Go sa Nyala Tsela e e Duelang ya Botshelo
“O golocwe, o ka nyalwa ke eo o mo ratañ: me e be e le mo Moreneñ hèla. . . . o tla bōna boitumèlō bogolo ha a nna yaka a nntse.”—1 BAKORINTHA 7:39, 40.
1. Ekane re sa nyala kana re nyetse, ke eng se re se kolotang Jehofa?
JEHOFA o tshwanelwa ke go obamelwa ka moya otlhe ke bao ba ineetseng mo go ene. Ekane re nyetse kana re sa nyala, re tshwanetse go rata Modimo ka pelo yotlhe ya rona, ka moya otlhe wa rona, ka mogopolo otlhe wa rona, le ka nonofo yotlhe ya rona. (Mareko 12:30) Ka boammaaruri, Mokeresete yo o sa nyalang ga a na dikakgego tse di kalo go sa tshwane le bao ba nyetseng A mme motlhanka yo o sa nyalang wa ga Jehofa o ka itumela ka boammaaruri?
2, 3. (a) Ke selo sefe sa botlhokwa, se Paulo a neng a se bua mo go 1 Bakorintha 7:39, 40? (b) Ke dipotso dife tse di tlhokang go akanyelwa?
2 Moaposetoloi Paulo o araba ka go re ee. O ne a kwala jaana malebana le bao ba kileng ba ne ba nyetse mme bao maemo a bone a fetogileng: “Mosadi eo o nyecweñ o golegilwe ka lobaka lo monna oa gagwè o sa tshedileñ ka lōna; me ha monna a shule, o golocwe, o ka nyalwa ke eo o mo ratañ: me e be e le mo Moreneñ hèla. Me kaha tshekatshekoñ ea me, o tla bōna boitumèlō bogolo ha a nna yaka a nntse: me kea gopola, go re, Mōea oa Modimo le ōna o na le nna.”—1 Bakorintha 7:39, 40.
3 Ereka Paulo a lemotsha fa batho ba ba sa nyalang ba ka itumela, ke bomang bao ka mo go utlwalang ba ka nnang ba akanyetsa go nna ba sa nyala, bobotlana ka nako e e rileng? Ke eng se se tlatseletsang mo boitumelong jwa Bakeresete ba ba sa nyalang? Tota, go sa nyala e ka nna tsela e e duelang ya botshelo jang?
Dingwaga tse di Duelang tsa go sa Nyala
4. Ke eng se se diragalang ka dingwaga tsa bokau le bokgarebe?
4 Kgosi Solomone yo o botlhale o ne a kgothatsa jaana: “U bo u gakologèlwè Mmopi oa gago mo metlheñ ea bokau yoa gago, metlha ea boshula [ya botsofe] e e se e be e tle, le dinyaga di e se di atamele, motlhañ u tla buañ, u re, Ga ke na kgatlhègō mo go cōna.” (Moreri 12:1) Dingwaga tsa bokau le tsa bokgarebe ka kakaretso ke nako ya nonofo ya selekanyo se se rileng le botsogo jo bo molemo. Ka gone, abo go tshwanela jang ne go bo dikgono tseno di tshwanetse go dirisiwa mo tirelong ya ga Jehofa kwantle ga dikakgego! Mo godimo ga moo, dingwaga tseno tsa ntlha ke nako ya go nna le boitemogelo mo botshelong, go tlhagolela tlhomamo. Mme gape eno ke nako ya fa basha ba lefatshe leno ba itemogelela lorato lwa boeleele. Ka motlhala, elatlhoko matswela a patlisiso e e neng e kopanyeletsa batho ba le 1 079 ba dingwaga tsa magareng ga 18 le 24. Ba nnile le palo-kakaretso ya “dithatano” di supa mme ka go tshwana mongwe le mongwe wa bone o boletse gore boitemogelo jwa bone jwa jaanong ke lorato lwa boammaaruri, eseng lwa boeleele.
