“Ke ne Ka Romelwa ka Ntlha ya Seno”

1-4. (a) Jesu o dirisa botswerere jang go ruta mosadi wa Mosamarea, mme go ne ga nna le matswela afe? (b) Baaposetoloi ba gagwe ba tsiboga jang?

JESU le baaposetoloi ba gagwe ba ne ba na le diura di le dintsi ba le mo mosepeleng. Ba ne ba ya kwa bokone, ba tswa kwa Judea ba ya kwa Galalea. Tsela e khutshwane go di gaisa—ya sekgala sa malatsi a le mararo ka maoto—e ba tlhoka gore ba ralale Samarea. Fa e tloga e nna motshegare wa sethoboloko, ba goroga mo motsaneng o o bidiwang Sikara, mme ba fitlha ba ikhutsa teng gore ba bone sengwe sa go ja.

² Fa baaposetoloi ba ga Jesu ba ya go reka dijo, ene o sala a ikhutsitse gaufi le sediba ka kwa ntle ga motse. Mosadi mongwe o tla go ga metsi. Jesu o ne a ka nna a tlhopha go mo itlhokomolosa. O “lapisitswe ke loeto.” (Johane 4:6) Motho o ne a tla tlhaloganya lebaka fa a ne a ka itshela moriti o tsididi a bo a letla gore mosadi yono wa Mosamarea a dire se a se dirang kwantle ga go bua sepe le ene. Jaaka fa re bone mo Kgaolong ya 4 ya buka eno, go ka direga gore mosadi yono o ne a ka lebelela gore Mojuda ope fela a mo lebe ka lonyatso. Le fa go ntse jalo, Jesu o simolola motlotlo le ene.

³ O simolola ka setshwantsho se se amanang le botshelo jwa letsatsi le letsatsi jwa mosadi yono—tota e bile se amana le se mosadi yono a se dirang ka yone nako eo. O tlile fano go tla go ga metsi; Jesu o bua ka metsi a a nayang motho botshelo a a neng a tla mo timola lenyora la semoya. Gangwe le gape mosadi yono o tsosa dikgang tse di ka dirang gore ba ngangisane.a Ka botlhale Jesu o tila go ngangisana le ene ka dilo tseo mme o tswelela ka kgang ya gagwe. O remelela mo dilong tsa semoya—kobamelo e e itshekileng le Jehofa Modimo. Mafoko a gagwe a nna le matswela a magolo, ka gonne mosadi yono o a bolelela banna ba motse, mme le bone ba tla kwa go Jesu ba batla go mo ikutlwela.—Johane 4:3-42.

⁴ Fa baaposetoloi ba boa, ba ikutlwa jang ka bosupi jo bo gakgamatsang jo Jesu a bo neelang foo? Ga go bonale ba itumelela seo. Tota e bile ba gakgamalela gore Jesu o bua le mosadi yono, mme go bonala bone ba sa bue sepe le ene. Fa mosadi yono a sena go tsamaya, ba emelela Jesu gore a je dijo tse ba tlileng le tsone. Le fa go ntse jalo, Jesu o ba raya a re: “Ke na le dijo tse ke di jang tse lo sa di itseng.” Ba a gakgamala mme kwa tshimologong ba akanya gore Jesu o bua ka dijo tsa mmatota. Go tswa foo o tlhalosa jaana: “Dijo tsa me ke gore ke dire thato ya yo o nthomileng le go wetsa tiro ya gagwe.” (Johane 4:32, 34) Ka gone, Jesu o ba ruta gore tiro ya gagwe e kgolo mo botshelong e botlhokwa go feta dijo. O batla gore le bone ba nne le boikutlo jo bo ntseng jalo ka yone. Tiro eo ke efe?

