsa batho di tswelela di gagamalela dilo tse di sa thuseng ka sepe tse Baebele e di tlhalosang e le “keletso ya nama le keletso ya matlho le go bontsha ka mabela se motho a nang le sone mo botshelong.” (1 Johane 2:16) Eo ga se tsela e motho a ka bonang katlego ka yone mme ke tsela fela e batho ba akanyang gore ba ka e dirisa go bona katlego mme e le e e tla felelang ka go swaba le go tlhoka boitumelo. Go a utlwala he, go bo ba le bantsi ba batla kaelo ya Mmopi wa rona gore ba bone dikarabo tsa dipotso tse di botlhokwa thata tsa botshelo.a

A re Tshwanetse go Ikanya Modimo?

Ke ka ntlha yang fa go utlwala go ikanya Mmopi wa rona? O itse gore ke ka ntlha yang a re bopile, ka gone o itse gore boikaelelo jwa rona mo botshelong e tshwanetse ya nna bofe. Mme gape o itse kafa a re bopileng ka teng—mmele wa rona, mogopolo wa rona le maikutlo a rona. Ka jalo, Modimo o itse melaometheo e e molemo thata e batho ba ka tshelang ka yone. Mo godimo ga moo, Modimo ke sekao se segolo sa lorato, mme ke ka moo a batlang gore re itumele tota re bo re atlege. (1 Johane 4:8) Re ka bona kae kaelo ya gagwe e e lorato? Mo Baebeleng e e Boitshepo, e Modimo a e re kwaletseng ka go dirisa banna ba le 40 e le bakwaledi.b (2 Timotheo 3:16, 17) Gone mme, re ka ikanya jang kaelo e e mo bukeng eo?

Jesu Keresete, moemedi yo mogolo wa Modimo o ne a re: “Botlhale bo supiwa bo siame ke ditiro tsa jone,” kgotsa diphelelo tsa jone. (Mathaio 11:19; Johane 7:29) Botlhale jwa Modimo bo re thusa go tsamaya mo tseleng ya katlego le boitumelo jo bo nnelang ruri—“tsela yotlhe ya se se molemo”—fa botlhale jwa motho jone, jo bo itlhokomolosang Modimo bo dira gore re palelwe le go tlhoka boitumelo.—Diane 2:8, 9; Jeremia 8:9.

Akanya ka motlha wa bahipi o o neng wa simolola ka dingwaga tsa bo1960. Bahipi ba bantsi ba ba neng ba gana melao le taolo ya batho ba ba godileng, ba ne ba rotloetsa gare ga dilo tse dingwe, go dirisiwa ga diokobatsi, boikutlo jwa go tshelela gompieno fela le kgololesego ya go tlhakanela dikobo. A mme go tshela ka tsela eo go ne go bontsha botlhale jwa mmatota? A go ne ga dira gore batho ba nne le boikaelelo jwa mmatota mo botshelong le go nna le melao ya boitsholo e e neng e dira gore motho a nne le kagiso ya mogopolo ya mmatota le boitumelo jo bo nnelang ruri? Hisitori e bontsha gore botshelo jo bo ntseng jalo ga bo a ka jwa fetola batho gore ba nne botoka mme go na le moo, bo ne jwa dira gore boitsholo jwa setšhaba bo nne maswe le go feta.—2 Timotheo 3:1-5.

Go farologana le megopolo ya batho, botlhale jo bo mo Baebeleng bo itshupile bo solegela molemo ka metlha. (Isaia 40:8) Fa o ntse o bala setlhogo se se latelang, gongwe o tla bona gore ke ka ntlha yang go ntse jalo, ka gonne se tlotla ka melaometheo e le merataro ya Baebele e e ileng ya thusa dimilione tsa batho tse di tswang mo e ka nnang mo setšhabeng sengwe le sengwe gore di itumele le go atlega tota—go sa kgathalesege gore seemo sa bone sa ikonomi kgotsa sa loago se ntse jang.

[Dintlha tse di kwa tlase]

[Lebokoso mo go tsebe 5]

DITUMELO TSE DI NYENYEFATSANG KGANG YA GO ATLEGA

Batho ba le bantsi ba bolela gore ga go na Modimo le gore botshelo bo nnile teng ka ntlha ya kgopolo e e sa utlwaleng ya gore ditshedi di iphetotse ka botsone go nna tse dingwe. Fa kgopolo eno e ka bo e le boammaaruri, botshelo e ka bo e le fela ditlamorago tsa tatelano ya dikotsi tsa khemikale le tsa go nna teng ga ditshedi mme go batla ga rona boikaelelo mo botshelong le melaometheo ya lefatshe lotlhe e ka bo e le matsapa a bophiri fela.

Ba bangwe ba dumela gore Modimo o re bopile mme go tswa foo a re latlha. Tota e bile, kgopolo eno e dira gore re nne dikhutsana mme seno gape se dira gore re se ka ra nna le boikaelelo jwa mmatota mo botshelong le gore re tlhoke melao. Akanya ka seno: Modimo o dirile gore phologolo nngwe le nngwe e nne le botlhale jwa tlholego jo bo tlhokegang go diragatsa boikaelelo jwa yone mo botshelong. Ka jalo, botlhale jwa gagwe jo bogolo bo bonala mo lefatsheng le le re dikologileng. A ene Mmopi yoo a ka re bopa mme a bo a boa gape a re tlogela gore re apaape mo lefifing? Le e seng!—Baroma 1:19, 20.

Ka go tsaya maiteko a rona a go batla boikaelelo le melaometheo e e ka re kaelang e le a lefela, difilosofi tsa balatolamodimo di nyatsa kgang ya gore re ka atlega.

[Setshwantsho mo go tsebe 5]

Botlhale jo bo fitlhelwang mo Baebeleng bo supiwa bo siame ka diphelelo tsa jone tse di molemo