Go Itshikinya Mmele le Tebego ya Sefatlhego

BATHO ba ditso dingwe ba dirisa boitshikinyo jwa mmele motlhofo fela go feta ba ditso tse dingwe. Le fa go ntse jalo, mo e batlang e nna mongwe le mongwe o bua a fetola tebego ya sefatlhego le go itshikinya mmele ka tsela nngwe. Go ntse jalo fa motho a itlotlela fela le ba bangwe kgotsa a bua phatlalatsa.

Go itshikinya mmele go ne go itlela fela ka tlholego mo go Jesu le mo barutweng ba gagwe ba bogologolo. Nako nngwe mongwe o ne a begela Jesu gore mmaagwe le bomorwarraagwe ba ne ba batla go bua le ene. Jesu o ne a araba jaana: “Mmè ke mang, le bomorwarre ke bomang?” Morago ga moo Baebele e oketsa jaana: “Ya re a otlololela seatla sa gagwe kwa barutweng ba gagwe, a re: ‘Bona! Mmè le bomorwarre!’” (Math. 12:48, 49) Gareng ga tse dingwe, Baebele e bontsha mo go Ditiro 12:17 le 13:16 gore moaposetoloi Petere le moaposetoloi Paulo le bone go ne go itlela fela gore ba itshikinye mmele fa ba bua.

Ga o bolelele motho yo mongwe dikgopolo tsa gago le maikutlo a gago ka go dirisa lentswe fela mme gape le ka go dirisa boitshikinyo jwa mmele le tebego ya sefatlhego. Go sa di dirise sentle go ka nna ga naya ba bangwe kgopolo ya gore yo o buang ga a kgatlhegele se a se buang. Mme fa ditsela tseno tsa go itlhalosa di tswakantswe sentle ka tsela e ntle, di dira gore puo e nne le matswela a mantle fela thata. Tota le fa o bua mo founong, fa o dirisa boitshikinyo jo bo tshwanetseng jwa mmele le tebego ya sefatlhego, lentswe la gago le tla fetisa botlhokwa jwa molaetsa wa gago ka bonako le tsela e o ikutlwang ka yone ka se o se buang. Ka jalo, le fa o ipuela fela selo se se sa kwalwang fa fatshe kana o bala, le fa bareetsi ba gago ba go lebile kana ba lebile mo Dibaebeleng tsa bone, boitshikinyo jwa mmele le tebego ya sefatlhego di botlhokwa.

Boitshikinyo jwa gago jwa mmele le tebego ya sefatlhego ga di a tshwanela go nna tse o di ithutileng mo bukeng nngwe. Ga o a ithuta go tshega kgotsa go galefa. Mme le boitshikinyo jwa mmele bo tshwanetse go bontsha maikutlo a a mo teng ga gago. Fa boitshikinyo jwa gago jwa mmele bo itlela fela, o kgona go bo dira botoka.

Boitshikinyo jwa mmele bo kgaogantswe ka dikarolo tse pedi tsa konokono: jo bo tlhalosang le jo bo gatelelang. Boitshikinyo jwa mmele jo bo tlhalosang bo tlhalosa se se diregang kgotsa bo bontsha bogolo jwa selo kgotsa lefelo. Fa o berekela mo kgannyeng ya go dirisa boitshikinyo jwa mmele mo sekolong, o se ka wa kgotsofalela go bo dirisa gangwe kgotsa gabedi fela. Leka go dirisa boitshikinyo jwa mmele ka tsela ya tlholego fela mo puong yotlhe ya gago. Fa o na le bothata jwa go dira jalo, o ka nna wa go fitlhela go thusa go batla mafoko a a bontshang gore selo se ntlha efe, a a bontshang sekgala, bogolo le lefelo. Le fa go ntse jalo, mo makgetlong a le mantsi, o tlhoka fela go itse puo ya gago sentle, o sa tshwenyege kaga gore batho ba akanya eng ka wena, mme o bua le go dira dilo ka tsela e o di dirang ka yone letsatsi le letsatsi. Fa motho a repile, boitshikinyo jwa mmele bo itlela fela.

