Kgaolo 33

Go Tswelela Pele Re Itisitse

“EREKA Jesu a ne a boletse ka phepafalo gore go ne go sena motho ope yo o neng a ka itse ‘letsatsi’ lefa e le ‘nako’ ya fa Rara a ne a tla bo a laela gore morwa a ‘tle’ go tlhasela tsamaiso e e boikepo ya dilo ya ga Satane, bangwe ba ka nna ba botsa jaana: ‘Ke ka ntlha yang fa go potlakile thata jaana gore re tshele re ntse re solofetse gore bokhutlo bo tla tla?’ Go potlakile ka gonne Jesu o ne a oketsa jaana mo e batlileng e le ka nako e le nngwe fela: ‘Nnang lo senka, lo nne lo tsogile . . . lo nne lo itisitse.’ (Mareko 13:32-35, NW)”—Tora ya Tebelo, December 1, 1984.

Basupi ba ga Jehofa ba setse ba na le dingwaga di le masomesome jaanong ba ntse ba disitse. Ba disitse eng? Ba disitse gore Jesu a tle e le kgosi mo Bogosing gore a tle go diragatsa katlholo kgatlhanong le tsamaiso e e boikepo ya dilo ya ga Satane le gore a atolosetse melemo ya puso ya Bogosi jwa gagwe mo lefatsheng lotlhe! (Math. 6:9, 10; 24:30; Luke 21:28; 2 Bathes. 1:7-10) Batho bano ba ba itisitseng ba itse gore “seshupō” sa gore Jesu o teng se sale se bonala go tloga ka 1914 le gore tsamaiso ya jaanong ya dilo e ile ya tsena mo malatsing a yone a bofelo ka one ngwaga oo.—Math. 24:3–25:46.

Mme lefa go ntse jalo, go tla go fitlha jaanong, Jesu ga a ise a tle jaaka Mmolai le Mogolodi. Ka jalo Basupi ba ga Jehofa ba leba boemo jwa bone jwa gone jaanong jang?

‘Ba Tlhomamisega ka Botlalo’ ka Se Ba Se Tlhaloganyang

Jaaka phuthego ya lefatshe lotlhe, ba na le “boitlhōmamishō yo bo tletseñ yoa tlhaloganyō.” (Bakol. 2:2) Ga se gore ba akanya gore ba tlhaloganya sengwe le sengwe kaga maikaelelo a ga Jehofa. Ba tswelela pele ba tlhatlhoba Dikwalo ka mogopolo o o amogelang dintlha tse disha, mme ba tswelela pele ba ithuta. Mme lefa go ntse jalo se ba se ithutang ga se fetole tsela e ba lebang boammaaruri jwa konokono jwa Lefoko la Modimo ka yone. Ba ‘tlhomamisega ka botlalo’ kaga boammaaruri jono jwa motheo; ba ile ba bo dumela le go bo amogela ka masomesome a dingwaga jaanong. Lefa go ntse jalo, se ba se ithutang ka metlha se tokafatsa tsela e ba tlhaloganyang kafa dikwalo tse dingwe di tsenang ka teng mo sekaong sa boammaaruri jwa Bibela le gore ba ka dirisa kgakololo ya Lefoko la Modimo jang ka botlalo mo matshelong a bone.

Gape Basupi ba ga Jehofa ba na le “boitlhōmamishō yo bo tletseñ” malebana le ditsholofetso tsa Modimo. Ba dumela tota gore ga go na epe ya ditsholofetso tsa gagwe e e tla se kang e diragala ka botlalo le gore dilo tseo tsotlhe di tla diragadiwa ka nako ya gagwe e a e tlhomileng. Ka jalo go diragadiwa ga boperofeti jwa Bibela goo ba go boneng ebile ba go itemogetse go dira gore ba tlhomamise ka botlalo gore lefatshe la jaanong le mo “motlheñ oa bokhutlō” le gore tsholofetso ya Modimo ya lefatshe le lesha la tshiamo e tla diragadiwa mo lobakeng lo lokhutshwane.—Dan. 12:4, 9; Tshen. 21:1-5.