5. Tiro e Jesu a neng a e dira mo botshelong e ne e le efe, mme re tla sekaseka eng mo kgaolong eno?

⁵ Jesu o kile a re: “Ke tshwanetse go bolela dikgang tse di molemo tsa bogosi jwa Modimo, ka gonne ke ne ka romelwa ka ntlha ya seno.” (Luke 4:43) Ee, Jesu o ne a rometswe go tla go rera le go ruta batho dikgang tse di molemo tsa Bogosi jwa Modimo.b Le gompieno balatedi ba ga Jesu ba na le tiro e e ntseng jalo. Ka gone, go botlhokwa go akanyetsa gore ke eng fa Jesu a ne a rera, gore o ne a rera ka eng le gore o ne a ikutlwa jang ka kabelo ya gagwe.

Mabaka A go Bo Jesu A ne A Rera

6, 7. Jesu o ne a batla gore “motlhatlheledi mongwe le mongwe wa batho” a ikutlwe jang ka kgang ya go itsise ba bangwe dikgang tse di molemo tsa bogosi? Tshwantsha.

⁶ A re sekaseke kafa Jesu a neng a ikutlwa ka teng ka boammaaruri jo a neng a bo ruta; go tswa foo re tla tlotla ka boikutlo jo a neng a na le jone ka batho ba a neng a ba ruta. Jesu o ne a dirisa setshwantsho se se utlwalang sentle go bontsha kafa a neng a ikutlwa ka teng ka kgang ya go itsise batho ba bangwe dithuto tsa boammaaruri tse Jehofa a neng a mo rutile tsone. O ile a re: “Motlhatlheledi mongwe le mongwe wa batho, fa a rutilwe ka bogosi jwa magodimo, o tshwana le monna, mong wa ntlo, yo o ntshang mo bobolokelong jwa gagwe jwa matlotlo dilo tse disha le tse dikgologolo.” (Mathaio 13:52) Ke eng fa mong wa ntlo mo setshwantshong seno a ntsha dilo mo bobolokelong jwa gagwe jwa matlotlo?

⁷ Ga se gore mong wa ntlo yono o ntsha matlotlo a gagwe go itlotlomatsa jaaka go kile ga dira Kgosi Hesekia wa bogologolo, yo o neng a lebana le matswela a a botlhoko a go dira jalo. (2 Dikgosi 20:13-20) Ke eng se se tlhotlheletsang mong wa ntlo go dira jalo? Akanya ka sekai seno: O etela morutisi yo o mo ratang kwa legaeng la gagwe. O bula llae a bo a ntsha makwalo a le mabedi—le lengwe le setse le le lesetlha ka ntlha ya go bo e le la bogologolo, le lengwe le lesha. Ke makwalo a a tswang kwa go rraagwe—le lengwe ga a bolo go mo kwalela lone masomesome a dingwaga a a fetileng ka nako ya fa morutisi yono e sa ntse e le ngwana mme le lengwe ke la bosheng jaana. Matlho a gagwe a phatsima ka boitumelo fa a go bolelela kafa a anaanelang makwalo ao ka teng le kafa kgakololo e e mo go one e fetotseng botshelo jwa gagwe ka teng le kafa le wena e ka go thusang ka teng. Go bonala sentle gore morutisi yono o itumelela makwalo ano, o a anaanela fela thata. (Luke 6:45) O go badisa one, e seng ka gonne a batla go itlotlomatsa kana ka gonne a batla go boelwa ke sengwe, go na le moo, o dira jalo ka gonne a batla gore wena o solegelwe molemo le go go bontsha kafa makwalo ao a leng botlhokwa ka teng.

8. Ke eng fa re na le lebaka le le utlwalang la go tsaya dithuto tsa boammaaruri tse re ithutang tsone mo Lefokong la Modimo di le botlhokwa?

⁸ Jesu, Morutisi yo Mogolo, le ene o ne a na le maitlhomo a a ntseng jalo fa a ne a itsise ba bangwe dithuto tsa boammaaruri tsa Modimo. Mo go ene, dithuto tseo tsa boammaaruri di ne di le botlhokwa ka tsela e e sa lekaneng le epe. O ne a di rata, mme a tlhagafaletse go di bolelela ba bangwe. O ne a batla gore balatedi botlhe ba gagwe, “motlhatlheledi mongwe le mongwe wa batho,” a ikutlwe ka tsela eo. A le rona re ikutlwa jalo? Re na le mabaka a mantsi a go rata thuto nngwe le nngwe ya boammaaruri e re ithutang yone mo Lefokong la Modimo. Re anaanela dithuto tsotlhe tsa boammaaruri, e ka ne e le tse re sa bolong go nna re di dumela kana tse di sa tswang go tlhalosiwa bosha. Ka go bua ka matlhagatlhaga a a tswang pelong le go ipoloka re rata dilo tse Jehofa a re rutang tsone, re bontsha lorato loo fela jaaka Jesu a ile a dira.

