Kgaolo 64

Thuto Kaga Boitshwarelo

GO BONALA fa Jesu a santse a le mo ntlong nngwe mo Kaperenama le barutwa ba gagwe. O ne a ntse a bua le bone kafa ba neng ba ka fenya mathata a a tlhagang gareng ga bakaulengwe ka gone, jalo Petere o botsa ka gore: “Morèna, kana oa ga echo o ka nteohèla ga kaee, me ke nne ke mo ichwarèle?” Ereka baruti ba bodumedi ba Bajuda ba buile gore batho ba itshwarelelane ga makgetlo a le mararo fela, go bonala fa Petere a tsaya gore ke selo sa bopelontle fela thata go akantsha ka gore: “A ke ga shupa?”

Mme mogopolo wa go boloka rekoto e e ntseng jalo o phoso. Jesu o gakolola Petere ka go re: “Ga ke gu ree gore e nnè ga shupa; me ka re, e nnè ga mashomè a shupa ga shupa.” O bontsha gore ga go palo epe e e tshwanetseng go fiwa Petere jaaka selekanyo seo a tshwanetseng go itshwarela mokaulengwe wa gagwe.

Go tiisetsa mo barutweng kafa ba patelesegang ka gone go itshwarela, Jesu o ne a ba bolelela setshwantsho. Ke ka ga kgosi yo o batlang go atlhola melato ya batlhanka ba gagwe. Go tlisiwa mo go ene motlhanka mongwe yo o nang le namane e tona ya sekoloto sa 60 000 000 denarii. Ga go na kafa a ka se duelelang ka gone. Jalo, jaaka Jesu a tlhalosa, kgosi e laola gore ene le mosadi wa gagwe le bana ba gagwe ba rekisiwe gore e tle tuelo e ntshiwe.

Fa a utlwa seo motlhanka o wela mo dinaong tsa mong wa gagwe a bo a ikopela a re: “A u ko u nnè pelotelele le nna, me ke tla gu lehèla gotlhe hèla.”

Ka go mo tlhomogela pelo, mong wa gagwe ka kutlwelo botlhoko o phimola namane e tona eo ya molato. Mme Jesu o tswelela ka go tlhalosa gore, ka bonakonyana morago ga moo, motlhanka yono o fitlhela motlhanka ka ene yo o mo kolotang diponto di le lesome 100 denarii. Monna yoo o phamola motlhankakaene ka kgokgotso a bo a simolola go mo kgama, a re: “Leha molato oa gago.”

Mme motlhanka ka ene yoo ga a na madi. Jalo o wela fa dinaong tsa motlhanka yoo a mo kolotang, mme o mo kopa a re: “A u ko u nnè pelotelele le nna, me ke tla gu lehèla.” Go farologana le mong wa gagwe, motlhanka yoo ga a pelotlhomogi, o latlhela motlhankakaene mo kgolegelong.

Lefa go ntse jalo, Jesu o tswelela ka go tlhalosa gore batlhanka ba bangwe ba ba neng ba bona tiragalo eo ba ne ba ya go bolelela morena wa bone. Ene, ka bogale, o bitsa motlhanka yoo. O mo raya a re, “Motlhanka eo o mmolōtsana ke wèna, ke gu ichwaretse molato ole otlhe hèla, ka go bo u nu u o inthapeletse: Le wèna, a e ne e se chwanèlō ea gago go utlwèla motlhanka ka wèna botlhoko?” Ka go gakala thata, mong o latllhela motlhanka yo o seng pelotlhomogi mo kgolegelong go fitlhela a duelela sotlhe se a se kolotang.

Go tswa foo Jesu o digela ka go re: “Hèla yalo, Rrè oa legodimo o tla dihèla lona, ha lo sa ichwarelane moñwe le moñwe oa ga gabō, ka dipelo tsa lona.”

Abo seno e le thuto e e molemo jang ne ya boitshwarelo! Fa go bapisiwa le namane e tona ya molato wa boleo o Modimo a re o itshwaretseng, lefa tlolo e ka nna efe e re e direlwang ke mokaulengwe wa Mokeresete tota ruri ga se ya sepe. Gape, Jehofa Modimo o re itshwaretse gantsintsi. Mme ebile, ga se gantsi re lemogang maleo a rona kgatlhanong le ene. Ka jalo, a re ka se itshwarele mokaulengwe wa rona ka makgetlo a sekae fela, le eleng fa re na le lebaka je le utlwalang la gore re mo ngongoregele? Gakologelwa, fela jaaka Jesu a ile a ruta mo Therong ya mo Thabeng, Modimo o tla ‘re itshwarela melato ya rona, jaaka le rona re itshwaretse ba ba melato le rona.’ Mathaio 18:21-35; 6:12; Bakolosa 3:13.

▪ Ke eng se se tlhotlheletsang potso ya ga Petere kaga go itshwarela mokaulengwe wa gagwe, mme ke ka ntlhayang fa a ne a ka tsaya gore kakantsho ya gagwe ya gore ga makgetlo a supa e ne e le bopelontle jo bogolo?

▪ Karabelo ya kgosi mo boikuelong jwa motlhanka wa gagwe gore a tlhomogelwe pelo e ne e farologana jang le karabelo ya maikuelo a motlhankakaene?

▪ Ke eng se re se ithutang mo setshwantshong sa ga Jesu?