Jalo he, ba tshwanetse gore ba bo ba dira eng? “Itiseñ, lo lebèlèlè,” go ne ga laela jalo Jesu, “gonne ga lo itse lobaka, go re, ke lohe. Ke gōna, [itiseng] . . . e se re kgotsa ha a ka tla ka choganeco a lo hitlhèla lo robetse. Me se ke se raeañ lona, ke se raea botlhe hèla, ka re, [itiseng, NW].” (Mar. 13:33, 35-37) Basupi ba ga Jehofa ba itse sentle gore go tlhokega gore ba nne ba lebeletse.

Go tlhoafalela ga bone thata go bona boperofeti bongwe bo diragadiwa go ba ileng ba go supa ka dinako dingwe ga go fetole bosupi jo bo saleng bo ntse bo oketsega go tloga ka Ntwa ya Lefatshe I jwa gore re mo bokhutlong jwa tsamaiso ya dilo. Kwantle ga pelaelo, go botoka fela thata go tlhoafala—le eleng go tlhoafala fela thata—o tlhoafalela go bona thato ya Modimo e diragadiwa go na le go robala semoyeng fa go tla mo go diragadiweng ga maikaelelo a gagwe!—Bapisa Luke 19:11; Ditihō 1:6; 1 Bathesalonia 5:1, 2, 6.

Lefa go ntse jalo, go nna o itisitse go akaretsa eng?

O Ka Dira Jang Gore O Nne O Ntse O Itisitse?

Bakeresete ba ba nnang ba itisitse ga ba phuthe matsogo fela ba bo ba leta ba sa dire sepe. Le eseng! Ba tshwanetse gore ba nne ba tshedile sentle semoyeng gore fa Jesu a tla jaaka Mmolai, e tle e nne Mogolodi wa bone. (Luke 21:28) “Lo itlhōkōmelè,” Jesu o ne a tlhagisa jalo, “gore e se re kgotsa dipelo tsa lona tsa imahadiwa ke go kgora bobe le ke go tagwa, le ke ditlhodiègèlō tsa botshelō yono, me letsatsi yeuō ya lo wèla ka choganeco yaka seru. . . . Lebèlèlañ.” (Luke 21:34-36) Ka jalo Bakeresete ba ba itisitseng ba tshwanetse gore pele ‘ba itlhokomele,’ ba ele tlhoko gore ba tshela letsatsi lengwe le lengwe jaaka Mokeresete a tshwanetse go tshela. Ba tshwanetse gore ba nne ba tsogile gore ba bone kafa ba ka dirang maikarabelo a Bokeresete ka teng mme ba tile boitsholo jo e seng jwa bokeresete jo bo ka bonwang mo lefatsheng le le ‘namaletseng kafa tlase ga yo o bosula.’ (1 Yoh. 5:19; Bar. 13:11-14) Fa Keresete a tla ba tshwanetse gore ba bo ba iketleeditse.

Jalo he, ke bomang bao ruri ba ileng ba nna ba tsogile, ba itekanetse sentle semoyeng? Rekoto ya hisitori e e mo dikgaolong tse di kwa pele mo kgatisong eno e bontsha gore ke Basupi ba ga Jehofa. Go phepafetse gore ba tsaya maikarabelo a go nna Bakeresete masisi. Ka sekai, ka nako ya ntwa, ba ile ba ineela go tsenngwa mo kgolegelong kana ba bolawa ka gonne ba ne ba tsogile fa go tliwa mo go se ba tshwanetseng gore ba se dire eleng go se nne karolo ya lefatshe le go bontshana lorato lwa go intsha setlhabelo. (Yoh. 13:34, 35; 17:14, 16) Batho ba ba ba elang tlhoko kwa Diholong tsa bone tsa Bogosi, kwa dikopanong tsa bone tse dikgolo, kana le eleng mo ditirong tsa bone tsa boitshediso ba kgatlhiwa ke ‘mokgwa wa bone o montle.’ (1 Pet. 2:12) Mo lefatsheng leno le le ‘feletsweng ke maikutlo,’ ba itsege e le batho ba ba tshelang ka go ikanyega, ebile ba na le maitsholo a a phepa.—Baef. 4:19-24; 5:3-5.