9. (a) Jesu o ne a ikutlwa jang ka batho ba a neng a ba ruta? (b) Re ka etsa jang boikutlo jo Jesu a neng a na le jone ka batho?

⁹ Gape Jesu o ne a rata batho ba a neng a ba ruta, jaaka fa re tla bona ka botlalo mo Karolong ya 3. Boporofeti bo ne jwa bolelela pele gore Mesia o ne a tla “utlwela motho wa maemo a a kwa tlase le yo o humanegileng botlhoko.” (Pesalema 72:13) Ee ruri, Jesu o ne a amega ka batho. O ne a amega ka megopolo le maikutlo a a neng a ba tlhotlheletsa; o ne a amiwa ke mekgweleo e e neng e ba imela le dilo tse di neng di ba kgoreletsa go tlhaloganya boammaaruri. (Mathaio 11:28; 16:13; 23:13, 15) Ka sekai, akanya ka mosadi wa Mosamarea. Ga go pelaelo gore o ne a kgatlhiwa thata ke go bo Jesu a ile a bontsha go mo kgatlhegela. Temogo e Jesu a neng a e bontsha ka maemo a mosadi yono a neng a le mo go one e ne ya mo tlhotlheletsa gore a dumele gore Jesu ke moporofeti le gore a bolelele ba bangwe ka ene. (Johane 4:16-19, 39) Ke boammaaruri gore, gompieno balatedi ba ga Jesu ga ba kgone go bona se se mo dipelong tsa batho ba ba ba rerelang. Le fa go ntse jalo, re ka bontsha go kgatlhegela batho fela jaaka Jesu a dirile; re ka ba bontsha gore re amega ka bone; mme re ka dira gore mafoko a rona a ame dilo tse ba di kgatlhegelang, mathata a ba lebanang le one le dilo tse ba di tlhokang.

Se Jesu a Neng a Rera ka Sone

10, 11. (a) Jesu o ne a rera ka eng? (b) Ke eng fa go ile ga tlhokega gore go nne le Bogosi jwa Modimo?

¹⁰ Jesu o ne a rera ka eng? Fa o ne o ka senka karabo ka go sekaseka dithuto tsa bontsi jwa dikereke tse di ipolelang gore ke baemedi ba gagwe, o ka nna wa akanya gore o ne a rera se go ka tweng ke thero e e malebana le go rarabolola mathata a setšhaba. Kgotsa o ka nna le kgopolo ya gore o ne a buelela diphetogo mo go tsa sepolotiki kana gore o ne a buelela kgololo ya gagwe ka namana go feta sepe se sele. Le fa go ntse jalo, jaaka re boletse pelenyana, Jesu o ile a bua jaana ka tlhamalalo: “Ke tshwanetse go bolela dikgang tse di molemo tsa bogosi jwa Modimo.” Totatota seo se ne se akaretsa eng?

¹¹ Se lebale gore Jesu o ne a le gone kwa legodimong fa Satane a ne a simolola kgwetlho ya gore Jehofa ga a dirise bolaodi jwa gagwe ka tsela e e siameng. Ruri go tshwanetse ga bo go ile ga utlwisa Jesu botlhoko go bona Rraagwe yo o siameng a senngwa leina le go latofadiwa ka gore ke Molaodi yo o bosula yo o timang dibopiwa tsa gagwe dilo tse di molemo! A bo go tshwanetse ga bo go ile ga utlwisa Morwa Modimo botlhoko thata jang ne fa Adame le Efa, ba ba neng ba tla nna batsadi ba batho botlhe, ba dumela maaka a ga Satane! Morwa o ile a bona gore batho botlhe ba tshwaeditswe ke boleo le loso ka ntlha ya botsuolodi joo. (Baroma 5:12) Le fa go ntse jalo, o tshwanetse a bo a ile a itumela tota fa a utlwa gore letsatsi lengwe Rraagwe o tla baakanya dilo!

