Thulaganyo e e Kgethegileng ya go Tlamela Batho

BATHO ba tlhoka se se fetang moya, dijo le metsi. Gore re itumele tota, re tlhoka go kgotsofatsa keletso ya rona ya dilo tsa semoya. Re tlhoka go itse gore boikaelelo jwa botshelo ke eng, gore ke ka ntlha yang fa re le mono. Ke gone ka moo Jesu Keresete a ileng a bolela jaana: “Go itumela ba ba tshwenyegang ka se ba se tlhokang semoyeng.”—Mathaio 5:3.

Modimo o dirile gore re kgone go kgotsofatsa keletso eo ka buka e e boitshepo e e anamisitsweng thata mo lefatsheng, e leng Baebele e e Boitshepo, e gone jaanong e leng teng e feletse kgotsa bontlhanngwe jwa yone ka dipuo tse di ka nnang 2 400. (2 Timotheo 3:16) Baebele e re bolelela gore Modimo o bopile lobopo le sengwe le sengwe se se tshelang mo lefatsheng. (Genesise, kgaolo 1 le 2) Baebele gape e re bolelela gore o ile a kgaoganya ditiro tsa gagwe tsa go bopa ka “malatsi” a le marataro a tshwantshetso e leng tsela e e tsamaisanang le nako e baitsesaense ba e fitlheletseng ya go bopega le go nna gone ga lefatshe.

Mme Baebele e senola gape le boikaelelo jwa Modimo ka batho. Boikaelelo joo bo tlhalositswe jaana mo go Pesalema 37:29: “Basiami ba tla rua lefatshe, mme ba tla aga mo go lone ka bosakhutleng.” Ela tlhoko gore basiami—batho ba ba tshelang ka melao le melaometheo ya Baebele—ba tla tshelela ruri, e seng kwa legodimong mme mo lefatsheng. Gone mme, lefatshe e tla bo e se polanete e e kgotletsweng jaaka e ntse gompieno. Go na le moo, e tla nna paradaise ya lefatshe lotlhe.—Pesalema 104:5; Luke 23:43.

Kitso e e Isang Botshelong

Paradaise eo e tla bo e le ya mefuta e mebedi—ya mmatota le ya semoya. Isaia 11:9 ya re: “Lefatshe le tla tlala kitso ya ga Jehofa jaaka metsi a khurumeditse lewatle.” E re ka kitso eo e tsentswe mo dipelong tsa batho, le e leng gone jaanong e tlhotlheletsa Bakeresete ba boammaaruri gore ba tshedisane mmogo ka kagiso le ka kutlwano. Mo godimo ga moo, ba tsaya masisi mafoko ano a ga Jesu a a a buileng mo thapelong: “Seno se raya botshelo jo bo sa khutleng, go tsenya kitso ka ga gago, Modimo yo o esi wa boammaaruri, le ka ga yo o mo romileng, e bong Jesu Keresete.”—Johane 17:3.

Fa e le gore o ka rata go ithuta mo go oketsegileng ka tsholofelo e e mo Baebeleng, Basupi ba ga Jehofa ba tla itumelela go go thusa mahala.a

[Ntlha e e kwa tlase]