Kgaolo 97

Badiri Ba mo Tshimong ya Mofine

JESU o sa tswa go bolela jaana: “[Ba] bantsi ba tla nna ba moragō ba e neñ e le ba pele; me ba e neñ e le ba pele ba tla nna ba moragō.” Mme jaanong o tshwantshetsa seno ka go bolela kgang nngwe. O simolola jaana: “Bogosi yoa legodimo bo chwana le motho eo e leñ muñ oa ntlo, eo o phaketseñ a ea go thapèla tshimo ea gagwè ea mafine badihi ka tuèlō.”

Jesu o tswela pele jaana: “Me ea re [mong wa ntlo] a sena go dumalana le badihi ha a tla ba naea tushiliñ [“denarius,” NW ] ka letsatsi, a ba isa mo tshimoñ ea gagwè ea mafine. Me o tlogile a cwa, e ka ne e le ka nakō ea boraro, me a hitlhèla ba bañwe ba eme mo patleloñ ea borèkèlō, ba sa dihe sepè; Le bōnè a ba raea, a re, Le lona, eañ mo tshimoñ ea mafine, me se se siameñ ke tla se lo naea. Me ba ea. A ba a cwa gapè e ka ne e le ka nakō ea borataro, le ka ea bohèra o le moñwe, me a diha hèla yalo. Me e rile e ka ne e le ka nakō ea leshomè le mocō a cwa, me a hitlhèla ba bañwe ba eme hèla; me a ba raea, a re, Lo emetseñ hano motshegare otlhe lo sa dihe sepè? Ba mo raea, ba re, Ke ka go bo re sa thapiwa ke opè. A ba raea, a re, Le lona eañ mo tshimoñ ea mafine.”

Mong wa ntlo, kana mong wa tshimo ya mofine, ke Jehofa Modimo, mme tshimo ya mofine ke morafe wa Iseraele. Badiri ba mo tshimong ya mofine ke batho bao ba tsenngwang mo kgolaganong ya Molao; ka tlhamalalo ke Bajuda bao ba neng ba tshela mo metlheng ya baaposetoloi. Go dirilwe tumalano ya tuelo le badiri bao ba tlileng go bereka letsatsi lotlhe fela. Tuelo ya gone ya tiro ya letsatsi lotlhe ke denarius e le nngwe. Ereka “nakō ea boraro” e le 9:00 a.m., bao ba biditsweng ka ura ya bo 3, ya bo 6, ya bo 9, le ya bo 11, mongwe le mongwe wa bone, o bereka diura di le 9, 6, 3, le e le 1 fela.

Badiri bao ba berekileng diura di le 12, kana letsatsi lotlhe, ba emela baeteledipele ba Bajuda bao ba neng ba tshwaregile thata mo tirelong ya bodumedi ba sa kgaotse. Ga ba tshwane le barutwa ba ga Jesu, bao, mo matshelong a bone ka bontsi, ba neng ba hirilwe mo tirong ya go tshwara ditlhapi le mo ditirong tse dingwe tsa boitshediso. “Muñ oa ntlo” ga a ka a romela Jesu Keresete gore a ye go phutha bano gore e nne barutwa ba gagwe go fitlhela ka 29 C.E. a ela go fela. Ka gone ba ne ba nna “ba moragō,” kana badiri ba mo tshimong ya mofine bao ba tlileng ka ura ya bo 11.

