Tshegetso ya Madi ka Meneelo ya Boithatelo

Tiro nngwe le nngwe e e setseng e tlhalositswe e tshegediwa ke badiri ba baithaopi, ka gone ba fokotsa ditshenyegelo. Bodihedi jwa ntlo le ntlo le go abiwa ga dibuka go dirwa ka boithatelo ke Basupi ba ga Jehofa. Ba duelela ditshenyegelo tsa bone. Bagolwane ba ba tsamaisang diphuthego, ba thusiwa ke batlhanka ba bodihedi, ga ba amogele tuelelo epe mo ditirong tse ba di dirang. Ke bone ba ituelelang ditshenyegelo tsotlhe tsa bone.

Le e leng maloko a Setlhopha se se Laolang le botlhe ba bangwe ba ba dirang ka nako e e tletseng go rulaganyetsa le go tlhagisa Dibibela le dibuka tsa Bibela ba amogela fela matlwana a mabotlana a borobalo le dijo le madinyana a mabotlana go duelela ditshenyegelo. Go ntse fela jalo le ka balebedi ba ba etang ba nako e e tletseng.

Meneelo e mebotlana e e amogelwang mo dibukeng gantsi ke eo thatathata e duelelang ditshenyegelo tsa konokono tsa didirisiwa, go tlhagisiwa ga tsone, le thomelo ya tsone. Ditshenyegelo tse dingwe tsotlhe di duelelwa ke meneelo ya boithatelo ya madi e e dirwang ke Basupi ba ga Jehofa ka bobone, ka moneelo kana ka wili e e kafa molaong.

Mo dipokanong tsotlhe tsa Basupi ba ga Jehofa, e ka ne e le tsa mafelo a bone kana mo dikopanong, go na le matlole a moneelo ao a leng gone gore ba ba ratang go ntsha meneelo ba e ntshe. Ga go na dikoleke dipe tse di tsewang. Ga go na dineo dipe kana ditsabosome tseo ba tshwanetseng go di duela. Jaaka go thadisitswe mo Dikwalong, mongwe le mongwe o ka ntsha moneelo fela kafa a ikaeletseng ka gone mo pelong ya gagwe.—2 Bakorintha 8:12; 9:7.

• Tiro yotlhe ya Basupi ba ga Jehofa e tshegediwa jang kafa mading?Go Dira Tiro ya Modimo ka Kutlwano