12, 13. Bogosi jwa Modimo bo tla baakanya tshiamololo efe, mme Jesu o ne a dira jang gore Bogosi e nne selo sa konokono mo bodireding jwa gagwe?

¹² Selo sa konokono se se neng se tlhoka go baakanngwa ke eng? Leina le le boitshepo la ga Jehofa le ne le tshwanelwa ke go itshekisiwa, le tlosiwa leswe lotlhe fela le le neng la koelelwa mo go lone ke Satane le batho botlhe ba ba ileng ba dumalana le ene. Bolaodi jo bo siameng jwa ga Jehofa bo ne bo tshwanetse go tlotlomadiwa. Jesu o ne a tlhaloganya dikgang tseno tse di botlhokwa go gaisa motho ope fela. Mo thapelong ya sekao, o ile a ruta balatedi ba gagwe go rapelela pele gore leina la ga Rraagwe le itshepisiwe, go tswa foo gore Bogosi jwa ga Rraagwe bo tle, mme kwa bofelong gore thato ya Modimo e dirwe mo lefatsheng. (Mathaio 6:9, 10) Bogosi jwa Modimo, jo Keresete Jesu e leng Mmusi wa jone, bo tla tloga bo fedisa tsamaiso e e boikepo ya ga Satane le go tlhoma puso ya ga Jehofa e e siameng gore e buse ka bosakhutleng.—Daniele 2:44.

¹³ Bogosi joo e ne e le jone kgangkgolo ya bodiredi jwa ga Jesu. Mafoko a gagwe otlhe le ditiro tsa gagwe tsotlhe di ne di senola gore Bogosi joo ke eng le gore bo tla diragatsa jang boikaelelo jwa ga Jehofa. Jesu ga a ka a letla sepe se mo itaya tsebe mo tirong ya gagwe ya go rera dikgang tse di molemo tsa Bogosi jwa Modimo. Mo motlheng wa gagwe, go ne go na le mathata a a boima a loago, tshiamololo e e seng kana ka sepe, le fa go ntse jalo, o ne a tlhomile matlho thata mo molaetseng wa gagwe le mo tirong ya gagwe. A go tlhoma mogopolo jalo go bolela gore Jesu o ne a sa fetofetoge le maemo a dira dilo ka tsela e e gagametseng? Legoka!

14, 15. (a) Jesu o ile a itshupa jang e le “sengwe se se fetang Solomone”? (b) Re ka etsa Jesu jang ka molaetsa o re o rerang?

¹⁴ Jaaka fa re tla bona mo karolong eno yotlhe, Jesu o ile a dira gore dilo tse a di rutang e nne tse di kgatlhang le tse di farologaneng. O ne a bua le batho ka tsela e e ba amang pelo. Seno se ka re gopotsa Kgosi Solomone yo o botlhale, yo o neng a senka mafoko a a itumedisang, mafoko a a nepileng a boammaaruri go tlhalosa dikgopolo tse Jehofa a neng a mo tlhotlheletsa go di kwala. (Moreri 12:10) Jehofa o ne a abela monna yoo yo o sa itekanelang “pelo e e bulegileng,” e e neng e mo kgontsha go bua ka dilo di le dintsi, go akaretsa le dinonyane, ditlhapi, ditlhare le diphologolo. Batho ba ne ba tswa kgakalakgakala go tla go reetsa Solomone. (1 Dikgosi 4:29-34) Le fa go ntse jalo, Jesu e ne e le “sengwe se se fetang Solomone.” (Mathaio 12:42) O ne a le botlhale go mo feta, a na le “pelo e e bulegileng” go mo feta. Fa Jesu a ruta batho, o ne a dirisa kitso e kgolo e a neng a na le yone ka Lefoko la Modimo mmogo le ka dinonyane, diphologolo, ditlhapi, temothuo, maemo a bosa, ditiragalo tsa bosheng, hisitori le maemo mo setšhabeng. Kafa letlhakoreng le lengwe, Jesu o ne a sa leke go kgatlha batho ka go itlotlomatsa ka kitso ya gagwe. O ne a boloka molaetsa wa gagwe o le motlhofo e bile o utlwala sentle. Ke gone ka moo batho ba neng ba itumelela go mo reetsa fa a bua!—Mareko 12:37; Luke 19:48.

