10 Go Ikanyega

GO KAYA ENG?

Motho yo o ikanyegang o reetsa melao, fa a go raya a re o tla dira selo o a se dira e bile o bua nnete ka dinako tsotlhe.

GORENG GO LE BOTLHOKWA?

Go le gantsi, kgololesego e o e newang e tsamaisana le gore o tshepiwa go le kana kang.

“Fa o batla gore batsadi ba gago ba go tshepe, o tshwanetse go ba bontsha gore o godile le gore o dira dilo sentle le fa ba seyo.”—Sarahi.

BAEBELE YA RE: “Nnang lo ipontshe se lona ka bolona lo leng sone.”—2 Bakorintha 13:5.

SE O KA SE DIRANG

Fa e le gore o batla gore batho ba go tshepe, dintlha tse di latelang di ka go thusa.

Bua nnete. Fa o bua maaka, batho ga ba kitla ba tlhola ba go tshepa. Mme fa o dirile diphoso o bo o bua nnete, batho ba tla go tshepa.

“Go motlhofo go bua nnete fa dilo di go tsamaela sentle. Mme batho ba tla go tshepa le go feta, fa e re o dirile phoso o bo o bua nnete go na le go bua maaka.”—Caiman.

BAEBELE YA RE: “Re eletsa go itshwara ka boikanyegi mo dilong tsotlhe.”—Bahebera 13:18.

Fa o neilwe tiro, e dire. Mo patlisisong e e ileng ya dirwa kwa Amerika, bathapi ba le bantsi ba re sengwe sa dilo tse ba di lebelelang thata mo bathong ba ba batlang go ba hira, ke gore ba dire tiro e ba e neilweng. Ithute gone jaanong gore fa o neilwe tiro, o e dire.

“Fa batsadi ba me ba nneile tiro, ba a itse gore ga ba tlhoke go ntshala morago ka yone ka gonne ke a e dira. Seo se dira gore ba ntshepe le go feta.”—Sarah.

BAEBELE YA RE: “Ke itse gore o tla dira le eleng go feta dilo tse ke di buang.”—Filemone 21.

Se fele pelo ka bonako. Go motlhofo go bona fa ngwana a gola ka gonne o nna motelele e bile diaparo di simolola go nna dinnye mme go thata go bona fa a gola mo tlhaloganyong ka gonne go tsaya nako.

“O ka se lebelele gore batho ba bangwe kgotsa batsadi ba gago ba go tshepe ka gonne o dirile selo se le sengwe fela se se ba itumedisang.” —Brandon.

BAEBELE YA RE: “Aparang . . . bopelotelele.”—Bakolosa 3:12.