Kgabagare, letsatsi leo la tshwantshetso la go bereka le fela fa Jesu a swa, mme go tla nako ya gore badiri ba duelwe. Go latelwa molao mongwe o o sa tlwaelegang wa go duela wa morago pele, jaaka go tlhalosiwa jaana: “Me ea re go tsèna maitsiboea, morèna oa tshimo a raea molebeledi oa gagwè, a re, Bitsa badihi, u ba neè maduō a bōnè; u simololè ka ba moragō go ea kwa go ba pele. Me ea re go tla bōnè ba nakō e e ka neñ e le ea leshomè le mocō, moñwe le moñwe a amogèla tushiliñ [“denarius,” NW]. Me ea re ba pele ba tla, ba itlhoma ba tla amogèla bogolo; me le bōnè moñwe le moñwe a amogèla tushiliñ [“denarius”] hèla yalo. Me ba re ba a amogèla, ba ñōñōrègèla muñ oa ntlo, Ba re, bano ba moragō ba dihile ka nakō e le ñwe hèla, me u ba lekantse le rona ba re ichoketseñ letsapa ya motshegare, le mogote o o hisañ. Me a hetola moñwe oa bōnè, a re, Tsala, ga ke gu siamololele; a ga ua dumalana le nna ka tushiliñ [“denarius”]? Tsaea se e leñ sa gago, me u tsamaeè; go rata ga me ke go naea eo oa moragō hèla yaka le wèna ke gu neile. A ga ke na tshiamō ea go diha ka selō sa me kaha ke ratañ ka gōna? Kgotsa a leitlhō ya gago le ntilotse, ka go bo nna ke molemō?” Kwa bokhutlong, Jesu o ne a boeletsa ntlha eo a neng a e bua pelenyana a re: “Yalo ba moragō ba tla nna ba pele, le ba pele ba nne ba moragō.”

Go amogelwa ga denarius go ne ga diragala, eseng ka nako eo Jesu a neng a swa ka yone, mme ka Pentekosete 33 C.E., fa Keresete, ebong “molebalebedi,” a ne a tshololela moya o o boitshepo mo barutweng ba gagwe. Barutwa bano ba ga Jesu ba ne ba tshwana le “ba moragō,” kana badiri bao ba tlileng ka ura ya bo 11. Denarius e ne e sa emele mpho ya moya o o boitshepo ka boyone. Denarius e ne e le sengwe seo barutwa ba neng ba tshwanetse go se dirisa mono mo lefatsheng. E ne e le sengwe seo se neng se bolela botshelo jwa bone, botshelo jwa bone jo bosakhutleng. E ne e le tshiamelo ya go nna Moiseraele wa semoya, yo o tloditsweng gore a rere ka Bogosi jwa Modimo.

Ka bonako bao e neng e le ba ntlha go thapiwa ba ne ba lemoga gore barutwa ba ga Jesu ba ne ba duetswe, mme ba ne ba ba bona ba dirisa denarius eno ya tshwantshetso. Mme ba ne ba batla se se fetang moya o o boitshepo le ditshiamelo tsa Bogosi tseo di amanang le one. Go ngongorega ga bone le go sa batle ga bone seo go ne ga nna ka sebopego sa go bogisa barutwa ba ga Keresete, eleng badiri ba mo tshimong ya mofine “ba moragō.”

A setshwantsho sa ga Jesu se ne sa felela ka go diragadiwa goo ga lekgolo la ntlha la dingwaga fela? Nnyaa, baruti ba Labodumedi ba mo lekgolong leno la bo 20 la dingwaga ba ile, ka ntlha ya maemo a bone le maikarabelo a bone, ba nna “ba pele” go thapiwa mo tirong ya Modimo ya tshimo ya mofine ya tshwantshetso. Ba ne ba leba bareri ba ba ineetseng bao ba kopanelang le Watch Tower Bible and Tract Society jaaka “ba moragō” go ka nna le kabelo epe ya botlhokwa mo tirelong ya Modimo. Mme, tota, ke bone, bano bao baruti ba neng ba ba nyatsa, bao ba ileng ba amogela denarius—eleng tlotla ya go direla jaaka baemedi ba ba tloditsweng ba Bogosi jwa selegodimo jwa Modimo. Mathaio 19:30–20:16.

▪ Ke eng seo se emelwang ke tshimo ya mofine? Ke bomang bao ba emelwang ke mong wa tshimo ya mofine le ke badiri ba diura di le 12 le ba ura e le 1?

▪ Letsatsi la go bereka la tshwantshetso le ne la khutla leng, mme tuelo e ne ya dirwa leng?

▪ Ke eng seo se emelwang ke go duelwa ka denarius?