5. Malebana le lenyalo, ke dipotso dife tse motho yo mosha a tshwanetseng go di akanyetsa?
5 Dipalo-palo tsa kgaogano, tlhalo, le malapa a a thubegileng ka tsela nngwe di lemotsha fa go se botlhale go nyala o sa le mosha. Go na le go itlhaganela mo thatanong, lefereo, le lenyalo, Bakeresete ba basha ba tla bo ba le botlhale go akanya sentle ka moo ba ka dirisang bobotlana dingwaga tsa bone tsa ntlha mo tirelong e e senang dikakgego go Jehofa. Fa o tlhatlhobisa maemo a gago jaaka motho yo mosha, o ka ipotsa dipotso tse di tshwanang le tse ka tshwanelo: A ke nonofile mo maikutlong le go siamela go akanyetsa lenyalo ka masisi? A ke na le boitemogelo jo bo lekanyeng mo botshelong jwa go nna molekane yo o molemo wa lenyalo? A ke ka sikara maikarabelo a lenyalo ka tshwanelo gongwe le a lelapa le le nang le bana? Ponong ya boineelo jwa me go Jehofa, a ga ke a tshwanela go mo neela maatla le nonofo ya bosha kwantle ga dikakgego dipe tse di amanang le lenyalo?
Dituelo tsa go sa Nyala mo go Itshekileng
6, 7. (a) Ke melemo mengwe efe eo ka kakaretso e ipe elwang ke Bakeresete ba ba sa nyalang? (b) Morongwa mongwe yo o sa nyaJang mo Afrika o ne a reng mabapi le seno?
6 Bakeresete ba ba sa nyalang ba ipelela kgololesego ya go sa akgaakgege ba bile ba ka ‘totahala mo tirong ya Morena.’ (1 Bakorintha 7:32-34; 15:58) Go na le go tlhokomela motho a le mongwe fela wa bong bo sele, motho yo o sa nyalang o na le dipaka tse di oketsegileng tsa go atolosetsa lorato lwa gagwe lwa Bokeresete mo go ba le bantsi mo phuthegong, go kopanyeletsa le batsofe le ba bangwe ba ba tlhokang thuso ya lorato. (Pesalema 41:1) Ka kakaretso. batho ba ba sa nyalang ba na le nako e e oketsegileng ya go ithuta le go tlhatlhanya ka Lefoko la Modimo. (Diane 15:28) Ba na le sebaka se segolwane sa go tlhagolela botsalano jo bo atamalaneng le Jehofa, ba ithuta go ikaega ka ene ka botlalo le go batla kaelo ya gagwe. (Pesalema 37:5; Bafilipi 4:6, 7; Yakobe 4:8) Monna mongwe yo o sa nyalang yo o sa bolong go direla Jehofa dingwaga-ngwaga jaaka morongwa mo Afrika o ne a bolela jaana:
7 “Botshelo mo magaeng a Se-Afrika bo ne bo le motlhofo mo dingwageng tseno tsotlhe, bo sena ditlhodiego tse dintsi tsa tlhabologo ya segompieno. Kwantle ga ditlhodiego tseno, ke nnile le sebaka se se ntsi sa go ithuta le go tlhatlhanya ka Lefoko la Modimo. Seno se nnonotshitse. Ee, botshelo jwa borongwa e nnile lesego la mmatota le tshireletso mo dilong tse di bonalang. Mo maitseboeng a a itumedisang a a mogote go nnile le nako e ntsi ya go tlhatlhanya le go akanya ka popo ya ga Jehofa le go mo atamela. Boitumelo jwa me jo bogolo bo nna teng mo maitsiboeng fa ke santse ke thantse mo mogopolong, mme fa ke le nosi ke kgona go senya nako ke lebile legodimo le le tletseng ka dinaledi ke tsamaya ke bile ke bua le Jehofa. Seno se nkatameditse mo go Jehofa.”
8. Kgaitsedi mongwe yo o sa neilweng yo o diretseng kwa ntlo-kgolong ya Mokgatlho ka dingwaga tse dintsi o ne a reng mabapi le go sa nyalwa?
8 Gape, se se tshwaegang ke kakgelo eno ya kgaitsadi yo o sa nyalwang yo o nang le dingwaga di le dintsi a ntse a direla kwa ntlong-kgolo ya Mokgatlho wa Watch Tower: “Ke ikgethetse go tshela botshelo jwa go sa nyalwa mo tirelong ya me go Jehofa. A ke etle ke bolawe ke bodutu? Le eseng. Tota, dinako tsa fa ke le nosi ke dingwe tse di botlhokwa thata mo go nna. Ke kgona go buisana le Jehofa ka thapelo. Ke kgona go itumelela go tlhatlhanya le thuto ya botho kwantle ga dikakgego. . . . Go sa nyala go tlatseleditse fela thata mo boitumelong jwa me.”