¹⁵ Gompieno Bakeresete ba leka go latela kaelo ya ga Jesu. Ga re na botlhale le kitso e kgolo e Jesu a neng a na le yone, mme gone rotlhe re na le selekanyo se se rileng sa kitso le maitemogelo tse re ka di dirisang fa re abela ba bangwe dithuto tsa boammaaruri tse di tswang mo Lefokong la Modimo. Ka sekai, batsadi ba ka dirisa maitemogelo a ba nang le one a go godisa bana go bontsha tsela e Jehofa a ratang bana ba gagwe ka yone. Ba bangwe ba ka dirisa dikai kana dipapiso tse di amanang le tiro, sekolo, kana kitso e ba nang le yone ka batho le ditiragalo tsa bosheng. Mme gone, re nna kelotlhoko gore re se letle sepe se faposa tlhokomelo ya rona mo molaetseng wa rona—dikgang tse di molemo tsa Bogosi jwa Modimo.—1 Timotheo 4:16.

Boikutlo Jwa ga Jesu ka Bodiredi Jwa Gagwe

16, 17. (a) Jesu o ne a ikutlwa jang ka bodiredi jwa gagwe? (b) Jesu o ne a bontsha jang gore bodiredi jwa gagwe e ne e le selo se se tlang pele mo botshelong?

¹⁶ Jesu o ne a tsaya bodiredi jwa gagwe e le letlotlo la botlhokwa. O ne a itumelela go thusa batho go itse tota kafa Rraagwe wa kwa legodimong a leng ka teng, a ba thusa go se tlhakanngwe tlhogo ke dithuto le dingwao tse di itlhametsweng ke batho. Jesu o ne a rata go thusa batho go nna le kamano e e molemo le Jehofa le tsholofelo ya botshelo jo bo sa khutleng. O ne a itumelela go leretse batho kgomotso le boipelo jwa dikgang tse di molemo. O ne a bontsha jang gore o na le maikutlo a a ntseng jalo? Akanyetsa ditsela tseno tse tharo.

¹⁷ Tsela ya ntlha, Jesu o ne a dira gore bodiredi e nne selo sa konokono mo botshelong jwa gagwe. Go bua ka Bogosi e ne e le tiro ya gagwe ya botshelo jotlhe, e le selo sa konokono se a se ratang thata. Ke gone ka moo, jaaka go tlhalositswe mo go Kgaolo 5, ka botlhale a ileng a boloka botshelo jwa gagwe bo sa raraana. Fa a ntse a gakolola batho ba bangwe, o ne a boloka leitlho la gagwe le tlhomame mo dilong tse e leng tsa botlhokwa. O ne a sa itewe tsebe ke dilo tse dintsintsi tse a neng a tla tshwanelwa ke go di duelela, go di tlhokomela, go di baakanya kana go di emisetsa ka tse dingwe fa nako e ntse e ya. O ne a tshela botshelo jo bo sa raraanang gore go se ka ga nna le sepe se se mo itayang tsebe go sa tlhokege.—Mathaio 6:22; 8:20.

18. Jesu o ile a dira ka natla ka ditsela dife mo bodireding?

¹⁸ Tsela ya bobedi, Jesu o ne a dira ka natla mo bodireding jwa gagwe. O ne a dirisa nako e ntsi mo go jone, a tsamaya dikilometara di le makgolokgolo go ralala Palesetina, a senka batho ba a ka ba itsiseng dikgang tse di molemo. O ne a bua le bone mo magaeng a bone, mo mafelong a botlhe, mo marekisetsong le mo dipatlelong. O ne a bua le bone tota le fa a ne a tlhoka go ikhutsa, go ja, go nwa metsi kana nako ya go iketla fela le ditsala tsa gagwe tse dikgolo. Tota le ka nako e a neng a swa ka yone, o ne a tswelela a bua le ba bangwe dikgang tse di molemo tsa Bogosi jwa Modimo!—Luke 23:39-43.

