Hana o Rapelela go Nna le Ngwana wa Mosimane

Monna mongwe wa Moiseraele yo o bidiwang Elekana, o ne a na le basadi ba babedi, yo mongwe e ne e le Hana, yo mongwe e le Penina mme o ne a rata Hana thata. Penina o ne a tlhola a sotla Hana ka gonne Hana o ne a se na bana mme ene a na le bana ba bantsi. Ngwaga le ngwaga Elekana o ne a tsamaya le ba lelapa la gagwe go ya go obamela Modimo kwa Shilo. Nako nngwe fa ba le koo, o ne a lemoga gore mosadi wa gagwe yo a mo ratang thata e bong Hana, o ne a utlwile botlhoko. O ne a re: ‘O se ka wa lela tlhe Hana. Ke fano. Ke a go rata.’

Moragonyana Hana o ne a tswa a ya go rapela a le esi. O ne a lela a sa kgaotse a kopa Jehofa gore a mo thuse. O ne a raya Jehofa a re: ‘Jehofa, fa o ka nnaya ngwana wa mosimane, ke tla go mo naya mme o tla go direla botshelo jwa gagwe jotlhe.’

Moperesiti yo Mogolo e bong Eli o ne a bona Hana a lela mme a akanya gore o nole bojalwa thata. Hana o ne a mo raya a re: ‘Morena wa me ga ke a nwa bojalwa. Ke na le bothata jo bogolo mme ke bua le Jehofa ka jone.’ Eli o ne a lemoga gore ga a bua sentle, ka jalo, o ne a raya Hana a re: ‘E kete Jehofa a ka go naya se o se batlang.’ Hana o ne a ikutlwa botoka mme a tswa a tsamaya. O ne a tshola ngwana wa mosimane mme a mmitsa Samuele. Hana o tshwanetse a bo a ne a itumetse thata!

Hana ga a ka a lebala se a neng a se solofeditse Jehofa. Fa a sena go kgwisa Samuele, o ne a mo isa kwa Shilo. O ne a raya Eli a re: ‘Yono ke mosimane yo ke neng ka mo kopa mo go Jehofa. Ke tlile go mo naya Jehofa botshelo jwa gagwe jotlhe.’ Elekana le Hana ba ne ba etela Samuele ngwaga le ngwaga mme ba ne ba mo isetsa diaparo tse disha. Jehofa o ne a araba thapelo ya ga Hana ka go mo naya bana ba bangwe ba basimane ba le bararo le ba basetsana ba le babedi.