Setlhare se se Tukang

Moshe o ne a nna kwa Midiana dingwaga di le 40. O ne a nyala a bo a nna le bana. Letsatsi lengwe fa a ntse a disitse dinku gaufi le Thaba ya Sinai, o ne a bona sengwe se se gakgamatsang. Setlhare sa mitlwa se ne se tuka mme se sa she! Fa Moshe a re o a atamela, o utlwa lentswe le tswa mo setlhatshaneng seo le re: ‘Moshe! O se ka wa atamela. Rola ditlhako tsa gago ka gonne lefelo le o emeng mo go lone le boitshepo.’ E ne e le Jehofa a buang a dirisa moengele.

Moshe o ne a tshogile, ka jalo, o ne a ikhurumetsa sefatlhego. Lentswe le ne la re: ‘Ke bone tsela e Baiseraele ba bogang ka yone. Ke tla ba ntsha kwa Egepeto mme ke ba tlise mo lefatsheng le le monate. Ke wena o tla ba etelelang pele go tswa kwa Egepeto.’ Moshe o tshwanetse a bo a ne a gakgametse tota.

Moshe o ne a botsa a re: ‘Ke tla reng fa batho ba mpotsa gore ke romilwe ke mang?’ Modimo o ne a re: ‘Ba reye o re Jehofa, Modimo wa ga Aborahame, Modimo wa ga Isake le Modimo wa ga Jakobe ke ene a nthomileng.’ Go tswa foo, Moshe o ne a re: ‘Ke direng fa batho ba sa batle go ntheetsa?’ Jehofa o ne a naya Moshe sesupo sa gore o tla mo thusa. O ne a raya Moshe a re a latlhele thobane ya gagwe fa fatshe. Thobane e ne ya fetoga noga. Fa Moshe a tshwara noga eo ka mogatla, e ne ya fetoga thobane gape. Jehofa o ne a re: ‘Fa o ka dira seno, batho ba tla dumela gore ke nna ke go romileng.’

Moshe o ne a re: ‘Ga ke itse go bua sentle.’ Jehofa o ne a mo raya a re: ‘Ke tla go bolelela se o tla se buang e bile ke tla romela morwarrago Arone gore a go thuse.’ Moshe o ne a itse gore Jehofa o tla mo thusa, ka jalo, o ne a tsaya mosadi le bana ba gagwe mme a boela kwa Egepeto.