9. Mokeresete yo o sa nyalang o ka ipelela ditshiamelo dingwe dife tsa tirelo?
9 Motho yo o sa nyalang gape o ka amogela ditshiamelo tsa tirelo tseo di ka tswang di sa bulegela batho ba ba nyetseng ba ba nang le maikarabelo a lelapa. Ka motlhala, go ka nna le dipaka tsa go tsenelela mo bodiheding jwa nako e e tletseng jaaka mmulatsela mo lefelong leo tlhokafalo ya baboledi ba Bogosi eleng kgolo teng. Kana lekawana le le sa nyalang le ka nna le tshiamelo ya go direla jaaka leloko la lelapa la Bethele kwa ntlongkgolong ya Mokgatlho wa Watch Tower kana ofisi ya lekala. Mosadi yo mosha yo o sa nyalwang o ka kgona go pata kgaitsadi yo o sa nyalwang yo o godileng mo tirelong ya bobulatsela mo phuthegong ya ga bone kana nngwe fela e e nang le tshimo e e tshwanetseng go akarelediwa. Ke ka ntlhayang fa o sa tlotle ka dikgonagalo tseno le molebedi wa potologo? Jaaka Mokeresete yo o sa nyalang, ikatameletse go dira tirelo e e oketsegileng kgalaletsong ya ga Jehofa, mme o tla go segofatsa mo gogolo.—Malaki 3:10.
Dikao tsa Bogologolo
10. Ke mang yo o neetseng sekao se se molemo sa motlhanka yo o sa nidang wa ga Jehofa, mme ke ka ntlhayang fa o akanya gore go sa nyala ga gagwe go ne go na le mosola?
10 Sekao se segolo sa motlhanka yo o sa nyalang wa ga Jehofa e ne e le Jesu Keresete. O ne a tseneletse thata mo go direng thato ya Modimo. Jesu o ne a re, “Seyō sa me ke go diha go rata ga eo o nthomileñ, le go wetsa tihō ea gagwè.” (Yohane 4:34) Abo a ne a tshwaregile jang ne—a rera, a fodisa balwetsi, jalo le jalo! (Mathaio 14:14) Jesu o ne a kgatlhegela batho fela thata ebile o ne a nna a phuthologile fa a na le banna, basadi, le bana. Tota, o ne a tsamaela gongwe le gongwe mo bodiheding jwa gagwe, a patilwe ke ba bangwe mo makgetlong a mangwe. (Luke 8:1-3) Mme abo tiro eo e ka bo e nnile bokete jang ne fa a ka bo a ne a tsamaya le mosadi le bana ba bannye! Kwantle ga pelaelo, go sa nyala go ne go na le mosola mo ntlheng ya ga Jesu. Gompieno, Mokeresete yo o sa nyalang o ka ipelela melemo e e tshwanang, bogolo jang fa a lalediwa go ya go rera molaetsa wa Bogosi mo mafelong a a kgakala kana a a diphatsa.
11, 12. Go tsopolwa dikao dife tse di molemo go thusa basadi be ba sa nyalwang ba ba direlang Jehofa gompieno?
11 Mme ba bangwe le bone ba ne ba bona fa go sa nyala go siame ebile go duela. Morwadia Jefetha o ne a ithaopela go diragatsa ikano ya ga rraagwe ka go nna a sa nyalwa mo bathong ba ba neng ba gatelela lenyalo le bana. O ne a ipelela tirelo ya gagwe go Jehofa, mme go lemotshega gore ba bangwe ba ne ba mo kgothatsa ka metlha. Ee, “basetsana ba lseraele [ba ne ba tle] ba eè ka ñwaga-ñwaga go lelèla morwadia Yefetha oa Mogileada ka malatsi a le manè ka ñwaga”! (Baatlhodi 11:34-40) Ka go tshwana, Bakeresete ba ba nyetseng le ba bangwe ba tshwanetse go akgola le go kgothatsa basadi ba ba sa nyalwang ba ba direlang Jehofa ka bopelokgale gompieno.
