Botshelo le Boshedi tsa ga Jesu

Jesu o tlhotse a tshwaregile letsatsi lotlhe​—o tlhotse a le mo loetong ka mokoro go tswa kwa Dikapolise, o fodisitse mosadi yo o tshologang madi, a bo a tsosa morwadia Jairo. Mme tiro ya letsatsi leo ga e ise e fele. Go bonala gore fa Jesu a tswa kwa legaeng la ga Jairo, o salwa morago ke banna ba babedi ba difofu, ba goa ka gore: “Morwa Dafide, re utlwèlè botlhoko.”

Banna bano ka go bitsa Jesu “Morwa Dafide,” ba supa gore ba dumela fa Jesu e le mojaboswa wa setilo sa Bogosi sa ga Dafide, mme he gore ke Mesia yo o solofeditsweng. Lefa go ntse jalo, Jesu o lebega a tlhokomologa go itopela thuso ga bone, gongwe o leka gore a ba tla nna ba tswelela ba goa. Mme banna bao ga ba ineele. Ba sala Jesu morago go ya kwa a nnang teng, mme fa a tsena mo ntlong, ba tsena nae.

Jesu fa a le koo o ba botsa ka gore: “A loa dumèla ha ke nonohile go diha seo se?”

Ba araba ka tlhomamiso ba re, “E. Morèna.”

Jalo, Jesu o bua jaana, a ama matlho a bone: “A go lo dihalèlè yaka tumèlō ea lona.” Ka bonako fela ba kgona go bona! Go tswa foo Jesu o ba laya fela thata ka gore: “Lo bōnè, gore go mo go se ka ga itse opè.” Mme ka ba tletse ka boitumelo, ba tlhokomologa taolo ya ga Jesu ba bo ba bua kaga gagwe mo lefelong leo lotlhe.

Fela fa banna bano ba sena go tsamaya, batho bangwe ba lere monna yo o tsenyweng ke badimo ba bile ba mo ntshitse semumu. Jesu o ntsha badimo mo go ene, mme ka bonako fela monna o simolola go bua. Batho ba bantsi ba gakgamadiwa ke dikgakgamatso tseno, ba bolela jaana: “Ga go e se go ko go bonwe yalo kopè mo go Baiseraela.”

Bafarasai le bone ba teng foo. Ga ba kake ba latola dikgakgamatso tseno, mme ka go sa dumele ga bone ga boikepo ba boeletsa tatofatso ya bone malebana le motswedi wa ditiro tseno tse di maatla tsa ga Jesu, ka go re: “O kgoromeletsa badimo ntlè ka kgōsana ea badimo.”

Ka bofefo fela morago ga ditiragalo tseno. Jesu o boela kwa gagabo kwa Nasaretha, mo nakong eno o na le barutwa ba gagwe. O ne a kile a etela ntlo ya thuto a bo a ruta mo go yone mo e ka nnang ngwaga pele ga mo. Lemororo batho pele ba ne ba gakgamadiwa ke mafoko a gagwe a a itumedisang, kwa morago ba ne ba tenegela go ruta ga gagwe ba bo ba leka go mmolaya. Jaanong, ka kutlwelo-botlhoko, Jesu o dira boiteko jo bongwe jwa go thusa batho ba e kileng ya bo e le baagelani ba gagwe.

Lefa mo mafelong a mangwe batho ba tla ka bontsi kwa go Jesu, mono go lebega ba sa dire jalo. Jalo, mo letsatsing la Sabata, o ya go ruta kwa ntlong ya thuto. Bontsi jwa ba ba mo reeditseng baa gakgamala. “Monna eo o chotse botlhale yo, le ditihō tse tsa nonohō kae?” ba botsa jalo. “A eo, a ga se morwa mmetli oa dikgoñ? a mmagwè ga go twe Marie? Le bomonnawè a ga se bo Yakobe, le Yosefe, le Simone, le Yudase? Le bokgantsadie a ga re na nabō botlhe? Ana monna eo oa ba a chotse kae dilō cotlhe tse?”

‘Jesu ke ngwana wa mono fela jaaka rona,’ ba akantshana jalo. ‘O goletse mo matlhong a rona, gape re itse ba gagabo. O ka nna Mesia jang?’ Jalo go sa kgathalesege bosupi joo jotlhe​—botlhale jwa gagwe jo bogolo le dikgakgamatso—​ga ba mo amogele. Le eleng ba losika lwa gagwe baa kgopisega, ka ntlha ya go bo ba atamalane nae fela thata, ba dira gore Jesu a konele ka gore: “Moperofeti ga a ke a tlhōka tlotlō ha e se mo lehatshiñ ya ga gabō, le mo tluñ ea gagwè.”

Ruri, Jesu o gakgamadiwa ke go tlhaela tumelo ga bone. Jalo gaa dire dikgakgamatso dipe koo kwantle ga go baya balwetsi bangwe diatla le go ba fodisa. Mathaio 9:27-34; 13:54-58; Mareko 6:1-6; Isaia 9:7.

◆ Banna ba difofu ba supa gore ba dumela eng fa ba bitsa Jesu “Morwa Dafide?

◆ Bafarasai ba gatelela gore ke ka ntlhayang fa Jesu a dira dikgakgamatso?

◆ Ke ka ntlhayang fa e le go bontsha kutlwelo-botlhoko ga ga Jesu go bo a ya go thusa ba ba kwa Nasaretha gape?

◆ Jesu o amogelwa jang kwa Nasaretha, mme ka ntlhayang?

[Setshwantsho se se tletseng mo go tsebe 9]