19, 20. Jesu o ne a bontsha jang go potlaka ga tiro ya go rera?

¹⁹ Ya boraro, Jesu o ne a tsaya bodiredi e le tiro e e potlakileng. Gopola puisano ya gagwe le mosadi wa Mosamarea kwa sedibeng kafa ntle ga motse wa Sikara. Go bonala ka nako eo baaposetoloi ba ga Jesu ba ne ba sa bone go potlakile gore ba bolelele ba bangwe dikgang tse di molemo. Jesu o ile a ba raya a re: “A ga lo re go sa ntse go na le dikgwedi di le nnè pele ga thobo e tla? Bonang! Ke a lo raya: Tsholetsang matlho a lona mme lo lebe masimo, gore a masweu go ka rojwa.”—Johane 4:35.

²⁰ Jesu o ne a dirisa setshwantsho seo se se tsamaisanang le paka e ba neng ba le mo go yone. Go bonala e ne e le ka kgwedi ya Chislev (November/December). Go ne go sa ntse go setse dikgwedi tse nnè gore e nne nako ya thobo ya barele mo e ka nnang ka nako ya Tlolaganyo, ka Nisane 14. Ka jalo ka nako eo balemi ba ne ba ise ba bone go potlakile gore ba itlhaganelele thobo. E ne e sa ntse e le kgakala. Mme go tweng ka thobo ya tshwantshetso? Batho ba le bantsi ba ne ba iketleeleditse go utlwa, go ithuta, go nna barutwa ba ga Keresete le go bona tsholofelo e e molemolemo e Jehofa a ba beetseng yone. Go ne go ntse jaaka e kete Jesu o ne a bona masimo ao a tshwantshetso a le masweu ka ntlha ya diako tsa one tse di buduleng tse di ntseng di fokwa ke phefo, di bontsha gore di siametse go ka rojwa.c Nako e ne e gorogile mme tiro e ne e potlakile! Ka ntlha ya seo, e ne ya re fa batho ba motse mongwe ba ne ba batla gore Jesu a nne a ntse a le mo motseng wa bone, o ile a araba jaana: “Le kwa metseng e mengwe ke tshwanetse go bolela dikgang tse di molemo tsa bogosi jwa Modimo, ka gonne ke ne ka romelwa ka ntlha ya seno.”—Luke 4:43.

21. Re ka etsa Jesu jang?

²¹ Re ka etsa Jesu mo ditseleng tsotlhe tse tharo tse re sa tswang go tlotla ka tsone. Re ka dira gore bodiredi jwa Bokeresete e nne selo se se tlang pele mo botshelong jwa rona. Le fa re ka tswa re na le maikarabelo a lelapa le a ditiro tsa boitshediso, re ka bontsha gore bodiredi jwa rona bo tla pele ka go nna le seabe ka metlha le ka tlhagafalo mo go jone fela jaaka Jesu. (Mathaio 6:33; 1 Timotheo 5:8) Re ka dira ka natla mo bodireding, re dirisa nako ya rona e ntsi, maatla le dilo tse dingwe tsa rona go bo ema nokeng. (Luke 13:24) Mme gape, re ka nna re ikgopotsa gore tiro ya rona e potlakile. (2 Timotheo 4:2) Re tshwanetse go dirisa tshono nngwe le nngwe go rera!

22. Go tla tlotlwa ka eng mo kgaolong e e latelang?

²² Gape Jesu o ile a bontsha gore o ne a tsaya tiro eno e le botlhokwa ka go tlhomamisa gore e ne e tla tswelela pele morago ga loso lwa gagwe. O ne a laela balatedi ba gagwe go tswelela pele ka tiro ya go rera le go ruta. Re tla tlotla ka taelo eo mo kgaolong e e latelang.