12 Barwadia Filipo ba bane ba makgarebane ba ne ba ‘perofesa.’ (Ditihō 21:8, 9) Basadi bano ba ba sa nyalwang ba tshwanetse ba bo ba ne ba kgotsofadiwa ke tumelo ya bone e e tlhagafetseng kgalaletsong ya ga Jehofa. Ka mo go tshwanang, basadi ba le bantsi ba ba botlana ba ba sa nyalwang gompieno ba na le tshiamelo e e duelang ya go direla jaaka babulatsela, kana baboledi ba Bogosi ba nako e e tletseng. Ruri, ba tshwanelwa ke go akgolelwa karolo ya bone jaaka ‘bontsi jo bogolo jwa basadi ba ba bolelang mafoko a a molemo.’—Pesalema 68:11.
13. Kgang ya ga Paulo e bontsha jang gore go sa nyala e ka nna tsela e e duelang ya botshelo?
13 Moaposetoloi Paulo o fitlhetse fa go sa nyala go na le mosola. O ne a tsamaya sekgala sa dikete tsa dikilometara mo bodiheding jwa gagwe a ba a thulana le mathata a magolo, dikotsi tse dintsi, a lala a sa robala, a tshwerwe ke tlala. (2 Bakorintha 11:23-27) Kwantle ga pelaelo, seno sotlhe se ka bo se nnile bokete le go hutsafatsa fa Paulo a ka bo a ne a nyetse. Mo godimo ga moo, ga go lebege gotlhelele fa a ka bo a nnile le ditshiamelo tsa gagwe jaaka “moaposetoloi oa Badichaba” fa e le gore o ka bo a ne a na le lelapa. (Baroma 11:13) Kwantle ga diteko tse a neng a thulane natso, Paulo o ne a na le bosupi jo a bo itemogetseng jwa gore go sa nyala e ka nna tsela e e duelang ya botshelo.
Dikao tsa Motlha wa Segompieno
14. Barekisi ba dibuka ba ne ba ipelela maitemogelo afe, bao bontsi jwa bone ba neng ba sa nyala?
14 Jaaka le Bakeresete ba bangwe ba ntlha ba ba neng ba sa nyala, batho ba Modimo ba le mmalwa ba ba neng ba arola mo tirong ya go rekisa dibuka (go tswa go 1881 go ya pele) e ne e le batho ba ba sa nyalang ba ba senang batho ba ba ba tlhokomelang ba malapa a bone. Ba ne ba ya ka go rata kwa metseng e ba sa e tlwaelang, ditoropo, le mafelo a selegae, ba senka ba dipelo tse di molemo ba ba ba ba tsamaisetsa dibuka tsa Bibela. Fa gongwe ba ne ba tsamaya ka terena, baesekele, kara ya ditonki, kana kara. Gantsi, ba ne ba itumelela go tsamaya ka ntlo le ntlo. (Ditihō 20:20, 21) “Fa gongwe ba ne ba ananya [dibuka tsa Bibela] ka dijwalo, dikoko, sesepa lefa e le sengwe fela, tseo ba neng ba di dirisa kana ba di rekisetsa ba bangwe,” go ne ga gakologelwa jalo mongwe wa Basupi ba ga Jehofa, a oketsa ka gore: “Ka dinako tse dingwe, mo lefelong la matlo a gasameng, ba ne ba lala mo dipolaseng tsa temo kana dikgomo, mme fa gongwe ba robala mo dingateng tsa bojang . . . Batho bano ba ba ikanyegang [bao bontsi jwa bone ba neng ba sa nyala] ba ne ba tswelela jalo ka dingwaga-ngwaga go fitlhela baa swa ka baka la botsofe.” Tota, mongwe wa bone o ne a buelela barekisi bao botlhe ba dibuka ba bogologolo ka kakaretso fa a ne a kwala jaana: “Re ne re le basha re bile re itumelela tirelo, re ipelela go dirisa nonofo ya rona mo go direleng Jehofa.”
15. Babulatsela ba bantsi ba ba sa nyalang ba ne ba bulegelwa ke kgoro efe e kgolo e e isang kwa tirong e kgolwane dingwaga tse 45 tse di fetieng.
