Botshelo le Bodihedi tsa ga Jesu

DIKGANG kaga go boa ga ga Jesu kwa Dikapolise di fitlha kwa Kaperaname. mme boidiidi jo bogolo bo phuthegela fa lewatleng go mo gorosa sentle. Kwantle ga pelaelo ba ile ba utlwa gore o ne a didimatsa sefefo le go fodisa banna ba ba neng ba na le badimona ka gone. Jaanong, jaaka a tswela mo lotshitshing, ba a mo kokoanela, ba shwegashwèga ebile ba solofetse sengwe.

Mongwe wa bao ba neng ba batla thata go bona Jesu e ne e le Jairo. molaodi wa senagoge. O wela fa dinaong tsa ga Jesu mme o mo kopa ka tlhoafalo jaana: “Morwadiake oa ñwanyana o hèla mo loshuñ: kea gu rapèla, u tlo u tlè, u beè diatla tsa gè go mo go èna, gore a hodisiwè, a tshele.” Ereka e le ene ngwana fela yo a nang le ene ebile a le dingwaga di le 12 fela, o botlhokwa ka mo go kgethegileng mo go Jairo.

Jesu o a dumela mme, a patilwe ke boidiidi, o leba kwa legaeng la ga Jairo. Re ka akanya kaga matlhagatlhaga a batho jaaka ba ipaakanyetsa kgakgamatso e nngwe. Mme mosadi mongwe mo boidiiding o tlhokometswe thata ka ntlha ya bothata jwa gagwe jo bogolo.

Ka lobaka lo loleele lwa dingwaga tse 12 mosadi yono o ntse a lwala go tshologa madi. O tsamaile mo dingakeng tsotlhe, a dirisa madi a gagwe otlhe mo kalafing. Mme ga a ise a alafege; go na le moo, bothata jwa gagwe bo ile jwa nna maswe le e leng go feta.

Gongwe jaaka o ka tlhaloganya, mo godimo ga go bo bo mo koafatsa mo go kalo, bolwetsi jwa gagwe gape ke jo bo sitang le jo bo tlhabisang ditlhong. Gantsi ga go ke go buiwa phatlalatsa ka botlhoko jo bo ntseng jalo. Mo godimo ga moo, mo Molaong wa ga Moshe go tshologa ga madi go ne go itshekolola mosadi, mme mongwe le mongwe yo o mo tshwarang kana diaparo tsa gagwe tse di madi o ne a tshwanetse go tlhapa mme a itshekologe go ya maitseboeng.

Mosadi o utlwaletse dikgakgamatso tsa ga Jesu mme jaanong o mmone. Ka ntlha ya go sa itshekang ga gagwe, o leka ka moo a ka kgonang ka teng gore a tsene mo boidiiding a sa lemogiwe, a ntse a ithaya a re: “Ha nka ama leha e ka bo e le diaparō tsa gagwè hèla. ke tla hodisiwa.” Fa a dira jalo, ka bofefo o ikutlwa gore! go tshologa ga gagwe ga madi go eme!

“Ke amilwe emañ?” Abo mafoko ao a ga Jesu a ile a mo tshosa jang ne! O ne a ka itse jang? ‘Moruti,’ Petere a botsa, ‘batho ba go kgotlhaganyeditse ba go pitlagantse, mme wa re, “Ke amilwe emañ?”’

Fa a leba mo tikologong go bona mosadi, Jesu o tlhalosa jaana: “Moñwe o nkamile; ka ke ikutlwile ha nonohō e dule mo go nna.” Ruri, ga se go ama mo go tlwaelegileng, ereka phodiso e e latelang e goga maatla mo go Jesu.

Ka go bona gore ga a ka a tlhoka go lemogiwa, mosadi o atamela le go wela fa pele ga ga Jesu, a tshogile ebile a roroma. Fa pele ga batho botlhe, o bolela boammaaruri jotlhe kaga bolwetsi jwa gagwe le ka moo a sa tswang go alafega ka teng.

Ka go amiwa ke go ipolela ga gagwe ga boammaaruri, Jesu o mo gomotsa ka go amega jaana: “Morwadiaka, tumèlō ea gago e gu hodisitse; tsamaea ka kagishō, u hōle mo pecoñ ea gago.” Abo go le molemo jang ne go itse gore Yo Modimo o mo tlhophileng go busa lefatshe ke motho yo o botsalano, yo o kamego, yo o amegang ka batho ebile a na le thata ya go ba thusa! Mathaio 9:18-22; Mareko 5:21-34; Luke 8:40-48; Lefitiko 15:25-27.

◆ Jairo ke mang, mme ke eng fa a tla kwa go Jesu?

◆ Ke bothata bofe jo mosadi mongwe a nang le jone, mme ke eng fa go tla kwa go Jesu go kopa thuso go le bokete jaana mo go ene?

◆ Mosadi yoo o fodisiwa jang, mme Jesu o mo gomotsa jang?