Lefa go ntse jalo, go nna re itisitse go kaya sengwe se se fetang go ‘itlhokomela.’ Molebedi o tshwanetse go itsise ba bangwe se a se bonang. Mo motlheng ono wa bofelo, Bakeresete ba ba bonang ka phepafalo sesupo sa gore Keresete o teng ba tshwanetse go bolelela ba bangwe ‘mafoko a a molemo a bogosi’ le go ba tlhagisa gore mo lobakeng lo lokhutshwane Keresete o tla tla mme a diragatse katlholo kgatlhanong le tsamaiso eno e e boikepo ya dilo. (Math. 24:14, 30, 44) Ka tsela eno ba thusa ba bangwe gore ba tle ba tshwanele “thekololō.”—Luke 21:28.

Ke bomang ba ba ileng ba itshupa gore ba itisitse ka go tlhagisa ba bangwe? Basupi ba ga Jehofa ba itsege mo lefatsheng lotlhe ka go tlhoafalela ga bone go bolela leina la Modimo le Bogosi jwa gagwe. Ga ba tlogelele setlhopha sengwe sa baruti gore e nne sone se dirang tiro ya go rera. Ba lemoga gore ke boikarabelo jwa badumedi botlhe. Ba go leba e le karolo ya botlhokwa ya kobamelo ya bone. (Bar. 10:9, 10; 1 Bakor. 9:16) Matswela e nna afe?

Jaanong ba bopa phuthego e e golang ya maloko a a tlhaga a le dimilione mo dinageng di feta 220 mo lefatsheng lotlhe. (Isa. 60:22; bapisa Ditihō 2:47; 6:7; 16:5.) Dingwe tsa dipuso tse di nonofileng go gaisa mo hisitoring ya batho di ile tsa thibela tiro ya bone, tsa ba phutha le go ba latlhela mo kgolegelong. Mme lefa go ntse jalo Basupi ba ga Jehofa ba ile ba tswelela pele ba bolela Bogosi jwa Modimo! Ba iketleeditse jaaka baaposetoloi ba ba ileng ba bolela jaana fa ba laelwa gore ba kgaotse go rera: “Fa e le rona, ga re kitla re kgaotsa go bua ka dilo tse re di boneng le tse re di utlwileng.” “Re na le go utlwa Modimo bogolo go batho.”—Dit. 4:18-20, NW; 5:27-29.

“Lo E Letè”

Boemo jwa Basupi ba ga Jehofa gompieno bo tshwana le jwa Bakeresete ba kwa Judea ba lekgolo la ntlha la dingwaga. Jesu o ne a ba neetse sesupo se ba neng ba tla itse ka sone fa e le nako ya gore ba tshabe ba tswe mo Jerusalema gore ba falole fa e senngwa. “Me e tla re lo bōna Yerusalema o dikilwe ke dintwa, . . . [lo tshabe],” Jesu o ne a rialo. (Luke 21:20-23) Dingwaga di feta 30 go sekae fela morago ga foo, ka 66 C.E., Jerusalema e ne ya dikaganyediwa ke masole a Baroma. Fa masole a Baroma a tsamaya ka tshoganetso fela kwantle ga lebaka lepe, Bakeresete ba kwa Judea ba ne ba latela ditaelo tsa ga Jesu mme ba tshaba—eseng go tswa mo Jerusalema fela mme mo nageng yotlhe ya Judea—ba tshabela kwa motseng mongwe kwa Perea o o bidiwang Pella.