Boitshikinyo jwa mmele jo bo gatelelang bo bontsha maikutlo le go tlhwatswega pelo. Bo dira gore dikgopolo dingwe di tlhomologe, di nne le botshelo e bile bo a di nonotsha. Boitshikinyo jwa mmele jo bo gatelelang bo botlhokwa thata. Le fa go ntse jalo ela tlhoko! Go motlhofo gore boitshikinyo jwa mmele jo bo gatelelang bo fetoge mokgwa fela o o se nang bokao. Fa o dirisa boitshikinyo jwa mmele bo le bongwe fela gangwe le gape, seno se ka dira gore bareetsi ba tlhome mogopolo mo go se o se dirang go na le mo puong ya gago. Fa molebedi wa gago wa sekolo a go bontsha gore o na le bothata jono, leka go fetsa nakonyana o dirisa boitshikinyo jwa mmele jo bo tlhalosang fela. Morago ga nakonyana, simolola gape go dirisa boitshikinyo jwa mmele jo bo gatelelang.

Fa o batla go bona gore o tshwanetse go dirisa boitshikinyo jwa mmele jo bo gatelelang le boitshikinyo jo bongwe jwa mmele go ya bokgakaleng bofe, akanyetsa maikutlo a ba o buang le bone. Go supa bareetsi ka monwana go ka nna ga dira gore ba ikutlwe ba sa phuthologa. Mo ditsong dingwe, fa motho wa monna a ne a ka dirisa boitshikinyo jo bo rileng jwa mmele, jaaka go ipaya seatla mo molomong go supa go gakgamala, go ka nna ga tsewa gore o itshwara jaaka mosadi. Kwa dikarolong dingwe tsa lefatshe, go lejwa e le selo se se seng sentle fa mosadi a bua a dirisa diatla ka phuthologo fela. Ka jalo mo mafelong ao, bokgaitsadi ba tlhoka go dirisa tebego ya sefatlhego ka tsela e e molemo thata. Mme boitshikinyo jo bo feteletseng jwa mmele fa o bua le setlhopha se sennye bo ka nna jwa lejwa e le go dira metlae mo e batlang e nna mo karolong nngwe le nngwe fela ya lefatshe.

Fa o ntse o nna le maitemogelo mme o simolola go kgona go bua o wetse makgwafo, boitshikinyo bope fela jwa mmele jo o bo dirisang bo tla bontsha maikutlo a gago a kafa teng ka tsela ya tlholego fela, bo bontsha kafa o tlhatswegileng pelo ka gone. Bo tla dira gore puo ya gago e nne le bokao.

Tebego ya Sefatlhego sa Gago. Sefatlhego sa gago gantsi se bontsha kafa tota o ikutlwang ka gone go feta karolo epe e nngwe ya mmele. Matlho a gago, molomo wa gago le tsela e o tsamaisang tlhogo ka yone tsotlhe di na le seabe. Kwantle ga go bua sepe, sefatlhego sa gago se ka bontsha gore ga o kgatlhege, o tenegile, o akabetse, o gakgametse kgotsa gore o itumetse. Fa motho a dirisa tebego e e ntseng jalo ya sefatlhego a ntse a bua, seno se dira gore bareetsi ba bone ba bo ba utlwe se a se buang. Mmopi o tsentse mesifa e le mentsi thata mo sefatlhegong sa motho—yotlhe e feta 30. Motho o dirisa mo e batlang e nna halofo ya yone fa a nyenya.

Le fa o le mo seraleng kgotsa o le kwa bodireding jwa tshimo, o leka go abela batho molaetsa o o monate, o o ka ipedisang dipelo tsa bone. Ba bona seo ka monyenyo wa gago o o botsalano. Kafa letlhakoreng le lengwe, fa sefatlhego sa gago se sa bontshe seo, seno se ka nna sa dira gore bareetsi ba ipotse gore a tota o dumela se o se buang.

Mo godimo ga moo, go nyenya go bolelela ba bangwe gore o pelonomi mo go bone. Seno se botlhokwa segolobogolo mo malatsing ano a mo go one batho ba tshabang batho ba ba sa ba itseng. Go nyenya ga gago go ka thusa batho go wela makgwafo le go amogela se o se buang.