Kgaolo 2

Jesu Keresete, Mosupi yo o Ikanyegang

BASUPI ba bantsi ba motlha wa pele ga Bokeresete ba ile ba bolela bosupi jwa bone ka dingwaga tse di ka nnang 4 000. Mme lefa go ntse jalo dikgang tse di amanang le bolaodi jwa Modimo le bothokgami jwa batlhanka ba gagwe di ne di santse di ise di rarabololwe ka gope. Jaanong go ne ga tla nako ya gore “losika” lwa segosi lo lo solofeditsweng ebong Mesia, lo tle mo lefatsheng.—Gen. 3:15.

Mo gare ga dimilionemilione tsotlhe tsa barwa ba gagwe ba moya, Jehofa o ne a tlhopha mang gore a dire tiro eno? Botlhe ba ne ba bone se se neng sa direga kwa Edene ebile ga go na pelaelo gore ba ne ba itse ka dikgang tsa lobopo tse di neng tsa tsosiwa. Mme ke mang yo o neng a tlhagafetse thata go dira gore leina la ga Jehofa le ntlafadiwe le gore bolaodi jwa gagwe bo tlotlomadiwe? Ke mang yo o neng a ka kgona go neela karabo e e tla kgaolang kgang mo kgwetlhong ya ga Satane ya gore ga go na motho ope yo o neng a ka boloka bothokgami mo bolaoding jwa Modimo fa a lekwa? Motho yo Jehofa a neng a mo tlhopha e ne e le Motsalwapele wa gagwe, Morwawe yo o tshotsweng a le esi ebong Jesu.—Yoh. 3:16; Bakol. 1:15.

Jesu o ne a amogela kabelo eno ka botlhaga le ka boikokobetso, le mororo go ne go bolela gore a tlogele legae la gagwe la selegodimo koo a neng a nna le Rraagwe lobaka lo loleele go feta ope o sele. (Yoh. 8:23, 58; Bafil. 2:5-8) Boikaelelo jwa gagwe e ne e le eng? O ne a rata Jehofa thata ebile a eletsa thata go bona leina la Gagwe le tlositswe kgobo yotlhe. (Yoh. 14:31) Jesu gape o ne a dira jalo gape ka gonne a rata batho. (Dia. 8:30, 31; bapisa Yohane 15:13.) Go tsholelwa ga gagwe mo lefatsheng, mo tshimologong ya letlhafula la ngwaga wa 2 B.C.E., go ne ga dirwa ka moya o o boitshepo—oo Jehofa a neng a o dirisa go tsaya botshelo jwa ga Jesu go tswa kwa legodimong a bo tsenya mo popelong ya lekgarebana la Mojuda ebong Maria. (Math. 1:18; Luke 1:26-38) Ka gone Jesu o ne a tsholelwa mo morafeng wa Iseraele.—Bagal. 4:4.

Jesu o ne a itse go gaisa Moiseraele ope fela gore o ne a tshwanetse a nna mosupi wa ga Jehofa. Ka ntlha yang? E ne e le leloko la morafe o Jehofa a neng a bolela jaana ka one a dirisa moperofeti Isaia: “Lona lo bashupi ba me.” (Isa. 43:10) Mo godimo ga moo, ka nako ya fa Jesu a ne a kolobediwa kwa Nokeng ya Joredane ka 29 C.E., Jehofa o ne a mo tlotsa ka moya o o boitshepo. (Math. 3:16) Ka gone Jesu, jaaka fa a ne a bontsha seno moragonyana, o ne a newa maatla a go “bolèla ñwaga o o lebosègañ oa ga Yehofa.”—Isa. 61:1, 2; Luke 4:16-19.

Jesu o ne a diragatsa tiro e a neng a e filwe ka boikanyego mme a nna mosupi wa ga Jehofa yo mogolo go gaisa botlhe mo lefatsheng. Go a tshwanela he go bo moaposetoloi Johane, yo o neng a eme gaufi le Jesu ka nako ya fa a ne a swa a ne a bitsa Jesu “moshupi eo o ikanyègañ.” (Tshen. 1:5) Mme mo go Tshenolō 3:14, Jesu yo o galaleditsweng o ipitsa “eo e leñ Amen” le “eo e leñ moshupi eo o boikañō le boamarure.” “Moshupi eo o ikanyegañ” yono o ne a neela bosupi bofe?

