Leoto la Pitse

PITSE (Equus caballus) e kgona go taboga ka lobelo lo ka nna dikilometara di le 50 ka ura. Le fa seno se tlhoka maatla a mantsi, tota e dirisa a se kae fela. Go tla jang? E thusiwa ke maoto a yone.

Akanya ka se se diregang fa pitse e taboga. Fela jaaka seporeng, mesifa ya pitse e e kgonang go otlologa e amogela maatla fa leoto la yone le gata fa fatshe e bo e busa maatla ao gore pitse e kgone go tabogela kwa pele.

Mo godimo ga moo, fa pitse e taboga, maoto a yone a tshikinyega thata mo mesifa ya yone e ka gobalang. Le fa go ntse jalo, mesifa e mengwe e e mo maotong a yone e thibela seo go direga. Babatlisisi ba re seno ke “mesifa e e dirilweng ka tsela e e raraaneng” e e thusang gore e nonofe e bo e nne lobelo.

Baenjenere ba leka go etsa tsela e maoto a pitse a dirilweng ka yone gore ba dire diroboto tsa maoto a manè. Le fa go ntse jalo, Biomimetic Robotics Laboratory ya Massachusetts Institute of Technology ya re tsela e le raraaneng ka yone e dira gore go se ka ga nna motlhofo go dira sengwe se se tshwanang le lone go dirisiwa didirisiwa tsa bosheng le kitso ya boenjenere.

O akanyang? A popego ya maoto a pitse e nnile gone ka boyone fela? Kgotsa a e tlhamilwe?