Botlhale jo bo Sireletsang

LE FA go huma go na le melemo, go ka bakela motho mathata segolobogolo mo metlheng e e kotsi e re tshelang mo go yone. (2 Timotheo 3:1-5) Mo dinageng tse dingwe, bahumi go akaretsa le bajanala ba ba lebegang ba humile, ba a kgothosiwa e bile ba a gapiwa gore ba gololwe ka madi.

Pego nngwe ya dikgang e ne ya bua jaana ka naga nngwe e e tlhabologang: “Go kgothosiwa ka dikgoka, go tsiediwa le go gapa batho go dira gore bahumi le bahumanegi e nne baba. Diresetšhurente di na le badisi ba ba tshwarang ditlhobolo; matlo a bahumi a dikaganyeditswe ke diterata tsa motlakase, dipone tse dikgolo, dikhamera le badisi.” Le mo dinageng tse dingwe batho ba itshireletsa ka tsela e e tshwanang.

Le fa go ntse jalo, Baebele ya re “yo o humanegileng ga a . . . [tshosediwe].” O ka solegelwa molemo jang ke botlhale jono? Fa o nna mo lefelong le le tletseng bokebekwa le thubakanyo kgotsa o tsaya loeto mo lefelong le le ntseng jalo, o se ka wa dira gore batho ba akanye gore o humile. Nna kelotlhoko gore o apara eng le gore o tshwara eng, segolobogolo fa o tsamaya mo mafelong a botlhe. Diane 22:3 ya re: “Yo o botlhale ke yo o boneng masetlapelo a bo a iphitlha, ba ba se nang maitemogelo ba fetile mme ba tla boga matswela a a botlhoko.”

Botlhale jo bo mo Baebeleng bo bontsha gore Mmopi wa rona o amega ka rona e bile o batla go re sireletsa. Moreri 7:12 ya re “botlhale ke tshireletso” ka gonne bo “boloka beng ba jone ba tshela.”