‘Go Neela Bosupi ka Boammaaruri’

Jesu o ne a bolela jaana fa a ne a sekisiwa fa pele ga mmusi wa Moroma ebong Pilato: “Ke tsalecwe gōna mouō, me ke tletse gōna mouō mo lehatshiñ, gore ke shupè kaga boamarure. Moñwe le moñwe eo e leñ oa boamarure o utlwa lencwe ya me.” (Yoh. 18:37) Jesu o ne a neela bosupi ka boammaaruri bofe? E ne e le boammaaruri jwa Modimo, go senolela ba bangwe ka maikaelelo a ga Jehofa ao a nnetseng rure.—Yoh. 18:33-36.

Lefa go ntse jalo, Jesu o ne a neela bosupi jang ka boammaaruri jono? Lediri la Segerika le le bolelang “go neela bosupi ka” gape le bolela “go bolela, go tlhomamisa, go bua molemo (ka), go bua sentle (ka), go amogela.” Mo mekwalong ya Segerika sa bogologolo ya koma, popego e nngwe e e tlwaelegileng ya lediri (mar·ty·roʹ) e ne e bonwa fa morago ga mosaeno, jaaka fa go saenelwa dilo tsa kgwebo. Ka jalo he, Jesu o ne a tshwanelwa ke go tlhomamisa boammaaruri jwa Modimo ka bodihedi jwa gagwe. Eleruri seno se ne se batla gore a bolelele ba bangwe boammaaruri joo, kana a bo ba rerele. Lefa go ntse jalo, go ne go tlhokega go le gontsi thata go gaisa go bua fela.

“Ke nna . . . boamarure,” Jesu o ne a bolela jalo. (Yoh. 14:6) Ee, o ne a tshela ka tsela e a neng a diragatsa boammaaruri jwa Modimo ka yone. Boikaelelo jwa Modimo kaga Bogosi le Mmusi wa jone wa Bomesia bo ne bo ile jwa bolelwa ka tsela e e utlwalang sentle mo boperofeting. Jesu, ka tsela eo a neng a tshela botshelo jotlhe jwa gagwe ka yone jo bo neng jwa felela ka gore a swe loso lwa go intsha setlhabelo, o ne a diragatsa dilo tsotlhe tse di neng di boleletswe pele ka ene. Ka gone o ne a tlhomamisa a bo a supa kafa lefoko la ga Jehofa la boperofeti le leng boammaaruri ka teng. Ka ntlha ya moo moaposetoloi Paulo o ne a ka bolela jaana: “Gonne leha dipolèlō tsa choloheco tsa Modimo di ka bo di le dintsi yañ, mo go èna go na le E, hèla: ke gōna le gōna go leñ Amen [eo e bolelang, “a go nne jalo,” kana “eleruri”] o oa rona ka èna, kgalalecoñ ea Modimo ka rona.” (2 Bakor. 1:20) Ee, Jesu ke ene yo dilo tse Modimo o di solofeditseng di diragadiwang ka ene.—Tshen. 3:14.

Go Neela Bosupi ka Leina la Modimo

Jesu o ne a ruta balatedi ba gagwe gore ba rapele jaana: “Rra echo eo o kwa legodimoñ, Leina ya gago a le itshepisiwè [kana “le bolokwe le le boitshepo; le tshwarwe jaaka le le boitshepo”].” (Math. 6:9, ntlhanyana e e kwa tlase go NW) Mo bosigong jwa bofelo jwa botshelo jwa gagwe jwa mo lefatsheng, fa a ne a rapela Rraagwe wa selegodimo, Jesu o ne a bolela gape jaana: “Leina ya gago ke le bontshitse batho ba u ba lomolotseñ mo lehatshiñ ua ba nnaea: e ne e le ba gago, me ua ba nnaea, me ba tshegeditse lehoko ya gago. Me ke ba itsisitse leina ya gago, me ke tla nna ke le ba itsise; gore loratō lo u nthatileñ ka lōna lo nnè mo go bōnè, le nna ke nnè mo go bōnè.” (Yoh. 17:6, 26) Tota ebile jono e ne e le jone boikaelelo jo bogolo jwa gore Jesu a tle mo lefatsheng. Ke eng se se neng se akarediwa mo go itsiseng leina la Modimo?