Ba ne ba leta koo ba sireletsegile. Ngwaga wa 67 C.E. o ne wa tsena wa ba wa feta. Go tswa foo wa 68 o ne wa salwa morago ke wa 69. Lefa go ntse jalo, Jerusalema o ne a nna a ntse a gololesegile. A ba ne ba ka boa? Kana gone, Jesu o ne a sa ba bolelela gore ba ne ba tla leta lobaka lo lo kana kang. Mme lefa go ntse jalo, fa e le gore bape mo go bone ba ne ba boa, ba ne ba ikwatlhaya, ka gonne ka 70 C.E. masole a Baroma a ne a boa ka dipalo tse di neng tsa dira gore ba nne jaaka ekete ke morwalela o o neng o ka se ka wa thibiwa, mme jaanong gone ga a ka a boela morago. Go na le moo a ne a ripitla motse mme a bolaya batho ba feta milione. Abo Bakeresete bao ba kwa Judea ba ba neng ba le kwa Pella ba ile ba itumela jang ne go bo ba ile ba emela nako ya ga Jehofa e a e tlhomileng gore a diragatse katlholo!

Go ntse jalo le ka ba ba nnang ba itisitse gompieno. Ba lemoga ka botlalo gore fa re ntse re tsenelela kwa teng mo nakong eno ya bokhutlo, ga go kitla go nna motlhofo gore re nne re lebeletse gore Jesu a tle. Mme lefa go ntse jalo ba santse ba dumela mafoko ano a ga Jesu: “Amarure kea lo raea, Losika lo ga lo ketla lo heta go tlo go tsamaee diIō cotlhe tse di dihale pele.” (Math. 24:34) Mafoko a a reng “dilō cotlhe tse” a lebisitse mo dikarolong tse di farologaneng tsa “seshupō” se se nang le dikarolo tse dintsi. Sesupo seno se sale se bonala go tloga ka 1914 mme se tla fitlha konelong ya sone ka “sepitla se segolo.” (Math. 24:21) “Losika” lo lo neng lo tshela ka 1914 lo fela ka bofefo. Bokhutlo ga bo kake jwa bo bo le kgakala thata.

Go ntse go le jalo, Basupi ba ga Jehofa ba ititeile sehuba tota gore ba tla nna ba itisitse, ba dumela tota gore Modimo o tla diragatsa ditsholofetso tsa gagwe tsotlhe ka nako ya gagwe e e tshwanetseng! Ba utlwa mafoko a ga Jehofa ao a a boleletseng moperofeti Habakuke. Jehofa o ne a laela moperofeti yono gore a kwale jaana kaga boemo jo bo neng bo lebega ekete Jehofa o letlile boikepo mo bogosing jwa Juda mo karolong ya bofelo ya lekgolo la bosupa la dingwaga B.C.E.: “Kwala pōnatshègèlō e [e e amang bokhutlo jwa maemo a a gatelelang], me u dihè gore e bōnalè sentlè mo dimatiñ tsa kwalèlō, gore motho a tlè a e balè a ntse a taboga. Gonne pōnatshègèlō e sa nntse e na le lobaka lo lo laocweñ, me e be e itlhaganèlèla bokhutlō, ga e ketla e aka: leha e [le go] dièga, Lo e letè; gonne rure e tla tla, ga e ketla e dièga.” (Hab. 1:2, 3; 2:2, 3) Ka tsela e e tshwanang, Basupi ba ga Jehofa ba ikanya tshiamo le tshiamiso tsa ga Jehofa, mme seno se ba thusa gore ba nne tekatekano mme ba emele “lobaka” lo Jehofa a lo tlhomileng.

