A Bodumedi bo Kgotsofaditse Ditlhokafalo tsa Rona?
MARIA o ne a fetsa dingwaga di le 21 a ntse a le moitlami wa kereke ya Roma Katoliki. O goletse mo bathong ba ba ratang bodumedi thata. Ee, lefa a ne a santse a le ngwanyana, o ne a tle a tsoge bosigo a rapelela ba bangwe! Lefa go ntse jalo, kwa bofelong khumanego, pogo, go tlhoka tshiamiso mo go neng ga nna ga tswelela go sa kgathalesege tlhotlheletso ya sedumedi mo diketeketeng tsa dingwaga go ne ga mo dira gore a ipotse jaana: ‘A tota bodumedi bo kgotsofaditse ditlhokafalo tsa rona?’
Bodumedi jo bontsi bo buelela megopolo e e kwa godimo le melao-metheo ya boitsholo. Mme gantsi bodumedi bo lejwa jaaka jo bo tsosang mathata, e le jo bo oketsang mathata a rona go na le go kgotsofatsa ditlhokafalo tsa rona. Ka motlhala, elatlhoko dikakgelo tseno tsa batho ba ba elang ditsamaiso tsa bodumedi tlhoko: “Bodumedi ke jone bo ikarabelelang thata mo bosetlhogong jo bo dirwang mo bathong.” (National Review) “Tlhotlheletso e kgolo ya ntwa ga e sa tlhole e le bogagapa mme ke bodumedi.” (Toronto Star) “Tshenyo e kgolo ‘e ne ya dirwa ke Bakeresete ba ba kolobeditsweng.’”—The Tampa Tribune.
A go ka tswa go gakgamatsa go bo batho ba sa amogele maiphako a bodumedi a gore bo kgotsofatsa ditlhokafalo tsa rona? Ba bone maungo a jone. Ka sekai, “Shinto, bodumedi jwa naga ya Japane, ga bo a ka jwa tshegetsa fela ntwa ya dibetsa ka moya otlhe mme bo bile jwa neela lebaka la go dira jalo ga jone,” go ne ga bolela jalo The Christian Century. Ke ditumelo di le kae tse di dirileng fela jalo—‘tse di neng tsa ema ntwa ya dibetsa nokeng ka moya otlhe’! Akanya ka dipolao tse dikgolo le go ipusolosetsana ga Mabuda le Mahindu kwa Sri Lanka, dipolao le bosetlhogo jo bo kopanyeletsang Makatoliki le Maporosetanta kwa Ireland—ee, lenaneo le tswelela-pele! “Mahindu, Mamoselema, Ma-Sikh le makoko a mangwe a ile a tsholola madi a ba bangwe mo makgolokgolong a dingwaga kwa India,” go ne ga bolela jalo ka khutsafalo U.S.News & World Report.
Bangwe ba ka nna ba tswa ba sa bone fa bodumedi e le tlhotlheletso ya bosula, mme gone ga ba bo lebe jaaka tlhotlheletso e e maatla ya molemo. National Catholic Reporter e ne ya bua ka “go retelelwa ga dikereke tse di tlwaelegileng go dirisana le se se batlwang ke batho le ditlhokafalo tsa bone ka botlalo.” Mme koranta ya dikgang ya Liberty e ne ya bolela gore batho ba lebega ba tsaya moruti jaaka “monaya-masego-moitshepisi-mosegofatsi” yo o nnang teng fela ka dinako tsa meletlo. E ne ya oketsa ka go re: “Mo megopolong ya batho ba le bantsi ke moruti yo o tsamaisanang le seemo se se gone.” A o ntse o tsaya bodumedi ka tsela eo—eseng jaaka jo bo ka nnang jwa re gobatsa mme gape e se jo bo lebegang bo ka re solegela molemo ka gope?
Gompieno bodumedi bo tshwana fela le jaaka bo ne bo ntse fa Jesu Keresete a ne a le mo lefatsheng O ne a re baeteledipele ba bodumedi ba motlha wa gagwe ba ne ba tlotla Modimo ka dipounama tsa bone fela. Phelelo ya ditiro tsa bone e ne ya nna gore ba ne ba okeletsa batho merwalo go na le go kgotsofatsa ditlhokafalo tsa bone. O ne a re, “E, ba tla ba bōhe merwalō e e bokete, e e botlhoko go rwalwa, me ba e bee mo mahetleñ a batho.” (Mathaio 23:4) Gompieno, bodumedi bo solofetsa mo gontsi mme bo lebega bo sa dire mo go kalo. Jalo a go na le lebaka lepe la go dumela gore bodumedi bo ka kgotsofatsa ditlhokafalo tsa rona?