LEBOKOSE LA GO RUTA 1B
Se se Mo Bukeng ya Esekiele
Buka ya Esekiele e kgaogantswe jaana:
KGAOLO 1 GO YA GO 3
Ka 613 B.C.E., fa Esekiele a ne a na le Bajuda ba ba neng ba le kwa botshwarwa kwa Babelona, o ne a bona diponatshegelo tse di tswang kwa go Jehofa. Gape Jehofa o ne a mo laela gore a bolelele Bajuda ba ba neng ba nna gaufi le noka ya Kebare se se neng se tla direga.
KGAOLO 4 GO YA GO 24
Go tloga ka 613 B.C.E. go fitlha ka 609 B.C.E., Esekiele o ne a bolelela Bajuda ka se se neng se tla direga. O ne a bua segolobogolo ka katlholo e e neng e tla tlela Jerusalema le batho ba Jerusalema ba ba neng ba obamela medingwana.
KGAOLO 25 GO YA GO 32
Go simologa ka 609 B.C.E., ngwaga o Bababelona ba neng ba tloga ba tlhasela Jerusalema ka one, Esekiele o ne a simolola go bua ka katlholo e e neng e tla tlela ditšhaba tse di neng di le gaufi le Jerusalema. Ditšhaba tseo e ne e le Amona, Edoma, Egepeto, Moabe, Filisitia, Sidona le Ture.
KGAOLO 33 GO YA GO 48
Mo masimologong a 606 B.C.E., fa Jerusalema le tempele di lalaane e bile e le marope fela, Esekiele o ne a simolola go bua ka molaetsa wa tsholofelo. O ne a bua ka nako ya fa batho botlhe ba tla bong ba obamela Jehofa Modimo ka tsela e e mo itumedisang.
Ditiragalo tse di mo bukeng ya Esekiele di kwadilwe ka go latelana. Buka eno e simolola pele ka boporofeti jo bo buang ka go senngwa ga Jerusalema le tempele. Go tswa foo, e bo e bua ka nako ya fa batho botlhe ba tla bong ba obamela Jehofa Modimo ka tsela e e mo itumedisang. Seno se a utlwala ka gonne go ka se ka ga simololwa ka boporofeti jo bo buang ka nako ya fa batho botlhe ba tla bong ba obamela Jehofa ka tsela e e mo itumedisang mme go sa ntse go na le batho ba ba mo obamelang ka tsela e e mo itumedisang kwa tempeleng.
Gape, fa Esekiele a sena go bua ka katlholo e e neng e tla tlela Jerusalema, o ne a bua ka katlholo e e neng e tla tlela ditšhaba tse di neng di le gaufi le Jerusalema (kgaolo 25 go ya go 32). Go tswa foo, e bo e nna gone a buang ka nako ya fa batho botlhe ba tla bong ba obamela Jehofa ka tsela e e mo itumedisang. Moithuti mongwe wa Baebele a re: “Fa Modimo a sena go bua ka katlholo e e neng e tla tlela Jerusalema, go a utlwala gore morago ga moo a bue ka katlholo e e neng e tla tlela ditšhaba tse di neng di le gaufi le Jerusalema. Seno ke ka gonne fa Modimo a ne a otlhaya ditšhaba tseo, o ne a bontsha batho ba gagwe kutlwelobotlhoko.”