F. W. Franz, yo o kolobeditsweng ka 1913 o ne a tlhalosa kafa Basupi ba ga Jehofa ba ikutlwang ka teng. O ne a bolela jaana ka 1991, e le poresidente wa Mokgatlho wa Watch Tower:

“Tsholofelo ya rona ke sengwe sa mmatota, mme e tla diragadiwa ka botlalo mo go mongwe le mongwe wa maloko a a 144 000 a letsomanyane ka selekanyo se se fetang kgakala se re kileng ra se akanya. Rona ba masalela ba re neng re le teng ka ngwaga wa 1914, ka nako ya fa re ne re solofetse gore rotlhe re tla ya legodimong, ga re a tlogela go tseela tsholofelo eo kwa godimo. Mme go na le moo re e tlhoafaletse go feta pele, mme re e anaanela thata fa lobaka lo re e letelang ka lone lo ntse lo oketsega. Ke sengwe se se botlhokwa go ka emelwa, lefa e ne e ka tlhoka go emelwa dingwaga di le milione. Ke tseela tsholofelo ya rona kwa godimo thata go feta pele, mme le ka motlha ga ke batle go kgaotsa go e anaanela. Tsholofelo ya letsomanyane gape e re tlhomamisetsa gore kwantle ga pelaelo tsholofelo ya boidiidi jo bogolo e tla diragadiwa ka tsela e e molemolemo go feta kafa re neng re ka akanya ka teng. Ke gone ka moo re ntseng re tshwareletse go fitlha ka nako eno, mme re tla tshwarelela go fitlha fa Modimo o setse o diragatsa ‘ditsholofetso tsa gagwe tse di tlhokegang le tse dikgolo thata.’”—2 Pet. 1:4; Dipa. 23:19; Bar. 5:5.

Nako ya gore go bonale ka phepafalo mo bathong botlhe gore Keresete o teng a na le nonofo jaaka kgosi mo Bogosing e ntse e atamela ka bofefo. Ka nako eo, ba ba lebeletseng ba tla “[amogela] polèlō ea choloheco.” (Baheb. 10:36) Eleruri, dilo tse ba di solofetseng di tla ‘diragadiwa ka tsela e e molemolemo go gaisa kafa ba neng ba akantse ka teng.’ Abo ba tla itumela le go leboga jang ne go bo e ile ya nna bone ba ba neng ba nna ba itisitse mo malatsing a bofelo a tsamaiso eno e e boikepo ya dilo, ba bolela ka tlhoafalo kaga Bogosi jwa Modimo!

[Mafoko a a mo go tsebe 713]

Ba tlhomamisa tota gore lefatshe la jaanong le “mo motlheñ oa bokhutlō”

[Mafoko a a mo go tsebe 714]

Ba ela tlhoko gore ba tshela letsatsi lengwe le lengwe jaaka Mokeresete a tshwanetse go tshela

[Mafoko a a mo go tsebe 715]

Ke bomang ba ba ileng ba itshupa gore ba itisitse ka go tlhagisa ba bangwe?

[Mafoko a a mo go tsebe 716]

“Ke tseela tsholofelo ya rona kwa godimo thata go feta pele, mme le ka motlha ga ke batle go kgaotsa go e anaanela”—F. W. Franz

[Lebokoso/Setshwantsho mo go tsebe 717]

Dipego tsa Lefatshe Lotlhe tsa go Neela Bosupi

Ngwaga Dinaga

1920 ....... 46

1925 ....... 83

1930 ....... 87

1935 ...... 115

1940 ...... 112

1945 ...... 107

1950 ...... 147

1955 ...... 164

1960 ...... 187

1965 ...... 201

1970 ...... 208

1975 ...... 212

1980 ...... 217

1985 ...... 222

1992 ...... 229

Palo Yotlhe ya Dinaga

Palo ya dinaga e badilwe go ya ka mokgwa o lefatshe le neng le kgaogantswe ka one fa bo1990 ba ne ba simologa, eseng go ya kafa le neng le kgaogantswe ka teng ka nako eo go ya ka gore di busiwa ke puso efe, ka sekai, eseng go ya kafa merafe e jaanong e ipusang e neng e kgaogantswe ka teng ka nako ya fa e ne e busiwa ke dinaga tse e kileng ya bo e le mebusomegolo.

