Go Tshela Kwantle ga Pogo—Tsholofetso E e Ka Ikanngwang

A TSHOLOFETSO eno e e itumedisang e ka ikanngwa? Akanya ka nngwe ya ditlhagiso tsa ntlhantlha tse di ileng tsa newa motho. Modimo o ne a raya Adame a re fa a ka se mo ikobele, ‘ruri o ne a tla swa.’ (Genesise 2:17) Mme o ne a swa fela jaaka Modimo a ne a rile o tla swa. Seno, loso le pogo tse batho ba di ruileng ke bosupi jwa gore Modimo a ka ikanngwa. A go na le lebaka lepe fela le le ka dirang gore re belaele gore tsholofetso ya Modimo ya gore o tla busetsa maemo a a itekanetseng mo lefatsheng le yone e tla diragadiwa?

Gakologelwa gape le dinonofo tsa Modimo tse go tlotlilweng ka tsone mo setlhogong se se fetileng. Lebaka la go bo re eletsa gore pogo e fele le bontsha kutlwelobotlhoko ya Modimo, lorato le tshiamiso ya gagwe. Mo godimo ga moo, ditiragalo tsa lefatshe le mekgwa e e leng teng gompieno e supa gore nako ya gore Modimo a tseye kgato e ntse e atamela ka bofefo.—Bona lebokoso le le reng “Dilo Tseno di Tla Nna Leng?”

Ke eng fa Jehofa Modimo e le ene yo segolobogolo a tshwanelegang go fedisa pogo ya batho? Akanya kafa—a dirisa Morwawe e bong Jesu—a kgonang e bile a rulagantseng ka teng go baakanya dilo tse totatota di bakang pogo.

Tshwetso ya motho.

Rremogologolwane wa rona e bong Adame o ne a dira tshwetso e e bosula e e baketseng bana botlhe ba gagwe ditlamorago tse di utlwisang botlhoko. Moaposetoloi Paulo o ne a kwala jaana: “Popo yotlhe e nna e fegelwa mmogo le go nna mo botlhokong mmogo.” (Baroma 8:22) Tharabololo ya Modimo e siame, e bontsha kutlwelobotlhoko e bile e motlhofo. Baroma 6:23 e tlhalosa jaana: “Dituelo tse boleo bo di duelang ke loso, mme mpho e Modimo a e nayang ke botshelo jo bo sa khutleng ka Keresete Jesu Morena wa rona.”

Monna yo o itekanetseng e bong Jesu o ne a tshela botshelo jo bo se nang boleo. Loso lwa gagwe mo koteng ya tlhokofatso lo ne lwa nna motheo wa go golola batho ba ba kutlo mo phutsong ya boleo le loso. Gone jaanong re na le tsholofelo ya go tshelela ruri mo lefatsheng le mo go lone re tla bong re sa rua boleo jo bo dirang gore re dire ditshwetso tse di sa siamang. Gape batho ba ba dirang ka boomo gore batho ba bangwe ba boge ba tla bo ba seyo, ka gonne “badirabosula ka bobone ba tla kgaolwa.”—Pesalema 37:9.

Ditiragalo tse di sa lebelelwang le bosaitekanelang.

Kgosi e e tlhomilweng ke Modimo e bong Jesu Keresete, e na le maatla a go laola maatla a tlholego a lefatshe. Mo lekgolong la ntlha la dingwaga C.E., Jesu le baaposetoloi ba gagwe ba ne ba le mo mokorong o o tshwarang ditlhapi fa go ne go “tsoga phefo e kgolo ya matsubutsubu e e bogale, mme makhubu a nna a itaaganela mo teng ga mokoro, mo mokoro o neng o tloga o tlala metsi.” Fa Jesu a ne a bidiwa gore a tle go thusa, o ne “a tsoga a ba a kgalema phefo mme a raya lewatle a re: ‘Kgaotsa! Didimala!’ Mme phefo ya kokobela, ga ba ga nna le tshisibalo e kgolo.” Baaposetoloi ba gagwe ba ne ba gakgametse. Ba ne ba re: “Le e leng phefo le lewatle di a mo utlwa.”—Mareko 4:37-41.

Fa Jesu a busa, batho ba ba kutlo ba ‘tla nna ka polokesego mme ga ba na go tshwenngwa ke go boifa masetlapelo.’ (Diane 1:33) Seo se akaretsa masetlapelo a tlholego. Mo godimo ga moo, go sa tshware lefatshe sentle, mekgwa e e sa babalesegang ya go aga le go itlhokomolosa maatla a tlholego a lefatshe, mmogo le diphoso tse dingwe tse di dirilweng ke batho, di tla bo di fedile. Ga go na ope yo o tla tlholang a boga ka go bo a ne a le mo lefelong le le sa siamang ka nako e e sa siamang.

Fa Jesu a ne a le mo lefatsheng, o ne a tlhalosa karolo e nngwe ya puso ya gagwe e e tla fedisang pogo epe fela e e leng teng ka ntlha ya ditiragalo tse di sa lebelelwang. O ne a re: “Ke nna tsogo le botshelo.” (Johane 11:25) Ee, Jesu o na le maatla le keletso ya go tsosa dimilione tsa batho ba ba suleng setlhogo ka ntlha ya masetlapelo a tlholego. A ke tsholofetso ya lefela? Jesu o ne a nonotsha lebaka la gore re mo ikanye ka gore a tsose baswi fa a ne a le mo lefatsheng. Go kwadilwe ka makgetlho a le mararo a a neng a tsosa baswi ka one mo Baebeleng.—Mareko 5:38-43; Luke 7:11-15; Johane 11:38-44.

“Mmusi wa lefatshe leno.”

Keresete Jesu o tlhomilwe ke Modimo gore “a nyeletse ene yo o nang le dithata tsa go baka loso, ke gore, Diabolo.” (Bahebera 2:14) Jesu o ne a bolela jaana: “Lefatshe leno le a atlholwa; jaanong mmusi wa lefatshe leno o tla latlhelwa kwa ntle.” (Johane 12:31) O tla “senya ditiro tsa ga Diabolo” ka go fedisa tlhotlheletso e Diabolo a nang le yone mo dikgannyeng tsa lefatshe. (1 Johane 3:8) Akanya kafa batho ba tla bong ba farologane ka teng fa moya wa ga Diabolo wa bogagapa, bonweenwee, le bopelotshetlha o tla bo o fedisitswe!