Balatedi ba ga Jesu ba ne ba setse ba itse leina la Modimo ebile ba ne ba setse ba le dirisa. Ba ne ba le bone ebile ba ne ba le badile mo mekwalong ya Bibela ya Sehebera e e neng e le teng mo disinagogeng tsa bone. Gape ba ne ba le bona le go le bala mo teng ga Septuagint—thanolo ya Segerika ya Dikwalo tsa Sehebera, tse ba neng ba di dirisa mo go ruteng le fa ba ne ba kwala. Fa e le gore ba ne ba setse ba itse leina la Modimo, Jesu o ne a le ba bontsha, kana a le ba itsise jang?

Mo metlheng ya go kwalwa ga Bibela maina e ne e se dilo fela tse di dirisiwang go tlhaola motho mo go ba bangwe. A Greek-English Lexicon of the New Testament e e kwadilweng ke J. H. Thayer e bolela jaana: “Leina la Modimo mo T[esetamenteng] E N[tšha] le dirisetswa dinonofo tsotlhe tse mo baobameding ba gagwe di akarediwang tsotlhe ke leina leo, le tse Modimo o ikitsiseng batho ka tsone.” Jesu o ne a itsise leina la Modimo eseng fela ka go le dirisa mme gape o ne a bontsha gore Motho wa leina leo ke motho yo o ntseng jang—boikaelelo jwa gagwe, ditiro tsa gagwe, le dinonofo tsa gagwe. Jaaka yo o ‘ntseng a le mo sehubeng sa ga Rara,’ Jesu o ne a ka tlhalosa Rara ka tsela e go senang ope o sele yo o neng a ka kgona go dira ka yone. (Yoh. 1:18) Mo godimo ga moo, Jesu o ne a bontsha Rraagwe ka tsela e e feletseng jaana mo e leng gore barutwa ba ga Jesu ba ne ba ka kgona go ‘bona’ Rara ka Morwa. (Yoh. 14:9) Jesu o ne a neela bosupi ka leina la Modimo ka se a neng a se bua le se a neng a se dira.

O Ne A Neela Bosupi ka Bogosi jwa Modimo

Jaaka “Moshupi eo o ikanyegañ,” Jesu e ne e le mmoledi wa Bogosi jwa Modimo ka tsela e e tlhomologileng. Ene ka boene o ne a bolela jaana a gatelela: “Ke na le go [rera] . . . Mahoko a a Molemō a bogosi yoa Modimo: gonne ke romilwe go diha yalo.” (Luke 4:43) O ne a bolela ka Bogosi joo jwa selegodimo mo Palesetina yotlhe, a tsamaya dikilometara di le makgolokgolo ka dinao. O ne a ya go rera gongwe le gongwe kwa go neng go na le batho ba ba neng ba tla reetsa: fa thoko ga makadiba, kwa dithabeng, kwa ditoropong le kwa metseng, mo disinagogeng le kwa ditempeleng, mo marekelong, le kwa magaeng a batho. Mme Jesu o ne a itse gore karolo e a neng a ka kgona go e dira e ne e le nnye le gore palo ya batho ba a neng a ka ba neela bosupi ba ne ba le bannye. (Bapisa Yohane 14:12.) Ka jalo Jesu o ne a katisa barutwa ba gagwe a bo a ba romela gore ba nne baboledi ba Bogosi ka boikaelelo jwa gore a akaretse tshimo ya lefatshe.—Math. 10:5-7; 13:38; Luke 10:1, 8, 9.

Jesu e ne e le mosupi yo o dirang ka natla, yo o tlhoafetseng, mme ga a ka a itetla gore a kgorelediwe ke dilo tse dingwe tse di kwa thoko. Le mororo a ne a bontsha gore o amegile ka dilo tse dingwe tse di tlhokwang ke batho, o ne a sa tshwarege thata mo go direng dilo tseo di neng di ka lapolosa motho ka nakonyana e khutshwanyane fela mo eleng gore o felela a itlhokomolositse tiro eo a neng a e neilwe ke Modimo ya gore a bolelele batho kaga seo se tla rarabololelang mathata a bone ruri—Bogosi jwa Modimo. Ka nako nngwe, fa a sena go fepa banna ba ba ka nnang 5 000 (gongwe e le batho ba ba ka fetang 10 000 re bala le basadi le bana) ka kgakgamatso, setlhopha sengwe sa Bajuda se ne sa batla go mo tsaya go mo dira kgosi ya selefatshe. Jesu o ne a dira eng? O ne a “ñōñwaèlèla kwa thabeñ a le esi.” (Yoh. 6:1-15; bapisa Luke 19:11, 12; Ditihō 1:6-9.) Le mororo a ne a dira dikgakgamatso tse dintsi tsa go fodisa, Jesu o ne a sa itsiwe thatathata jaaka Modiradikgakgamatso, mme go na le moo, o ne a itsiwe ke badumedi le ba eseng badumedi jaaka “Moruti.”—Math. 8:19; 9:11; 12:38; 19:16; 22:16, 24, 36; Yoh. 3:2.