Ngwaga Diphu.

1940 ...... 5,130

1945 ...... 7,218

1950 ..... 13,238

1955 ..... 16,044

1960 ..... 21,008

1965 ..... 24,158

1970 ..... 26,524

1975 ..... 38,256

1980 ..... 43,181

1985 ..... 49,716

1992 ..... 69,558

Palo Yotlhe ya Diphuthego

Pele ga 1938 go ne go sena rekoto epe e e tlhomameng ya palo yotlhe ya diphuthego tsa merafe yotlhe.

Ngwaga Babo.

1935 .. ... 56,153

1940 ...... 96,418

1945 ..... 156,299

1950 ..... 373,430

1955 ..... 642,929

1960 ..... 916,332

1965 ... 1,109,806

1970 ... 1,483,430

1975 ... 2,179,256

1980 ... 2,272,278

1985 ... 3,024,131

1992 ... 4,472,787

Palo Yotlhe ya Baboledi ba Bogosi

Mokgwa wa go bala baboledi o ile wa fetolwa gantsi ka bo1920 le kwa tshimologong ya bo1930. Dipego tsa diphuthego di ne di romelwa kwa Mokgatlhong beke le beke, go na le go romelwa gangwe ka kgwedi. (Mokgwa wa go bega ka kgwedi o ne wa simololwa ka October 1932.) Go ya ka “Bulletin” ya January 1, 1929, gore motho a tle a balelwe mo badiring ba setlhopha (mmoledi wa phuthego), o ne a tshwanetse gore a senye diura tse di seng kafa tlase ga tse 3 ka beke (kana tse 12 ka kgwedi) mo tirelong ya tshimo. Ba ba tlhaga (baboledi ba ba kwa thoko) ba ne ba tshwanetse gore ba dirise diura tse di seng kafa tlase ga tse pedi mo bekeng ba neela bosupi.

Ngwaga Babulatsela

1920 ......... 480

1925 ....... 1,435

1930 ....... 2,897

1935 ....... 4,655

1940 ....... 5,251

1945 ....... 6,721

1950 ...... 14,093

1955 ...... 17,011

1960 ...... 30,584

1965 ...... 47,853

1970 ...... 88,871

1975 ..... 130,225

1980 ..... 137,861

1985 ..... 322,821

1992 ..... 605,610

Babulatsela

Dipalo tse di fa godimo tseno di akaretsa babulatsela ba ka metlha, babulatsela ba ba thusang, babulatsela ba ba kgethegileng, barongwa, balebedi ba potologo, le balebedi ba kgaolo. Babulatsela pele ba ne ba bidiwa barekisi ba dibuka, mme babulatsela ba ba thusang ba ne ba bidiwa barekisi ba dibuka ba ba thusang. Dipalo tsa dingwaga tse dintsi ke dipalogare tsa dikgwedi.

Ngwaga Dith. Bi.

1945 ....... 104,814

1950 ....... 234,952

1955 ....... 337,456

1960 ....... 646,108

1965 ....... 770,595

1970 ..... 1,146,378

1975 ..... 1,411,256

1980 ..... 1,371,584

1985 ..... 2,379,146

1992 ..... 4,278,127

Dithuto tsa Magae tsa Bibela

Ka bo1930, dithuto dingwe di ne di tshwarwa le batho ka bongwe, mme gantsi go ne go gatelelwa thata gore batho ba rutiwe tsela e ba ka ithutang ka yone ka bobone le go rulaganya ditlhopha tsa thuto tse di neng di ka tliwa ke batho bangwe ba ba kgatlhegang ba ba mo lefelong leo. Moragonyana, fa motho a kgatlhega tota, go ne go ithutiwa le bone go fitlha ba bo ba kolobediwa. Mme moragonyana ga foo gape, go ne go kgothalediwa go tsweledisa thuto go fitlha motho a thusitswe tota gore e nne Mokeresete yo o godileng sentle.

