LEFATSHE LE TLHAKATLHAKANE

3 | Fetsa Nako le ba Bangwe

GORENG GO LE BOTLHOKWA?

Fa mathata mo lefatsheng a ntse a gakala batho ba le bantsi ga ba fetse nako le ba masika le ditsala.

Batho ba katogela kgakala le ditsala tsa bone.
Banyalani ga ba dirisane sentle mo lenyalong la bone.
Batsadi ga ba fetse nako le bana ba bone kgotsa ga ba ba reetse.

Se o Tlhokang go se Itse

Ditsala di botlhokwa ka gonne di re thusa gore re itekanele mo mmeleng le mo maikutlong bogolo jang ka dinako tse di thata.
Lefatshe leno le le tlhakatlhakaneng le dira gore re nne le seterese mme fa go nna jalo re nna le mathata mo lelapeng.
O ka nna wa se ka wa lemoga gore fa bana ba bona kgotsa ba utlwa dilo tse di bosula tse di diragalang mo dikgannyeng go ka ba tshosa.

Se o Ka se Dirang Gone Jaanong

Se Baebele e se buang: “Tsala ya boammaaruri e lorato ka dinako tsotlhe e bile ke morwarramotho yo o ka ikaegang ka ene ka dinako tsa matshwenyego.”—Diane 17:17.

Ditsala di kgona go re thusa le go re gakolola. Ditsala tse di lorato di kgona go go thusa gore o itshokele dikgwetlho tsa letsatsi leo.

SE SE KA GO THUSANG—Dikakantsho

Ka dinako tsa mathata, fetsa nako le batho ba bangwe

FETSA NAKO LE MOLEKANE WA GAGO

Molekane wa gago

Se Baebele e se buang: “Ba babedi ba botoka go na le a le mongwe . . . Gonne fa mongwe wa bone a wa, yo mongwe a ka kgona go thusa molekane wa gagwe.” (Moreri 4:9, 10) Monna le mosadi ba tshwanetse go dirisana sentle mo lenyalong la bone, yo mongwe a se kgatlhanong le yo mongwe.

Ititeye sehuba gore le fa o ka tswa o na le seterese ga o na go se ntshetsa mo molekaneng wa gago. Leka go nna pelotelele.
Gangwe mo bekeng, tlotla le molekane wa gago ka mathata a a tlhokang go rarabololwa mo lapeng. Lo se ka lwa kgakgauthana, rarabololang bothata.
Dirang dilo tse lo di ratang mmogo.
Akanyang ka dilo tse di monate tse di diragetseng lo le mmogo, gongwe lo ka lebelela dinepe tsa lenyalo la lona.

“Le fa lo ka tswa lo sa dumalane ka sengwe le sengwe lo sa ntse lo ka kgona go dirisana mmogo. Fa banyalani ba dirile tshwetso ba ka dirisana mmogo go dira jaaka ba sweditse.”—David.

FETSA NAKO LE DITSALA TSA GAGO

Ditsala tsa gago

Fa ditsala tsa gago di go tshegetsa, batla ditsela tsa gore le wena o ba tshegetse. Fa o nonotsha ba bangwe le wena go a go nonotsha.
Iphe nako letsatsi le letsatsi ya go tlhola ditsala tsa gago le go utlwa gore di tsoga jang.
Botsa ditsala tsa gago gore di thusitswe ke eng ka nako ya fa di ne di na le dikgwetlho tse di tshwanang le tsa gago.

“Ka dinako tsa mathata, ditsala di ka go thusa. Fa o latlhegetswe ke tsela, di kgona go go bontsha tsela, tota le ka go go gopotsa dilo tse o setseng o di itse. Ditsala tsa gago di a go rata e bile di a itse gore le wena o a di rata.”—Nicole.

FETSA NAKO LE BANA BA GAGO

Bana ba gago

Se Baebele e se buang: “Nna bonako go utlwa, bonya go bua.” (Jakobe 1:19) Kwa tshimologong, bana ba gago ba ka nna ba se ka ba batla go go bolelela gore ba ikutlwa jang mme fa o ba reetsa o le pelotelele, o tla ba thusa gore ba go tshololele maikutlo a bone.

Dira gore bana ba gago ba ikutlwe ba phuthologile fa ba na le wena. Bana ba bangwe ba rata go tlotla le batsadi ba bone fa ba le mo koloing kgotsa fa ba ntse ba tsamaya, go na le gore ba nne fa fatshe ba bue.
Thusa bana ba gago gore ba se ka ba reetsa kgotsa ba lebelela dilo di le dintsi tse di ka ba tshwenyang mo maikutlong.
Bolelela bana ba gago gore o dirile eng gore o kgone go sireletsa lelapa la lona.
Dirang dithulaganyo tsa gore lo a go dira eng wena le bana ba gago fa go ka tlhaga maemo a tshoganyetso.

“Bua le bana ba gago, o ba letle gore ba tlhalose maikutlo a bone. Ba ka tswa ba tshogile, ba tlhobaela kgotsa ba galefisitswe ke sengwe. Ba bolelela gore le wena o kile wa ikutlwa ka tsela e e tshwanang le gore ke eng se se go thusitseng fa o ne o na le maikutlo ao.”—Bethany.