Go bonala sentle gore go neela bosupi ka Bogosi jwa Modimo e ne e le tiro e e botlhokwa go gaisa e Jesu a neng a ka e dira. Ke thato ya ga Jehofa gore motho mongwe le mongwe a itse se Bogosi jwa Gagwe e leng sone le kafa bo tlileng go diragatsa maikaelelo a Gagwe ka gone. O bo rata thata, ka gonne O tlile go bo dirisa go tlotlomatsa leina la Gagwe, a tlosa kgobo yotlhe e e leng mo go lone. Jesu o ne a itse seno, mme ka gone o ne a dira gore Bogosi joo e nne setlhogo sa thero ya gagwe. (Math. 4:17) Ka go nna le seabe ka pelo yotlhe mo go boleleng ka jone, Jesu o ne a tlotlomatsa bolaodi jo bo siameng jwa ga Jehofa.

Mosupi Yo O Ikanyegang le go Fitlha Losong

Ga go na ope yo o neng a ka rata Jehofa le bolaodi jwa Gagwe go gaisa Jesu. Jaaka “motsalwa pele mo lobopoñ lotlhe,” Jesu ‘o ne a itse’ Rara ‘ka botlalo’ go tloga ka nako ya fa ba ne ba nna mmogo jaaka ditshedi tsa moya kwa legodimong. (Bakol. 1:15; Math. 11:27) O ne a ile a ikobela bolaodi jwa Modimo ka boitumelo ka dingwaga di le dintsintsi pele monna wa ntlha le mosadi ba bopiwa. (Bapisa Yohane 8:29, 58.) Abo a tshwanetse a bo a ne a utlwa botlhoko thata jang ne fa Adame le Efa ba ne ba gana go laolwa ke Modimo! Lefa go ntse jalo, o ne a leta ka bopelotelele kwa magodimong ka dingwaga tse di ka nnang 4 000, mme kgabagare, morago ga foo, go ne ga tla nako ya gore a direle jaaka mosupi wa ga Jehofa yo mogolo go gaisa botlhe mo lefatsheng!

Jesu o ne a itse sentle gore dikgang tsa lobopo di ne di mo ama ka tlhamalalo. Go tshwanetse ga bo go ne go bonala ekete Jehofa o ne a mo sireleditse. (Bapisa Yobe 1:9-11.) Gone ke boammaaruri gore o ne a itshupile gore o a ikanyega le gore o ineetse mo go ene fa a ne a santse a le kwa legodimong, mme a o ne a ka boloka bothokgami joo jaaka motho mo lefatsheng fa a ne a lekwa ka tsela epe fela? A o ne a ka kgona go emelana le Satane a le mo boemong jo gongwe mmaba wa gagwe a neng a le maatla thata mo go jone?

Mmaba yo o tshwanang le noga o ne a se ka a senya nako. Ka bonako fela fa Jesu a sena go kolobediwa le go tlodiwa, Satane o ne a mo leka gore a supe moya wa bogagapa, gore a itlotlomatse, mme kgabagare a felele a ganne go laolwa ke Rraagwe. Mme polelo e e utlwalang sentle ya ga Jesu eo a neng a e bolelela Satane a re, “U ōbamèlè Yehofa Modimo oa gago, ke èna esi eo u tla mo dihèlañ,” e ne e bontsha gore o eme kae mo dikgannyeng tseno. Abo a ne a farologane jang ne le Adame!—Math. 4:1-10.

Tiro e Jesu a neng a e neetswe e ne e bolela gore o tshwanetse go bogisiwa a bo a bolawe, mme Jesu o ne a itse seno sentle. (Luke 12:50; Baheb. 5:7-9) Lefa go ntse jalo, “o rile a hitlhèlwa a le mo popegoñ ea motho, a ikokobetsa, a ineèla hèla le mo loshuñ, ebong e e leñ losho loa mokgōrō.” (Bafil. 2:7, 8) Ka gone Jesu o ne a bontsha gore Satane ke moaki yo mogolo, a araba potso eno ka botlalo e e reng, A motho ope fela o tla kgona go ikanyega mo Modimong jaaka molaodi wa gagwe fa Satane a letliwa go mo leka? Mme loso lwa ga Jesu lo ne lwa kgona go dira sengwe se se fetang seo.