Dingwaga Diura

1930-35 ....... 42,205,307

1936-40 ....... 63,026,188

1941-45 ...... 149,043,097

1946-50 ...... 240,385,017

1951-55 ...... 370,550,156

1956-60 ...... 555,859,540

1961-65 ...... 760,049,417

1966-70 .... 1,070,677,035

1971-75 .... 1,637,744,774

1976-80 .... 1,646,356,541

1981-85 .... 2,276,287,442

1986-92 .... 5,912,814,412

Palo Yotlhe ya Diura

Go ne go sa begiwe sepe go fitlha kwa bokhutlong jwa bo1920. Mokgwa wa go bala diura o ile wa fetolwa gantsi: Kwa tshimologong ya bo1930, go ne go balwa diura tse di tserweng go neelwa bosupi ka ntlo le ntlo fela go sa balwe e e senngwang fa go dirwa maeto a go boela. Lefa pego e e fa godimo e itumedisa thata, gone ke palo fela e e fopholediwang ya nako e ntsi e e dirisitsweng ke Basupi ba ga Jehofa go itsise ka Bogosi jwa Modimo.

Dingwaga Dibu. Tsamai.

1920-25 ....... 38,757,639

1926-30 ....... 64,878,399

1931-35 ...... 144,073,004

1936-40 ...... 164,788,909

1941-45 ...... 178,265,670

1946-50 ...... 160,027,404

1951-55 ...... 237,151,701

1956-60 ...... 493,202,895

1961-65 ...... 681,903,850

1966-70 ...... 935,106,627

1971-75 .... 1,407,578,681

1976-80 .... 1,380,850,717

1981-85 .... 1,504,980,839

1986-92 .... 2,715,998,934

Dibuka Tse Di Tsamaisitsweng

Kwa ntle ga mo mabakeng a sekae fela, palo ya dibuka pele ga 1940 ga e akaretse ya dimakasine tse di ileng tsa tsamaisiwa, le mororo dimilione tsa dikopi tsa tsone di ile tsa tsamaisiwa. Dipalo tsa go tloga ka 1940 ke tsa dibuka, dibukana, diboroutšhara, dimakasine, mme ga di akaretse palo ya dimilione tsa dipampitshana tse le tsone di ileng tsa dirisiwa go dira gore batho ba kgatlhegele molaetsa wa Bogosi. Palo yotlhe ya 10 107 565 269 ya dibuka tse di ileng tsa tsamaisiwa go tloga ka 1920 go fitlha ka 1992 ka dipuo tse di fetang 290 e neela bosupi jwa tiro e kgolo thata ya go neela bosupi e e dirilweng mo lefatsheng lotlhe.

Ngwaga Pal. Baji.

1935 ...... 63,146 ... 52,465

1940 ...... 96,989 ... 27,711

1945 ..... 186,247 ... 22,328

1950 ..... 511,203 ... 22,723

1955 ..... 878,303 ... 16,815

1960 ... 1,519,821 ... 13,911

1965 ... 1,933,089 ... 11,550

1970 ... 3,226,168 ... 10,526

1975 ... 4,925,643 ... 10,550

1980 ... 5,726,656 .... 9,564

1985 ... 7,792,109 .... 9,051

1992 .. 11,431,171 .... 8,683

Palo ya Batlasegopotsong le Ba Ba Jang

Dipalo tse di leng teng tsa ba ba neng ba tlile Segopotsong tsa pele ga 1932 gantsi ga di a felela. Ka dinako tse dingwe, e ne e le ditlhopha tsa ba le 15, 20, 30 kgotsa go feta tse di neng di tsenngwa mo palong yotlhe e e kwadilweng. Se se kgatlhang ke gore, dingwaga tse dintsi tsa tse go nang le dipalo tsa tsone di bontsha gore gone palonyana e e rileng ya batlasegopotsong e ne e sa je. Ka 1933 di ne di farologane ka bo 3 000.