15 Babulatsela ba le bantsi, kana baboledi ba nako e e tletseng ba Bogosi, ba mo metlheng ya bosheng le bone ba ne ba sa nyala. Ba ne ba tle ba neele bosupi mo mafelong a go senang ope teng, ba thuse go simolola diphuthego tse disha, ba bo ba ipelele masego a mangwe mo tirelong ya ga Jehofa. Bangwe ba bone, ba ne ba bulegelwa ke kgoro e kgolo e e isang tirong e kgolo fa Sekolo sa kwa Gilead sa Bibela sa Watchtower se ne se simolola ka 1943 fa Ntwa ya Lefatshe II e ne e santse e tsweletse. (1 Bakorintha 16:9) Ee, bontsi jwa babulatsela bao ba ba sa nyalang ba ne ba thapisediwa borongwa kwa Sekolong sa Gilead mme ka bokhutshwane fela ba ne ba simolola go gasa molaetsa wa Bogosi mo mafelong a masha. Ka go bo ba ne ba sa kgorelediwe ke maikarabelo a lenyalo, ba ne ba ikatameletsa go dira tirelo ya ga Jehofa, mme bangwe ba baalogi bao ba ntlha ba santse ba sa nyala ba bile ba tlhagafetse mo tirong ya borongwa kana mo karolong nngwe ya tirelo ya nako e e tletseng.
16. Go na le bosupi bofe jwa gore maloko a a sa nyalang a lelapa la Bethele ba bone fa go sa nyala e le tsela e e duelang ya botshelo?
16 Bakeresete ba le bantsi ba ba sa nyalang ba diretse dingwaga tse dintsi jaaka maloko a lelapa la Bethele kwa ntlong-kgolo ya Mokgatlho wa Watch Tower kana mo makaleng a one gope fela mo lefatsheng. A ba bone fa go sa nyala e le tsela e e duelang ya botshelo? Ee, tota. Ka motlhala, mokaulengwe yo o sa nyalang yo o diretseng kwa Bethele ya Brooklyn dingwaga tse dintsi o ne a akgela ka go re: “Boitumelo jwa go bona didikadike tsa dimakasine le dikgatiso tse dingwe tse di tshotseng molaetsa wa Lefoko la Modimo di gasiwa go ya bokhutlong jwa lefatshe e nnile tuelo e e gakgamatsang ka bogone.” Morago ga tirelo ya dingwaga tse di ka nnang 45 ya Bethele, mokaulengwe yo mongwe yo o sa nyalang o ne a re: “Letsatsi le letsatsi ke kopa Rraarona yo o rategang wa selegodimo ka thapelo thuso le botlhale gore ke ipoloke ke tsogile sentle semoyeng gammogo le senameng ke bile ke nonofile e le gore ke tle ke tswelele ke dira tiro ya gagwe e e boitshepo. . . . Ruri ke itumeletse tsela ya botshelo e e itumedisang, e e duelang e e segofaditsweng.”
Go Nna o Itshekile o sa Nyala
17. Ke dithuso dife tse pedi tsa go nna o itshekile o sa nyala?
17 Gore botshelo jwa go sa nyala bo ka duela go bontshiwa ke dikao tsa motlha wa Bibela le wa segompieno Legale, mo nakong epe fela ya botshelo jwa gago jwa go sa nyala, o tshwanetse go ‘tlhomamisega mo pelong.’ (1 Bakorintha 7:37) Mme ke eng se se ka go thusang go nna o itshekile fa o santse o ise o nyale? Motswedi o mogolo wa thuso ke Jehofa, ‘Moutlwi wa thapelo.’ (Pesalema 65:2) Jalo itlwaetse go mo lopa kgapetsa-kgapetsa. ‘Nnela ruri mo thapelong,’ o kopa moya wa Modimo le thuso ya gagwe mo go bontsheng loungo lwa one, leo le kopanyeletsang kagiso le boikgapo. (Baroma 12:12; Luke 11:13; Bagalatia 5:22, 23) Mme, gape, ka boikutlo jwa go rapela, akanyetsa ka metlha o bo o dirise kgakololo ya Lefoko la Modimo.
18. Bakorintha wa Ntlha 14:20 e amana jang le go nna ga motho a itshekile jaaka yo o sa nyalang?
18 Thuso e nngwe ya go nna o itshekile o sa nyala ke go tila sengwe le sengwe se se tsosang kgotelo ya kafa dikobong. Kwantle ga pelaelo, seno se akareletsa ditshwantsho tsa go tlhakanela dikobo le boitloso-bodutu jwa boitsholo jo bomaswe. Paulo o ne a re: “Mo kiloñ lo nnè banyana, me mo tlhaloganyoñ lo nnè banna.” (1 Bakorintha 14:20) O seka wa batla go itse kana go itemogelela bosula, mme ka thuso ya Modimo nna ka botlhale o sena boitemogelo ebile o sena kitso jaaka ngwanyana mo ntlheng eno. Ka nako e e tshwanang, gakologelwa gore boitsholo jo bomaswe jwa kafa dikobong le go dira bosula ga di a tshwanela mo ponong ya ga Jehofa.
