Didirisiwa Tsa Ileketeroniki Di Ama Jang Lenyalo La Gago?
Fa didirisiwa tsa ileketeroniki di dirisiwa sentle, di ka nonotsha lenyalo. Ka sekai, di ka dira gore banyalani ba kgone go tlotla le fa ba se mmogo.
Le fa go ntse jalo, banyalani bangwe ga ba di dirise sentle mme di ba bakela mathata a a latelang . . .
di ba itaya tsebe fa ba le mmogo.
di dira gore ba berekele kwa gae le fa tota go sa tlhokege.
di dira gore ba se ka ba tlhola ba tshepana, le gore ba fitlhelane dilo dingwe.
SE O TSHWANETSENG GO SE ITSE
FA O NA LE MOLEKANE WA GAGO
Monna mongwe yo o bidiwang Michael a re: “Ka dinako dingwe ke tla bo ke na le mosadi wa me, mme ene o tla bo a se na sepe le nna. O tla bo a tlhomile mogopolo mo founong ya gagwe, a bo a nthaya a re: ‘Ke gone ke nnang le nako ya go tlhola melaetsa e e tseneng mo founong ya me.’” Monna mongwe yo o bidiwang Jonathan a re: “Banyalani ba tla bo ba le mmogo mme ba ikutlwa ba sa atamalana.”
SE O KA AKANYANG KA SONE: A go direga gantsi gore e re o na le molekane wa gago, go bo go tsena melaetsa mo founong ya gago kgotsa e lela, e bo e dira gore o seka wa kgona go tlotla le ene?—BAEFESO 5:33.
TIRO
Ditiro tsa batho bangwe di ba batla gore ba nne fela ba araba di founo, tota le fa go le bosigo kgotsa ba le kwa gae. Bangwe bone, ditiro tsa bone ga di ba tlhoke gore ba nne fela ba bereka mme le fa ba le kwa gae, ba tla bo ba tsweletse ba bereka. Monna mongwe yo o bidiwang Lee a re: “Ga ke kgone go nna ke sa tlhole gore go tsena melaetsa efe mo founong ya me, tota le fa ke na le mosadi wa me.” Mosadi mongwe yo o bidiwang Joy a re: “Ke berekela kwa gae, ka jalo, ga go motlhofo go nna tekatekano.”
SE O KA AKANYANG KA SONE: A fa molekane wa gago a bua le wena, o mo reetsa ka kelotlhoko? —LUKE 8:18.
BOIKANYEGI
Batho ba le bantsi ba lemogile gore go nna le dikgogakgogano di le dintsi mo manyalong, ka gonne molekane yo mongwe o tla bo a belaela se molekane wa gagwe a se tsenyang mo social media. Banyalani bangwe bone ba re go na le dilo dingwe tse ba di tsenyang mo internet tse ba sa batleng balekane ba bone ba di bona.
Batho bangwe ba re social media e kotsi ka gonne e dira gore banyalani bangwe ba fitlhelane dilo dingwe, gape e dira gore go nne motlhofo gore ba bangwe ba dire boaka. Ka jalo, ga go gakgamatse go bo baemedi bangwe ba ba berekang ka tlhalo, ba re social media e dirile gore manyalo mangwe a thubege.
SE O KA AKANYANG KA SONE: A o bua le batho bangwe ba bong bo sele mme o sa batle gore molekane wa gago a itse? —DIANE 4:23.
SE O KA SE DIRANG
DIRA GORE DILO DINGWE DI TLE PELE
Motho yo o sa jeng sentle a ka lwala. Ka tsela e e tshwanang, fa molekane mongwe a sa fetse nako e ntsi le molekane wa gagwe wa lenyalo, o tlile go dira gore go nne le mathata mo lenyalong.—Baefeso 5:28, 29.
MOLAOMOTHEO WA BAEBELE: “Lo lemoge gore dilo tse di botlhokwa thata ke dife.” —BAFILIPI 1:10.
Tlotla le molekane wa gago ka dikakantsho tse di latelang mme lo tlhophe tse lo batlang go di dirisa, kgotsa kwala dilo dingwe tse o akanyang gore lo ka di dira tse di ka lo thusang go dira gore didirisiwa tsa ileketeroniki di se ka tsa koafatsa lenyalo la lona.
Re leke go ja mmogo gangwe mo letsatsing
Re ipeele nako e re tla beelang di dirisiwa tsa ileketeroniki thoko, gore re kgone go tlotla mmogo
Re ipeele nako ya go dira sengwe se re tla se itumelelang
Fa go le bosigo, re time didirisiwa tsa rona tsa ileketeroniki re bo re di baya kgakala la rona
Letsatsi le letsatsi re beele kwa thoko bobotlana metsotso e le 15, gore re kgone go tlotla re sa itewe tsebe ke didirisiwa tsa ileketeroniki
Re ipeele nako e re tla timang internet ka yone