Fa a ne a swela mo koteng e a neng a bogisediwa mo go yone, Jesu o ne a ntsha le “botshelō yoa gagwè go nna thèkololō ea batho ba le bantsi.” (Math. 20:28; Mar. 10:45) Botshelo jwa gagwe jwa motho yo o itekanetseng bo ne bo kgona go nna setlhabelo. Lebaka la go bo Jesu a ntshitse botshelo jwa gagwe setlhabelo ga le dire fela gore go kgonege gore re itshwarelwe maleo a rona mme gape le re bulela tshono ya gore re bone botshelo jo bo sa khutleng mo lefatsheng la paradaise, tumalanong le boikaelelo jwa Modimo jwa ntlha.—Luke 23:43; Dit. 13:38, 39; Baheb. 9:13, 14; Tshen. 21:3, 4.

Jehofa o ne a supa gore o rata Jesu le gore o mo amogela jaaka “moshupi eo o ikanyegañ” ka go mo tsosa mo baswing ka letsatsi la boraro. Seno se ne se tlhomamisa gore bosupi jo Jesu a neng a bo neetse kaga Bogosi bo ne bo le boammaaruri. (Dit. 2:31-36; 4:10; 10:36-43; 17:31) Jesu o ne a tlhatlogela kwa legodimong fa a sena go nna malatsi a le 40 mo lefatsheng, e leng nako e mo go yone a neng a itlhagisa makgetlo a le mmalwa mo baaposetoloing ba gagwe.—Dit. 1:1-3, 9.

Jesu o ne a bontshitse gore Bogosi jwa Modimo jwa Bomesia bo ne bo tla tlhomiwa mo nakong e e kwa pele mo isagweng. (Luke 19:11-27) Tiragalo eo gape e ne e tla tshwaya go simologa ga ‘go nna teng ga ga Jesu le ga bokhutlo jwa lefatshe.’ (Math. 24:3, NW) Mme balatedi ba gagwe ba ba mo lefatsheng ba ne ba ka kgona go bona jang gore dilo tseno di tla direga leng? Jesu o ne a ba neela “seshupō”—sesupo sa dikarolo tse dintsi se se neng se na le bosupi bo le bontsi, go akaretsa le dintwa, dithoromo tsa lefatshe, go tlhaela ga dijo, malwetsi, le go oketsega ga boikepo. Karolo e e botlhokwa thata ya sesupo seno gape e ne e tla nna gore mafoko a a molemo a Bogosi a ne a tla rerwa mo lefatsheng lotlhe le le agilweng e le sesupo mo merafeng yotlhe. Dikarolo tsotlhe tsa sesupo seo se se bonalang sentle di ka bonwa mo motlheng ono wa rona, di bontsha gore re tshela mo nakong ya fa Jesu a setse a le teng jaaka Kgosi ya selegodimo le mo nakong ya bokhutlo jwa tsamaiso eno ya dilo.a—Math. 24:3-14.

Lefa go ntse jalo go tweng ka balatedi ba ga Jesu? Mo nakong eno ya fa Jesu a setse a le teng, batho ba ba ngaparetseng dikereke tse di farologaneng ba bolela gore ba latela Keresete. (Math. 7:22) Lefa go ntse jalo, Bibela e bolela gore go na le “tumèlō e le ñwe hèla.” (Baef. 4:5) Ka jalo o ka kgona jang go bona phuthego ya boammaaruri ya Bokeresete, e e amogelwang ke Modimo ebile e kaelwa ke ene? O ka kgona go dira seno ka go tlhatlhoba se Dikwalo di se bolelang kaga phuthego ya Bokeresete ya lekgolo la ntlha la dingwaga mme o bone gore ke bomang gompieno ba ba dirang jaaka bone.

[Ntlhanyana e e kwa tlase]

[Mafoko a a mo go tsebe 20]

‘O ne a tsholetswe go tla go neela bosupi ka boammaaruri’

[Mafoko a a mo go tsebe 21]

Jesu o ne a dira gore Bogosi jwa Modimo e nne setlhogo sa thero ya gagwe

[Mafoko a a mo go tsebe 22]

Jesu Keresete e ne e le mosupi yo mogolo go gaisa wa ga Jehofa mo lefatsheng

[Setshwantsho se se tletseng mo go tsebe page 23]