19. Ke Dikwalo dife tse di lebisan kwa ditseleng tse dingwe tsa go nna o itshekile jaaka motho yo o sa nyalang?
19 Gape o tla thusega go nna o itshekile jaaka motho yo o sa nyalang ka go elatlhoko ditsala tsa gago. (1 Bakorintha 15:33) Tila ditsala tseo di tlotlomatsang go tlhakanela dikobo le lenyalo mo matshelong a bone le metlotlo. Ka ditsela tsotlhe tila dinyao! Paulo o ne a gakolola jaana: “Me boaka, le mashwè aotlhe, leha e le boiphètlhō, go se ka ga ba ga umakwa mo go lona, yaka go chwanetse baitshepi Leha e le matlhapa, leha e le puō ea dinyana, leha e le dinyaō, e leñ dilō tse di sa chwanelañ: me bogolo go ntshiwè malebogō.”—Baefesia 5:3, 4.
Isagwe e e Duelang
20. Go dirisa dingwaga tsa motho tsa go sa nyala ka botlalo mo tirelong ya ga Jehofa go tla felela ka eng?
20 Go dirisa dingwaga tsa gago jaaka Mokeresete yo o sa nyalang ka botlalo jo o ka bo kgonang mo tirelong ya ga Jehofa go tla go leretse kgotsofalo jaanong le kagiso ya mogopolo. Go dira jalo gape go tla tlatseletsa mo bogoding jwa gago jwa semoya le tlhomamo. Fa o nna o sa nyala ka ntlha ya Bogosi go iitlhelela bokhutlong jwa tsamaiso eno e e bosula ya dilo, Jehofa ga a na go lebala maiteko a gago a go intsha setlhabelo mo tirelong ya gagwe e e boitshepo.
21. Fa e le gore o tla nyala morago ga nako ya go sa nyala mo go itshekileng le mo go duelang, o ka nna wa tsenelela lenyalo ka eng?
21 Fa ka botswerere o direla dikgatlhego tsa Bogosi jaaka monna yo o sa nyalang kana mosadi yo o sa nyalwang, o tla ipelela masego a mantsi. (Diane 10:22) Mme fa o ka nyala morago mo botshelong, o tla tsenelela lenyalo ka boitemogelo jo bogolwane le tshimologo ya bomoya jo bogolo. Mo godimo ga moo, ka go latela kgakololo ya Dikwalo, o tla kgetha molekane yo o ineetseng yo o bolokang bothokgami yo o tla go thusang go direla Modimo ka boikanyegi. Mo nakong eno, o ka kgona go bontsha fa go sa nyala e le tsela e e duelang ya botshelo mo tirelong ya Modimo wa rona yo o lorato, Jehofa.
O Arabela Jang?
◻ Gareng ga batlhanka ba ga Jehofa, go na le dituelo dife tsa go nna o itshekile o sa nyala?
◻ Go na le dikao dife tsa Dikwalo tse di bontshang gore go sa nyala go ka duela?
◻ Mo metlheng ya segompieno, re na le dikao dife tsa go sa nyala mo go duelang?
◻ Ke eng se se ka thusang Mokeresete go nna a itshekile fa a ise a nyale?
[Lebokoso mo tsebe 19]
Dithuso tsa go Nna o ltshekile o sa Nyala
◆ Ka metlha rapelela moya wa Modimo le thuso mo go bontsheng leungo la one
◆ Akanyetsa le go nna o dirisa kgakololo ya Lefoko la Modimo
◆ TiIa ditshwantsho tsa tlhakanelo-dikobo le boitloso-bodutu jwa boitsholo jo bo maswe
◆ Elatlhoko ditsala tsa gago
◆ Ila puo e e maswe le dinyao
[Ditshwantsho mo go tsebe 19]
Morwadia Jefetha, moaposetoloi Paulo, le batlhanka ba bangwe ba ga Jehofa ba bone fa go sa nyala e le tsela e e duelang ya botshelo. Wena?